بيىل ماڭعىستاۋ وبلىسىندا اۋىل شارۋاشىلىعى سالاسىندا 38 ميلليارد تەڭگەنىڭ ءونىمى ءوندىرىلدى. مال شارۋاشىلىعى بويىنشا ءونىم شىعارۋ كولەمى 22,4%-عا ارتقان. بۇل تۋرالى وبلىس اكىمى نۇرداۋلەت قيلىباي باياندادى, دەپ جازادى Egemen.kz.
جەرگىلىكتى ونىمدەردىڭ قولجەتىمدىلىگىن ارتتىرۋ ماقساتىندا سىيىمدىلىعى 4 مىڭ توننا بولاتىن زاماناۋي كوكونىس ساقتاۋ قويماسى سالىنىپ جاتىر. اكىمنىڭ ايتۋىنشا, ءوڭىردىڭ تابيعي ەرەكشەلىكتەرىنە ساي ماڭعىستاۋدا تۇيە شارۋاشىلىعى, بالىق كاسىبى جانە تۋريزم باعىتتارى قارقىندى دامىپ كەلەدى. بۇگىندە ماڭعىستاۋ وبلىسىندا 95 مىڭعا جۋىق تۇيە تىركەلگەن. تۇيە ءسۇتىن تەرەڭ وڭدەپ, ەكسپورتقا شىعارۋ باعىتىندا ءۇش ءىرى جوبا جۇمىس ىستەپ تۇر. ال بيىل تۇيە ءسۇتىن اۆتوماتتاندىرىلعان ادىسپەن ساۋاتىن تسەح اشىلدى.
جالپى وڭىردە اگروونەركاسىپتىك كەشەندى دامىتۋ بويىنشا 2025-2027 جىلدارى 23,6 ميلليارد تەڭگەنىڭ 15 ينۆەستيتسيالىق جوباسى ىسكە اسىرىلادى. بۇل ىشكى نارىقتى تابيعي ءارى جەرگىلىكتى ونىمدەرمەن قامتاماسىز ەتۋگە جول اشادى. سونىمەن قاتار, ۆەتەريناريالىق جۇيەنى جاڭعىرتۋ اياسىندا 43 ۆەتەريناريالىق پۋنكت پەن 1 ستانتسيا پايدالانۋعا بەرىلەدى.