«استانا وپەرا» تورىندە «we are the world» حالىقارالىق بالالار سۋرەت كورمەسى اشىلدى. ەلوردالىق تەاتر بۇل كورمەنى بيىل ەكىنشى رەت وتكىزىپ وتىر.
كورمە ناعىز شىعارماشىلىق مەرەكەگە اينالىپ, «استانا وپەرا» تەاترلىق قولونەر ستۋدياسىنىڭ تاربيەلەنۋشىلەرىن, سونداي-اق ەلىمىزدىڭ جانە الەمنىڭ تۇكپىر-تۇكپىرىنەن دارىندى بالالاردى تەاتر كۇمبەزىنىڭ استىنا جينادى. ايتا كەتەيىك, «we are the world» جوباسى – 2018 جىلدان بەرى 60 ەلدىڭ جاس سۋرەتشىلەرىن بىرىكتىرىپ كەلە جاتقان جاھاندىق باستاما. اتالعان جوبا جاس تالانتتارعا پاريجدەگى لۋۆر مەن لوندونداعى «White Cube» گالەرەياسىنان باستاپ ماسكەۋدەگى عارىش مۋزەيىنە دەيىنگى بەدەلدى الاڭداردا ءوز جۇمىستارىن ۇسىنۋعا مۇمكىندىك بەرەدى.
بيىل كورمە ۇيلەستىرۋشىسى يرينا كۋسەنوۆا قاتىسۋشىلارعا ەرەكشە ءارى عاجايىپ تەاتر تاقىرىبىن ۇسىندى. بۇل وي بالالاردى ودان سايىن شابىتتاندىرىپ, پ.ي.چايكوۆسكيدىڭ «ششەلكۋنچيك» كورسەتىلىمدەرى قارساڭىندا ءدال وسى باتىل ەرتەگى كەيىپكەرى كوپتەگەن جۇمىستىڭ نەگىزگى بەينەسىنە اينالدى. جاس سۋرەتشىلەردىڭ قالامىنداعى اعاش ساربازدار, پەرىلەر, تىشقان پاتشالارى مەن جارقىراعان شىرشالار زالدى عاجايىپ كۇيگە تولتىردى. سونداي-اق ك.بايسەيىتوۆا اتىنداعى كامەرالىق زالدا «استانا وپەرا» بالالار تەاتر ستۋدياسى دايىنداعان مازمۇندى كونتسەرت ءوتتى.
«وسىنداي ساحنادا ءوز جۇمىستارىن ۇسىنىپ, ديپلوم الۋ – جاس قاتىسۋشىلار ءۇشىن زور جەتىستىك. ءبىز استاناداعى عانا ەمەس, بۇكىل قازاقستانداعى ارت-مەكتەپتەرمەن جانە ستۋديالارمەن ۇزاق جىلدان بەرى جۇمىس ىستەپ كەلەمىز. ءبىزدىڭ بالالارىمىز بۇكىل الەم بويىنشا, اتاپ ايتقاندا, لوندون, پاريج, لوس-اندجەلەس, بەيجىڭ قالالارىندا وتەتىن كورمەلەرگە قاتىسىپ ءجۇر. ءار ەلدىڭ ءوز كوركەمدىك مەكتەبى بار, بۇل ەرەكشەلىك جۇمىستاردان ايقىن كورىنەدى. قازاق بالالارىنىڭ سۋرەتتەرىنەن اشىقتىق, جاسامپازدىق جانە تۋعان ەلىنە دەگەن سۇيىسپەنشىلىك ەرەكشە بايقالادى», دەيدى «We Are the World» حالىقارالىق مادەني ديپلوماتيا قاۋىمداستىعىنىڭ پرەزيدەنتى ستەفاني گاسپار.
ۇيىمداستىرۋشىلار اتاپ وتكەندەي, «we are the world» – مادەنيەتارالىق بايلانىستاردى دامىتۋعا, بالالارعا وزدەرىن كورسەتۋگە كومەكتەسۋگە جانە ءوز كۇشتەرىنە دەگەن سەنىمدىلىكتى قالىپتاستىرۋعا باعىتتالعان اۋقىمدى جوبا. 2018 جىلدان بەرى الەمنىڭ 60-تان استام ەلىنەن بالالاردىڭ قاتىسۋىمەن 30-دان استام ءىس-شارا وتكىزىلدى.
ال كەلەسى كورمەلەر تايلاند, سينگاپۋر مەن يتاليادا وتەدى دەپ جوسپارلانسا, 2026 جىلى جەلتوقساندا جاس سۋرەتشىلەر پاريجدە (فرانتسيا) قايتا كەزدەسەدى.