الماتى قالاسىندا «جىل ادامى» جانە «قازاقستانداعى جىل تاڭداۋى» فەستيۆالدارىنىڭ ماراپاتتاۋ ءراسىمى ءوتتى. «قازاق گازەتتەرى» جشس قۇرامىنا كىرەتىن «كازاحستانسكايا پراۆدا» گازەتى «قازاقستانداعى 2025 جىلدىڭ №1 رەسپۋبليكالىق قوعامدىق-ساياسي كۇندەلىكتى باسىلىمى» اتالىمىندا لاۋرەات اتاندى.
سالتاناتتى جيىن بارىسىندا ەڭبەگى مەن ەرلىگى ەلدى سۇيسىندىرگەن ازاماتتاردىڭ ەسىمدەرى جاريالاندى. جەڭىمپازدارعا «كاسىبي جەتىستىكتەرى ءۇشىن» جانە «ەلەۋلى ۇلەسى ءۇشىن» اتالىمدارىندا ۇلتتىق «التىن ادام – جىل ادامى» سىيلىعى تابىستالدى.
داستۇرگە ساي, جوبا اياسىندا ۇمىتكەرلەردى ىرىكتەۋ حالىق اراسىندا جۇرگىزىلەتىن الەۋمەتتىك ساۋالنامادان باستالادى. ودان بولەك جوباعا قاتىسۋشىلار ۇسىنعان دەرەكتەرگە, سونداي-اق وزدەرىنىڭ كاسىبي تاجىريبەسى مەن ساراپتامالىق قورىتىندىلارىنا سۇيەنە وتىرىپ, قازىلار القاسى ءاربىر ۇمىتكەرگە داۋىس بەرەدى.
ءىس-شارا اياسىندا «شىعارماشىلىق جەتىستىكتەرى ءۇشىن» ارنايى سىيلىقتارى دا تابىستالىپ, «قوعامدىق مويىنداۋ» حالىقتىق سىيلىعىنىڭ لاۋرەاتتارى ماراپاتتالدى.
ۇلتتىق «جىل ادامى» – «جىل تاڭداۋى» – تاۋەلسىز جوبا. ول بۇقارالىق اقپارات قۇرالدارى مەن حالىقارالىق ۇيىمدار تاراپىنان زور قولداۋعا يە. جوبانىڭ ۇستانىمى – وتانعا دەگەن شىنايى سۇيىسپەنشىلىك.
ءيا, «جىل ادامى» – «جىل تاڭداۋى» فەستيۆالى حالىقارالىق مارتەبەگە يە ەكەنى ءسوزسىز. بەس ەلدە, اتاپ ايتساق, قازاقستاندا, قىرعىزستاندا, وزبەكستاندا, ۋكراينادا, بەلارۋس ەلىندە وتكىزىلەدى.