2026 جىلدىڭ 1 قاڭتارىنان باستاپ ەل ازاماتتارى جەكە كۋالىك العاندا نەمەسە اۋىستىرعاندا تولەنەتىن باج سالىعىنان بوساتىلادى. ىشكى ىستەر مينيسترلىگىنىڭ باستاماسىمەن ەندى قازاقستاندىقتار جەكە كۋالىكتى تەگىن الىپ, اۋىستىرادى, دەپ جازادى Egemen.kz.
قازىر پاسپورتتاردى ەلەكتروندى تۇردە راسىمدەۋ مۇمكىندىگى تەك ەل ىشىندە ەمەس, شەتەلدەردە دە قولجەتىمدى. بۇل قىزمەت 71 ەلدەگى 99 شەتەلدىك مەكەمەدە ىسكە اسىرىلعان. شەتەلدە جۇرگەن قازاقستاندىقتار ەندى پاسپورتتى بۇرىنعىداي 6 اي كۇتپەي, نەبارى 30 كۇن ىشىندە الا الادى.
بۇگىندە ەلىمىزدە حالىقتى قۇجاتتاندىرۋدىڭ بىرىڭعاي جۇيەسى جۇمىس ىستەيدى. بۇل جۇيە ارقىلى ازاماتتارعا جەكە سايكەستەندىرۋ ءنومىرى (جسن) بەرىلەدى, جەكە كۋالىك پەن پاسپورتتار راسىمدەلەدى, سونداي-اق ازاماتتاردى تىركەۋ (تۇرعىلىقتى مەكەنجاي بويىنشا تىركەۋ) جۇزەگە اسىرىلادى.
كوشى-قون قىزمەتى كوميتەتىنىڭ توراعاسى اسلان اتالىقوۆ كەلەر جىلدان جەكە كۋالىكتى تەگىن بەرۋ, اۋىستىرۋ ىسى قۇجات الۋ ءراسىمىن جەڭىلدەتىپ, ازاماتتاردىڭ قارجىلىق جۇكتەمەسىن ازايتۋعا باعىتتالعانىن اتاپ ءوتتى.