استانا. 23 ناۋرىز. كەشە تۇندە فۋتبولدان يسپانيا چەمپيوناتىنىڭ 28-تۋرى اياسىندا «بارسەلونا» مەن ءمادريدتىڭ «رەالى» كەزدەستى. كاتالونيادا وتكەن ويىندا الاڭ يەلەرى 2:1 ەسەبىمەن جەڭىسكە جەتتى. بۇل تۋرالى egemen.kz حابارلادى.
ويىننىڭ 19-مينۋتىندا ليونەل مەسسيدەن پاس العان جەرەمي ماتە ەسەپ اشىپ, كومانداسىن العا شىعاردى. ارادا 12 مينۋت ۋاقىت وتكەندە كريشتيانۋ رونالدۋ تارازى باسىن تەڭەستىردى. پورتۋگالعا ناتيجەلى پاس شىعارعان كارىم بەنزەما ەكەنىن ايتا كەتەيىك.
ال ەكىنشى كەزەڭدە «بارسەلونانىڭ» شابۋىلشىسى لۋيس سۋارەس كومانداسىنىڭ ەكىنشى گولىن سوقتى (56-مينۋت). بۇل جولى شابۋىلشىعا پاستى قورعاۋشى داني الۆەس بەردى. سونىمەن «كامپ نوۋ» ستاديونىنا جينالعان 98 760 كورەرمەن الاڭ يەلەرىنىڭ جەڭىسىنە كۋا بولدى. كەزدەسۋ بارىسىندا «بارسەلونا» ساپىنان 5 ويىنشى, ال «رەالدىڭ» 6 فۋتبولشىسى ەسكەرتۋ العانىن ايتا كەتەيىك. وسىلايشا بۇكىل الەم كوز تىككەن كەزەكتى «ەل كلاسسيكو» تاريح قويناۋىنا ەندى.
اتالعان ويىننان كەيىن «بارسەلونا» 68 ۇپايمەن تۋرنير كەستەسىندە جەكە-دارا كوش باستادى. ال ەكىنشى ساتىعا جايعاسقان «رەالدىڭ» ەنشىسىندە 64 ۇپاي بار.
وسى رەتتە ءبىز قوس كوماندا اراسىنداعى كەيبىر دەرەكتەرگە توقتالعان ەدىك. ەندەشە «ەل كلاسسيكونىڭ» ەڭ قىزىقتى ساتتەرىنە نازار اۋدارايىق.
كەشەگى ويىن «بارسەلونا» مەن «رەالدىڭ» رەسمي جارىستارداعى 230-ماتچى. ال يسپانيا چەمپيوناتىنداعى 170-كەزدەسۋ.
ەكى كوماندا اراسىنداعى تەكەتىرەستە «رەال» 92 رەت جەڭىسكە جەتكەن ەكەن. «بارسەلونا» 90 مارتە جەڭىس تويىن تويلادى. ال 48 ويىن تەڭ اياقتالعان.
ەگەر تەك لا ليگاداعى ويىنداردى الار بولساق, ءمادريدتىڭ كومانداسى 71 مارتە باسىم تۇسكەن. كاتالوندىقتاردىڭ جەڭىسى 67-گە تەڭ. سايكەسىنشە, 32 رەت قارسىلاستار جەڭىمپازدى انىقتاي المادى.
«رەال» سوڭعى 30 جىلدىڭ ىشىندە ءبىر-اق رەت چەمپيونات بارىسىنداعى ەكى ويىندا دا جەڭىسكە جەتتى. ول 2007-2008 جىلعى ماۋسىمدا تىركەلدى. جالپى, اتالعان كلۋب تاريحىندا لا ليگاداعى ءبىر ماۋسىمدا بولاتىن ەكى «ەل-كلاسسيكونى» 13 رەت جەڭگەن.
«بارسەلونا» يسپانيا چەمپيوناتىندا ءبىر ماۋسىمداعى «رەالعا» قارسى ەكى ويىندا 12 مارتە جەڭىس تويىن تويلاعان. سوڭعىسى وتكەن ماۋسىمدا عانا تىركەلگەنىن ايتا كەتەيىك.
ەگەر كەشەگى ويىندا كارلو انچەلوتتيدىڭ شاكىرتتەرى جەڭىسكە جەتكەن بولسا, قاتارىنان ءۇش رەت «بارسەلونادان» باسىم تۇسەر ەدى. سەبەبى, وسىندان ءبىر جىل بۇرىن يسپانيا كۋبوگىنىڭ فينالىندا «رەال» باستى قارسىلاسىنان ايلاسىن اسىرعانى ەسىمىزدە. سونداي-اق, بيىلعى چەمپيوناتتىڭ العاشقى اينالىمىندا دا مادريدتىكتەردىڭ مەرەيى ۇستەم بولدى. الايدا, بۇل جولى «رەال» ويىنشىلارىنا ونداي باقىت بۇيىرمادى. جالپى, اتالعان ناتيجە سوڭعى رەت 37 جىل (1978 ج.) بۇرىن تىركەلگەن ەكەن. ول كەزدە ەكى كومانداداعى قازىرگى ويىنشىلاردىڭ بىرەۋى دە ءالى دۇنيەگە كەلمەگەن ەدى. ال «بارسەلونانىڭ» باس جاتىقتىرۋشىسى لۋيس ەنريكە ول كەزدە 8 جاسار بالا بولسا, كارلو انچەلوتتي يتاليانىڭ «پارماسىندا» ءوزىنىڭ كاسىبي فۋتبولداعى ءۇشىنشى ماۋسىمىن وتكىزىپ ءجۇردى.
كلۋبتىق جانە ۇلتتىق قۇراما دەڭگەيىندەگى ماتچتاردا الەمنىڭ قوس ۇزدىگى مەسسي مەن رونالدۋ 28 رەت ءبىر-بىرىنە قارسى ويناعان. سونىڭ 13-ىندە ارگەنتينالىق جەڭىسكە جەتسە, رونالدۋ 8 مارتە مەسسيدەن باسىم تۇسكەن. 7 ويىن تەڭ اياقتالدى. وسى 28 ويىندا مەسسي 17 گول سوقسا, رونالدۋ 16 رەت مەرگەندىگىمەن كوزگە تۇسكەن.
يسپانيا چەمپيوناتىنىڭ بيىلعى ماۋسىمىندا بومبارديرلەردىڭ كوشىن ازىرگە مەسسي باستاپ تۇر. وسىعان دەيىنگى 28 تۋردا ول 32 رەت ناتيجەلى سوققى جاساعان. ال اتالعان تىزىمدە ەكىنشى تۇرعان رونالدۋدىڭ مەسسيدەن ءبىر گولى كەم (31 گول). ەگەر قوس ويىنشىنىڭ بيىلعى لا ليگاداعى ناتيجەلى پاستارىن سانايتىن بولساق, تاعى دا مەسسيدىڭ الدا ەكەنىنە كوز جەتكىزەمىز (15:11).
مەسسي جىل باسىنان بەرى يسپانيا چەمپيوناتىندا 17 گول سوقتى. مۇنداي كورسەتكىشكە بيىلعى ماۋسىمدا ەۋروپاداعى ەڭ ۇزدىك بەس چەمپيوناتتى (انگليا, يسپانيا, گەرمانيا, يتاليا, فرانتسيا) قوسا ەسەپتەگەندە ەشكىم قول جەتكىزگەن جوق. ارگەنتينالىقتان كەيىنگى ساتىدا 11 گولدان سوققان گارري كەين («توتتەنحەم», انگليا) مەن باس دوست («ۆولسبۋرگ», گەرمانيا) تۇر.
«ەل كلاسسيكو» تاريحىندا لەونەل مەسسي 21 مارتە مەرگەندىگىمەن كوزگە تۇسكەن. شابۋىلشىنىڭ بۇدان كوپ گول سوققان ويىنى «بارسەلونا» مەن ءمادريدتىڭ «اتلەتيكوسى» اراسىنداعى ايقاستا تىركەلگەن. ول بۇگىنگە دەيىن «اتلەتيكومەن» بولعان ويىنداردا 22 رەت قارسىلاستارىن قاپى قالدىردى.
مەسسيدىڭ «بارسەلونا» ساپىنداعى كەلەسى دوبى رەسمي ويىنداردا سوققان 400-گول بولماق. ياعني, بۇگىنگە دەيىن لەونىڭ ەنشىسىندە «بارسەلونا» ءۇشىن سوققان 399 دوپ بار.
لۋيس ەنريكەنىڭ كەزىندە «بارسەلونا» مەن «رەال» ساپىندا ويناعانى بەلگىلى. ول «ەل-كلاسسيكو» تاريحىندا ەكى كوماندانىڭ دا قاقپاسىنا گول سوققان بەس فۋتبولشىنىڭ بىرەۋى. ەنريكەدەن بولەك, مۇنداي دارەجەگە حوسيپ ساميتەر, لۋيش فيگۋ, روبەرتو كارلوس جانە رونالدو قول جەتكىزگەن.
كلۋبتىق جانە ۇلتتىق قۇراما دەڭگەيىندەگى ويىنداردا كريشتيانۋ رونالدۋ «كامپ نوۋ» ستاديونىندا 9 مارتە مەرگەندىگىمەن كوزگە تۇسكەن. رونالدۋ ەڭ كوپ گولىن «رەالدىڭ» «سانتياگو بەرنابەۋ» ستاديونىندا سوققان (157 گول). ەكىنشى ورىندا «مانچەستەر يۋنايتەدتىڭ» الاڭى «ولد تراففورد» تۇر (73 گول).
ەلامان قوڭىر.
دەرەك: egemen.kz.
سۋرەت: bbc.com.