سۋبسيديانىڭ قايتارىمى بولا ما؟

ايماقتا اسىل تۇقىمدى سيىر وسى­رۋ­مەن اينالىساتىن 168-دەن استام شارۋاشىلىق بولسا, ولاردىڭ قولىندا 74 مىڭنان استام ءىرى قارا بار. ەت باعىتىنداعى اسىل تۇقىمدى ءىرى قارا مالدان قازاقتىڭ اقباس تۇقىمى, گەرەفورد, ابەردين-انگۋس, اۋليەكول تۇقىمدارىن, ال ءسۇت باعى­تىنداعىلاردان سيممەنتال, گولشتين, قىزىل دالا تۇقىمدارى كەڭ تارالعان.

2025 جىلى ەۋروپادان جانە رەسەيدەن ءسۇت باعىتىنداعى 812 باس گولشتينو-فريز تۇقىمدى ءىرى قارا اكەلىنگەن.

– مال شارۋاشىلىعىن سۋبسيديالاۋ قاعيداسىنا سايكەس, تمد ەلدەرىنەن ساتىپ الىنعان ءسۇتتى جانە ءسۇتتى-ەتتى باعىتتاعى اسىل تۇقىمدى سيىر ساتىپ العانى ءۇشىن 225 مىڭ تەڭگە, ەۋروپا ەلدەرىنەن جەتكىزىلگەندەرگە 400 مىڭ تەڭگە سۋبسيديا قاراس­تىرىلعان, – دەيدى وڭىرلىك اۋىل شارۋاشىلىعى باسقارماسى باس­شى­سىنىڭ ورىنباسارى تولەگەن كوشەرباەۆ.

قازىرگى ۋاقىتتا ايماقتا 471,6 مىڭ سيىر بار. ونىڭ ىشىندە 417,6 مىڭى – ءسۇت باعىتىندا. ءىرى قارانى يمپورتتاۋ ارقاسىندا جانۋارلاردىڭ ونىمدىلىگى دە ارتىپ كەلەدى. 2025 جىل سوڭىندا اۋىل شارۋا­شىلىعى كاسىپورىندارىندا ءبىر ساۋىن­دى سيىردان الىناتىن ورتاشا ءسۇت ءونىمى 5 413 كگ-دان 5 869 كگ-عا دەيىن وسكەنى بايقالعان. جىل باسىنان 220,5 مىڭ توننا ءسۇت ءوندىرىلىپ, بۇل وتكەن جىلمەن سالىستىرعاندا 8,4 %-عا ارتقان.

– 2024 جىلى مال شارۋا­شىلى­عىن سۋبسيديالاۋ ءۇشىن شارۋا قوجالىقتارى­نا 7,2 ملرد تەڭگە سۋبسيديا بەرىلدى (ونىڭ ىشىندە اسىل تۇقىمدى مال شارۋا­شىلىعىن دامىتۋ ءۇشىن 3,3 ملرد تەڭگە), ال بيىل 7,7 ملرد تەڭگە (اسىل تۇقىمدى مال شارۋاشىلىعىن دامىتۋ ءۇشىن 2,7 ملرد تەڭگە) تولەندى. تاۋارلىق ءسۇت فەرماسىن سالۋ بويىنشا قۇنى 10 ملرد تەڭگەگە 2 جوبا ىسكە قوسىلدى. تاعى بىرەۋىنىڭ قۇرىلىسى جىل سوڭىنا دەيىن اياقتالادى, – دەپ قوستى باسقارما وكىلى.

ماماندار اسىل تۇقىمدى شارۋا­شى­لىقتار ەت بويىنشا جوسپاردى ارتىعىمەن ورىنداپ وتىرعانىن ايتادى. جىل سايىن شامامەن 26 مىڭ تونناعا جۋىق ەت وندىرىلەدى. ال ءوڭىر تۇرعىندارىنىڭ جىلدىق سۇرانىسى – 15,1 مىڭ توننا. ياعني وبلىس حالقىنىڭ تۇتىنۋ قاجەتتىلىگى 172 %-عا ورىندالىپ وتىر دەگەن ءسوز.

مەملەكەت باسشىسىنىڭ تاپسىرما­سى بويىنشا كەيىنگى ءۇش جىلدا ەلىمىزدەگى فەرمەرلەرگە 2,5 پايىز مولشەرلەمە­مەن جەڭىلدەتىلگەن نەسيە بەرىلىپ كەلەدى. جەڭىلدەتىلگەن باعدارلامانىڭ شاراپاتىن سەزىنگەندەردىڭ ءبىرى – «Agro Trade-PV» جشس. تاپ-تۇيناقتاي فەرمادان اينالاداعى 3 اۋىلدان 70-تەن استام ادام جۇمىس تاۋىپ وتىر. مۇندا 1200-دەي سيىر ۇستالادى. كۇنىنە 40 توننادان استام ءسۇت ساۋىلىپ, وبلىس ورتالىعىنداعى ء«سۇت» اق-نا تاپسىرىلادى.

«سيىرلار 305 كۇندەي ۇزبەي ساۋى­لىپ, ودان سوڭ 60 كۇن تىڭايادى. بۇل ۋاقىتتا بۇزاۋلاپ ۇلگەرەدى. جالپى, اسىل تۇقىمدى سيىرلار ءارى كەتسە 5 جىل, ورتاشا 3 جىل عانا ءونىمدى ءسۇت بەرەدى, ودان ءارى ءسۇتىنىڭ قاسيەتى تومەندەپ, سۇيىلادى. سوندىقتان سەلەكتسيا جۇمىستارىمەن ۇزبەي اينالىسىپ, اسىل تۇقىمدى مالدىڭ ۇرپاق جالعاستىرۋىن ۇيىمداستىرۋدامىز. جاس تول­دەردى وزگە شارۋاشىلىقتارعا ساتامىز. مەملەكەتتەن 2,5 پايىزبەن 257 ملن تەڭگە قاراجات الىپ, 200-دەن اسا سيىر ساتىپ العانبىز. ونىڭ ارقاسىندا كەڭەيىپ, سيىر سانىن كوبەيتتىك», دەيدى فەرما باسشىسى قۋانىش تەمىرعالين.

فەرماداعى شەڭبەرلى ساۋ جۇيەسىندە سيىرلار كۇنىنە 3 مارتە ساۋىلادى. ءسۇتتىڭ ماي­لىلىعى – 4,5 پايىز. مۇنداي ساپاسى جوعارى شيكىزاتتى زاۋىتتار بىردەن قابىلداۋعا بەيىم.

پاۆلودار وبلىسى