الدىن الا مالىمەتكە سايكەس, كوپىردىڭ ۇزاق جىل بويى پايدالانىلعاندىقتىن جانە تىرەك باعانالارىنىڭ ءتۇبىنىڭ شايىلۋى سالدارىنان قاۋىپ تۋىنداعان, دەپ جازادى Egemen.kz.
تۇركىستان وبلىسى كەلەس اۋدانىنا قاراستى قوشقاراتا اۋىلدىق وكرۋگى اۋماعىندا, كەلەس وزەنى ارقىلى وتەتىن وبلىستىق ماڭىزى بار كح-20 اۆتوجولىنداعى كوپىر قۇلادى.
– اتالعان جاعدايعا بايلانىستى الدىن الا قاۋىپ بەلگىلەرى انىقتالىپ, دەر كەزىندە قابىلدانعان شەشىمدەردىڭ ناتيجەسىندە كوپىر ارقىلى كولىك قوزعالىسى تولىق توقتاتىلعان بولاتىن. سونىڭ ارقاسىندا ادام شىعىنى مەن ماتەريالدىق زالالعا جول بەرىلگەن جوق, – دەلىنگەن اۋدان اكىمدىگى ۇسىنعان اقپاراتتا.
كوپىر بويىمەن «داربازا تسج» قاراستى سۋ قۇبىرى وتكەن, ول زاقىمدانعان. سۋ قۇبىرى قالپىنا كەلتىرىلگەنگە دەيىن قوشقاراتا اۋىلدىق وكرۋگى ۇشقىن ەلدىمەكەنىندەگى 137 ابونەنتتى اۋىز سۋمەن قامتاماسىز ەتۋ ءۇشىن سۋ تاسىمالداۋ ۇيىمداستىرىلدى.
كوپىر وبلىستىق «وڭتۇستىك جولدارى» مكك-ءنىڭ مەنشىگىندە. ونىڭ ۇزىندىعى – 70 م, ەنى – 10 م, بيىكتىگى – 6,5 م.
نىسان 1970 جىلدارى سالىنعان, 2010 جىلى ورتاشا جوندەۋ جۇمىستارى جۇرگىزىلگەن. 2024 جىلى «وڭتۇستىك جولدارى» مكك تاراپىنان كوپىردىڭ جاعالاۋلارى بەتونمەن بەكىتىلگەن. قاۋىپتى جاعدايدىڭ الدىن الۋ بويىنشا, اۋدان تاراپىنان كوپىرگە جوندەۋ جۇمىستارىن قاجەت ەتەتىنى بويىنشا ءتيىستى ۇسىنىمدار وبلىسقا ۇسىنىلعان.
قازىرگى ۋاقىتتا اينالما جول ۇيىمداستىرىلدى, جەرگىلىكتى تۇرعىندارمەن ءتۇسىندىرۋ جۇمىستارى جۇرگىزىلىپ جاتىر.
تۇرعىنداردىڭ قاۋىپسىز ءارى ۇزدىكسىز قاتىناۋىن قامتاماسىز ەتۋ ماقساتىندا الپامىس باتىر جانە بىرتىلەك اۋىلدىق وكرۋگتەرى ارقىلى وتەتىن 10-15 شاقىرىمدىق اينالما جول قارالدى.
الداعى ۋاقىتتا كوپىردى قالپىنا كەلتىرۋ جانە كولىك قاتىناسىن قايتا جولعا قويۋ ماقساتىندا كەشەندى شارالار قابىلدانادى.