ءماجىلىس دەپۋتاتى ايدوس سارىم الەۋمەتتىك جەلىلەردە كاسپي قۇبىر كونسورتسيۋمىنىڭ تەرمينالىنا جاسالعان شابۋىلدى قولداعان ازاماتتاردى جاۋاپقا تارتۋدى تالاپ ەتتى, دەپ حابارلايدى Egemen.kz.
بۇعان دەيىن الەۋمەتتىك جەلى قولدانۋشىلارى ستراتەگيالىق ماڭىزى بار مەملەكەتتىك ينفراقۇرىلىمعا جاسالعان شابۋىلداردى اشىق تۇردە اقتاعان. ءماجىلىس دەپۋتاتىنىڭ پىكىرىنشە, مۇنداي ارەكەتتەر ءسوز بوستاندىعىنا بەرىلەتىن كونستيتۋتسيالىق قۇقىق شەگىنەن اسىپ, ۇلتتىق مۇددەلەرگە ناقتى زيان كەلتىرەدى.
ايدوس سارىم باس پروكۋراتۋرادان اتالعان جاريالانىمدارعا قۇقىقتىق باعا بەرىپ, ولاردى تەرروريزمدى ناسيحاتتاۋ (قر قك 256-باپ) نەمەسە مەملەكەتتىك وپاسىزدىق (قر قك 175-باپ) رەتىندە قاراستىرۋدى سۇرادى.
سونىمەن قاتار, دەپۋتات حالىق اراسىندا ءتۇسىندىرۋ جۇمىستارىن جۇرگىزىپ, مۇناي قۇبىرلارى مەن ەلدىڭ ەكونوميكالىق قاۋىپسىزدىگى ءۇشىن اسا ماڭىزدى وزگە دە ينفراقۇرىلىم نىساندارىن جويۋعا شاقىراتىن اقپاراتتى تاراتپاۋ كەرەكتىگىن ءتۇسىندىرۋدى ۇسىندى.
ايتا كەتەيىك, كاسپي قۇبىر كونسورتسيۋمى – قازاقستان مۇنايىن ەكسپورتتاۋدىڭ نەگىزگى باعىتى. ەل جىل سايىن وسى قۇبىر ارقىلى كەمىندە 60 ميلليون توننا مۇناي جونەلتەدى. قازىرگى ۋاقىتتا قازاقستان شابۋىلدان كەيىنگى شىعىنداردى ەسەپتەپ جاتىر. ەنەرگەتيكا ءمينيسترى ەرلان اقكەنجەنوۆتىڭ ايتۋىنشا, شابۋىل سالدارىنان كەم دەگەندە 480 مىڭ توننا مۇناي وندىرىلمەي قالعان.
ەسكە سالساق, 29 قاراشادا استانا ۋاقىتىمەن 06:06-دا نوۆوروسسيسك پورتى اۋدانىندا كقك-نىڭ تەڭىز ينفراقۇرىلىم نىساندارىنا ەكيپاجسىز ءجۇزۋ قۇرالدارى ارقىلى شابۋىل جاسالعان ەدى. ناتيجەسىندە تەڭىزدەگى قاشىقتاعى ايلاق قوندىرعىسى ۆپۋ-2 (قالقىمالى تيەۋ قۇرىلعىسى) ايتارلىقتاي زاقىمدالدى. ەرمەك كوشەرباەۆ كتك-عا جاسالعان شابۋىلدى ۋكراينا تاراپىمەن تالقىلادى. ەنەرگەتيكا ءمينيسترى ەرلان اقكەنجەنوۆ كتك-عا تولىققاندى بالاما جوق ەكەنىن, ال وزگە باعىتتار تەك جۇكتىڭ بەلگىلى ءبىر بولىگىن عانا تاسىمالداي الاتىنىن ايتقان ەدى.