استانا. 22 ناۋرىز. ۆتب ليگاسى اياسىندا «استانا» باسكەتبول كومانداسى كۋبانعا قوناققا بارىپ, جەرگىلىكتى «لوكوموتيۆتەن» 79:105 ەسەبىمەن جەڭىلۋگە ءماجبۇر بولدى. بۇل تۋرالى egemen.kz حابارلادى.
رامۋناس بۋتاۋتاس باس جاتتىقتىرۋشى بولىپ كەلگەلى ويىن ورنەگىنە قان جۇگىرگەن ءبىزدىڭ كوماندا سوڭعى كەزدەرى ماڭىزدى ۇپايلارعا قول جەتكىزىپ جۇرگەنى بەلگىلى. وسىنىڭ الدىنداعى ويىندا قازاننىڭ ۋنيكس-ءىن جەڭگەنىمىز دە ەسىمىزدە. ال «لوكوموتيۆ» سوڭعى كەزدەسۋىن ريگانىڭ ۆەف كومانداسىنا قارسى وتكىزىپ, ەسە جىبەرگەن ەدى. سوندىقتان وتاندىق جانكۇيەرلەر «استانادان» تاعى دا جەڭىس كۇتكەنى جاسىرىن ەمەس.
الايدا, كۋباندىقتار الدىڭعى ويىننان ساباق شىعارىپ, بىردەن تىزگىندى ءوز قولدارىنا الدى. دەسە دە, ەسەپتى ءبىزدىڭ باسكەتبولشىلار اشقانىن ايتا كەتەيىك. العاشقى كەزەڭدى ءوز پايدالارىنا 27:14 ەسەبىمەن اياقتاعان الاڭ يەلەرى ويىننىڭ ەكىنشى بولىگىندە دە «استانانىڭ» ادىمىن اشتىرمادى. ءتىپتى ۇلكەن ءۇزىلىس الدىندا ەسەپ ايىرماسى 28 ۇپايعا دەيىن (54:26) ۇلعايىپ, «لوكوموتيۆ» ايقىن باسىمدىقپەن العا شىقتى. ايتسە دە, ەكىنشى كەزەڭ سوڭىندا 54:29 ەسەبى تىركەلدى.
قالعان ەكى كەزەڭدە «استانا» نامىسقا تىرىسىپ باقتى. ءتىپتى ءۇشىنشى كەزەڭدە جەڭىسكە جەتتى (27:26). ال سوڭعى كەزەڭ تاعى الاڭ يەلەرىنىڭ باسىمدىعىمەن اياقتالدى (25:23). ناتيجەسىندە, ەلوردالىقتار ءىرى ەسەپپەن ەسە جىبەردى.
كەزدەسۋ بارىسىندا «استانا» كومانداسىنىڭ باسكەتبولشىسى راشيد ماحالباسيچ ەڭ كوپ ۇپاي جينادى. ول 40 مينۋتتىڭ ىشىندە 19 ۇپايدى ەنشىسىنە جازعان ەكەن. ال الاڭ يەلەرى ساپىنان راشيدتەن ءبىر ۇپايى كەم اندرەي زۋبكوۆ شەبەرلىگىمەن كوزگە ءتۇستى.
وسى جەڭىلىسىنەن كەيىن «استانا» تۋرنير كەستەسىندە ءبىر ساتى تومەن سىرعىپ, قايتادان 10-ورىنعا ءتۇسىپ قالدى. رامۋناس بۋتاۋتاس شاكىرتتەرى كەلەسى ويىندى 29 ناۋرىزدا سىرت الاڭدا «حيمكيگە» قارسى وتكىزەدى. اتالعان كوماندا ليگاداعى ۇزدىكتەردىڭ ءبىرى ەكەنى بەلگىلى. بۇگىندە ولار تۋرنير كەستەسىندە 2-ورىندا كەلەدى.
ەلامان قوڭىر.
دەرەك: egemen.kz.
سۋرەت: vtb-league.com.