قىلمىستىق تەرگەۋ دەپارتامەنتىنىڭ باستىعى سەرگەي ستيحەەۆتىڭ ايتۋىنشا, ءىىم وتكەن جىلدارداعى قىلمىستاردى اشۋ بويىنشا جۇمىستاردى كۇشەيتكەن. ول زاماناۋي تەحنولوگيالار مەن مۇراعات ماتەريالدارىن قاراۋ كۇدىكتىلەردى كوپ جىلدار وتكەننەن كەيىن دە تابۋعا كومەكتەسەتىنىن اتاپ ءوتتى, دەپ جازادى Egemen.kz.
ستيحەەۆ وسىنداي ءبىر ءىس تۋرالى ايتىپ بەردى.
«2006 جىلى قاراعاندى وبلىسىندا اسا اۋىر قىلمىس جاسالدى. جەتپىسكە تاياعان ايەل دۇكەنگە بارا جاتقان جولدا قاڭىراپ قالعان ات قوراسىنىڭ جانىنان وتكەن. سول جەردە وعان بەلگىسىز ادام شابۋىل جاساپ, زورلاپ, ولتىرگەن. وقيعا ورنىندا از مولشەردە بيولوگيالىق ىزدەر عانا قالعان», دەدى ستيحەەۆ.
ونىڭ ايتۋىنشا, سول كەزدەگى تەحنيكالىق مۇمكىندىكتەر بۇل ىزدەردى سايكەستەندىرۋگە جەتكىلىكسىز بولعان. قىلمىس جىلدار بويى اشىلماي كەلگەن.
«بيىل جابدىقتارىمىزدى جاڭارتتىق. بۇرىنعى قىلمىستاردان قالعان بارلىق بيوماتەريالدى قايتادان زەرتتەپ, كريميناليستيكالىق ەسەپتەر, سونىڭ ىشىندە دنق بازاسىمەن سالىستىردىق. ناتيجەسىندە ءبىر ازامات انىقتالدى. قازىر ونىڭ جاسى 55-تە», دەدى دەپارتامەنت باسشىسى.
كۇدىكتى قىلمىسىن مويىنداعان. ول قازىرگى ۋاقىتتا كولونيادا جازاسىن وتەپ جاتىر. ستيحەەۆتىڭ ايتۋىنشا, ءتيىستى ساقتاۋ رەجيمدەرى ساقتالسا, دالەلدەمەلىك ماتەريالدار 20–30 جىلدان كەيىن دە زەرتتەۋگە جارامدى بولادى. ول ءۇشىن تەمپەراتۋرا مەن ىلعالدىلىقتى باقىلايتىن ارنايى ساقتاۋ كامەرالارى قولدانىلادى.
بيىل كريميناليستەر 8 مىڭنان استام قىلمىستى اشقان.
قاراعاندى وبلىسى