كوزدەن كەتكەنىمەن, كوڭىلدەن وشپەيتىن, ەسىمى ەل ەسىندە جاتتالعان جاننىڭ ءبىرى – تابىلدى دوسىموۆ. تاۋداي تۇلعالى تالانت ورىندايتىن اندەرىنىڭ ءسوزىن دە, مۋزىكاسىن دا ءوزى جازدى. قازىر كىندىك كەسكەن, وسكەن, وركەن جايعان مەكەنى – يندەربور كەنتىندە ەڭسەلى ەسكەرتكىشى تۇر (اۆتورى باقىتبەك مۇحامەتجان).
التى ىشەكتى گيتارا ۇنىنەن ءيىرىمى بولەك اۋەن ىزدەدى. ءبىر اۋەنى وزگەسىندە قايتالانبايتىن بىرنەشە ءان شىعاردى. كوبىنىڭ ءماتىنى وزىنىكى بولعانىمەن, مۇقاعالي ماقاتاەۆ, فاريزا وڭعارسىنوۆا, ەسەنعالي راۋشانوۆ, سۆەتقالي نۇرجانوۆ جانە وزگە دە بىرەگەي اقىنداردىڭ ولەڭدەرىنە ءان شىعاردى. ەل ىشىنە كەڭ تارالعان سونداي تۋىندىسىنىڭ ءبىرى – «سايگ ۇلىك». ءسوزىن ماڭعىستاۋلىق اقىن, مەملەكەتتىك سىيلىقتىڭ لاۋرەاتى سۆەتقالي نۇرجانوۆ جازعان. قازىر ءجيى ورىندالاتىن انگە اينالدى.
ەلىمىزدىڭ ءار وڭىرىندە تابىلدى دوسىموۆتىڭ رۋحتى ءارى ليريكالىق اندەرىن ورىنداپ جۇرگەن ونەرپازدار شوعىرى بار. ال يندەر اۋدانىندا باردتىڭ شىعارمالارىن گيتارامەن ورىندايتىندار تىپتەن كوپ. ونەر ساپارىندا وزگەشە ورنەك قالدىرعان سان قىرلى تالانتتىڭ 60 جىلدىعىنا وراي يندەربور كەنتىندەگى ساياباققا 60 ونەرپاز جينالدى. ءبارى دە وسى اۋداندا تۇرادى. ولاردىڭ اراسىندا جاسامىس تا, بوزبالا مەن ءجاسوسپىرىم دە, انا مەن بويجەتكەن دە بار.
ءبىر ەرەكشەلىگى, 60 ونەرپازدىڭ ءبارى دە تابىلدىشا گيتارا شەرتتى. ولار ساياباقتاعى بارد ەسكەرتكىشى جانىندا «سايگ ۇلىك» ءانىن بىرگە شىرقادى. تابىلدى دوسىموۆتىڭ كوزىن كورگەندەر ونىڭ ءومىر جولى مەن شىعارماشىلىعى جونىندە اسەرلى ەستەلىك ايتتى. «اندەرىن شىرقايتىن ءىزباسارلارى بار دا, بارد تابىلدى دوسىموۆتىڭ اتى دا, شىعارماشىلىق مۇراسى دا جاڭعىرا بەرەدى», دەيدى تاۋىربەك بوزەكەنوۆ.
اتىراۋ وبلىسى