سىرتقى ىستەر مينيسترلىگىنىڭ رەسمي وكىلى ايبەك سمادياروۆ بريفينگ بارىسىندا قىزمەتىنەن كەتكەنىن مالىمدەدى. قىزمەتىنەن كەتۋ سەبەبىن ايتقان جوق, دەپ حابارلايدى Egemen.kz.
«بۇل اياق استىنان قابىلدانعان شەشىم ەمەس, بۇل – مەنىڭ جەكە شەشىمىم. سەگىز جىل بويى وسى مىنبەردەن اقپارات بەرىپ كەلەمىن… ءبىز ءبىر كوماندا بولىپ, قىستا دا, جازدا دا, ىستىقتا دا, سۋىقتا دا بىرگە جۇمىس ىستەدىك. وسى جىلدار ىشىندە ەلىمىز سىرتقى ساياساتتا كوپتەگەن كەزەڭدەردەن ءوتتى, تالاي ماسەلە بولدى. ال قازاقستان تۋرالى بۇكىل الەمنىڭ حاباردار بولۋى – سىزدەردىڭ ەڭبەكتەرىڭىزدىڭ ارقاسى», دەدى ا.سمادياروۆ بريفينگتە.
ول سونداي-اق جۋرناليستەرگە جەكەمەنشىك كومپانياعا جۇمىسقا اۋىساتىنىن ايتتى.
سمادياروۆ ءسىم ءباسپاسوز حاتشىسى قىزمەتىنە 2018 جىلى تاعايىندالدى, ءبىر جىلدان كەيىن حالىقارالىق اقپارات كوميتەتى توراعاسىنىڭ ورىنباسارى بولدى, ال 2023 جىلدىڭ ماۋسىمىنان بەرى ءسىم كوممۋنيكاتسيالار دەپارتامەنتىنىڭ ديرەكتورى قىزمەتىن اتقاردى.
2025 جىلعى اقپاننان باستاپ ول حالىقارالىق اقپارات كوميتەتىنىڭ توراعاسى جانە سىرتقى ساياسي ۆەدومستۆونىڭ رەسمي وكىلى قىزمەتىن اتقارعان.
بۇعان دەيىن ول ءسىم جۇيەسىندە ون جىلدان استام جۇمىس ىستەدى, ونىڭ ىشىندە قازاقستاننىڭ ۆەنگريا مەن ۆەتنامداعى ەلشىلىكتەرىندە قىزمەت اتقارعان. II ساناتتاعى كەڭەسشى ديپلوماتيالىق دارەجەسى بار.
ايبەك سمادياروۆ 1983 جىلدىڭ 7 شىلدەسىندە (42 جاستا) الماتى قالاسىندا دۇنيەگە كەلگەن. ابىلاي حان اتىنداعى قازحقجاتۋ-ءدى «قۇجاتتانۋشى/حالىقارالىق قاتىناستار» ماماندىعى بويىنشا تامامداعان, قازاقستان مەن تۇركيا ءسىم-دەرىنىڭ بىلىكتىلىكتى ارتتىرۋ كۋرستارىنان وتكەن. قازاق, ورىس, اعىلشىن جانە تۇرىك تىلدەرىن جەتىك مەڭگەرگەن.
قىزمەتتىك جىلدارى ىشىندە ول «ديپلوماتيالىق قىزمەتكە 25 جىل», «ديپلوماتيالىق قىزمەتكە 30 جىل» مەدالدارىمەن, سونداي-اق «جىلدىڭ ۇزدىك ءباسپاسوز حاتشىسى» جانە «مەملەكەتتىك ورگاندار اراسىنداعى ۇزدىك ءباسپاسوز قىزمەتى» (2022, 2023) توسبەلگىلەرىمەن ماراپاتتالعان.