قوعامدا ءاربىر جاستىڭ الەۋەتىن اشىپ, ولاردىڭ شىعارماشىلىعىن شىڭداۋ مەملەكەتتىك جاستار ساياساتىنىڭ باسىم باعىتتارىنىڭ ءبىرى. وسى ورايدا, الماتى وبلىسى جاستار رەسۋرستىق ورتالىعىنىڭ باستاماسىمەن ەرەكشە قاجەتتىلىگى بار جاستارعا ارنالعان «Samga» وبلىستىق ونەر بايقاۋى ۇيىمداستىرىلدى, دەپ حابارلايدى Egemen.kz.
اتالعان جوبا شىعارماشىلىققا قۇشتار, مۇمكىندىگى شەكتەۋلى بولسا دا ارمانى شەكسىز جاستاردىڭ باسىن قوسىپ, ولاردىڭ ونەرىن كوپشىلىككە تانىتۋعا مۇمكىندىك بەرگەن بىرەگەي الاڭ بولدى. بايقاۋدىڭ باستى ماقساتى ەرەكشە جاستاردىڭ شىعارماشىلىق الەۋەتىن اشۋ, جاڭا مۇمكىندىكتەر بەرۋ جانە بەلسەندى بولۋعا دەگەن ۇمتىلىسىن قولداۋ.
العاش رەت وتكىزىلگەن بايقاۋ ەكى كەزەڭ بويىنشا ءوتتى: قولونەر جانە ساحنالىق ونەر. وبلىستىڭ ءار اۋدانىنان جينالعان 12 كوماندا ءوز ونەرلەرىن ورتاعا سالىپ, كورەرمەننىڭ ىستىق ىقىلاسىنا بولەندى. قاتىسۋشىلار قولدان جاساعان بۇيىمدار, ۇلتتىق ناقىشتاعى كادەسىيلار, ءان, بي جانە تەاترلانعان كورىنىستەر ارقىلى وزدەرىنىڭ شەكسىز تالانتى مەن تاباندىلىعىن دالەلدەدى.
شارا سوڭىندا قاتىسۋشىلار مەن كورەرمەندەردىڭ كوڭىلى تولقىپ, كوزدەرىندە قۋانىش پەن العىس ۇشقىنى بايقالدى. ۇيىمداستىرۋشىلاردىڭ ايتۋىنشا, بۇل بايقاۋ جىل سايىن تۇراقتى تۇردە وتكىزىلىپ, قامتىلاتىن جاستار اۋقىمىن كەڭەيتۋدى جوسپارلاپ وتىر.
جەڭىمپازدارعا قارجىلاي سىيلىقتار مەن ەستەلىك ماراپاتتار, ال بارلىق قاتىسۋشىلارعا ىنتالاندىرۋ سەرتيفيكاتتارى تابىستالدى.
بايقاۋ قورىتىندىسى بويىنشا كوماندالىق ەسەپتە I ورىندى – جامبىل اۋدانىنىڭ «Rakhym» توبى يەلەندى, II ورىن – الاتاۋ قالاسىنىڭ «الاتاۋ گۇلدەرى» توبىنا بۇيىردى, III ورىندى – قوناەۆ قالاسىنىڭ «قامقور جۇرەك» توبى ەنشىلەدى.
«Samga» - تەك ونەر سايىسى ەمەس, بۇل ومىرگە دەگەن قۇلشىنىستى, ارمانعا دەگەن سەنىمدى ۇلىقتاعان جوبا. ەرەكشە جاستارعا سەنىم سىيلاپ, قوعاممەن بىتە قايناسىپ ءومىر سۇرۋىنە جاعداي جاساۋ بارشامىزدىڭ ورتاق مىندەتىمىز.
الماتى وبلىسى.