دامىعان ەلدەردە مۇگەدەكتىگى بار ادامداردىڭ ءوزى قالاعان جەرگە ەمىن-ەركىن, ەش كەدەرگىسىز بارىپ-كەلۋىنە جاعداي جاسالعان. ولاردى الەۋمەتتىك تۇرعىدان قولداۋ ماسەلەسى بىزدە دە مەملەكەتتىك ساياساتتىڭ نەگىزگى باعىتتارىنىڭ ءبىرى. كەيىنگى جىلدارى ەڭبەك جانە حالىقتى الەۋمەتتىك قورعاۋ مينيسترلىگى باستاماشى بولىپ, ينۆاتاكسي قىزمەتىنە وزگەرىستەر ەنىپ جاتىر.
مەملەكەتتىڭ, جالپى قوعامنىڭ ورتاق ماقساتى – مۇگەدەكتىگى بار ادامداردى مۇسىركەمەي, الالاماي, قوعامعا بەيىمدەۋ. ياعني ولاردىڭ ءومىر ءسۇرۋ ساپاسىن ارتتىرىپ, قوعامدا جالعىز, جات سەزىنبەۋىنە ىقپال ەتۋ. ءبىز ايتقالى وتىرعان ينۆاتاكسي قىزمەتىندەگى وزگەرىستەر مۇگەدەكتىگى بار ادامداردى قولداۋعا باعىتتالعان ۇلكەن جۇمىستىڭ ءبىر تارماعى عانا.
بيىل ەرەكشە قاجەتتىلىكتەرى بار ادامدارعا ينۆاتاكسي قىزمەتىن كورسەتۋ كەزىندە تاكسي اگرەگاتورلارىن پايدالانۋ جونىندەگى قاناتقاقتى جوبا باستالعان-دى. سونىڭ شەڭبەرىندە استانا, الماتى قالالارىندا 443,9 مىڭ قىزمەت كورسەتىلگەن. ياعني ەكى ءىرى قالادا وسىنشا ادام ينۆاتاكسي قىزمەتىن پايدالانعان. بىلتىر مۇگەدەكتىگى بار ادامدارعا ينۆاتاكسي قىزمەتى 207,2 مىڭ رەت كورسەتىلگەن.
ەنگىزىلگەلى وتىرعان وزگەرىستەگى باستى شارت ساپارلاردىڭ اقىسىنان پايىزدىڭ بولماۋى, ولار ادەتتە اگرەگاتور پلاتفورمالارىنىڭ پايداسىنا اۋدارىلاتىن. ياندەكس كومپانياسى قاناتقاقتى جوباعا وتەۋسىز نەگىزدە قاتىسۋعا نيەت بىلدىرگەن. جوبا شەڭبەرىندە ازاماتتار ياندەكس Go ءموبيلدى قوسىمشاسى ارقىلى ينۆاتاكسي قىزمەتىن قولدانا الادى. بۇل قىزمەتتى الۋشىعا كولىكتى تەزىرەك تاڭداۋعا, ونلاين رەجىمدە تاپسىرىس مارتەبەسىن قاداعالاۋعا, جاسالعان ساپارلارعا مونيتورينگ جاساۋعا مۇمكىندىك بەرەدى. قوسىمشادا مۇگەدەكتىگى بار ادامداردىڭ جۇرگىزۋشىگە ساپارداعى ەرەكشە قاجەتتىلىكتەرى تۋرالى ەسكەرتەتىن ارنايى مۇمكىندىكتەر ەكرانى ىسكە قوسىلدى. ءوز كەزەگىندە جۇرگىزۋشىلەر جولاۋشىنى كولىككە وتىرعىزۋ, ودان تۇسەردە قالاي كومەك كورسەتۋگە بولاتىنى سەكىلدى ارنايى نۇسقاۋلار الادى.
ەڭبەك جانە حالىقتى الەۋمەتتىك قورعاۋ مينيسترلىگى اكىمدىكتەرمەن بىرلەسىپ ينۆاتاكسي قىزمەتىنە تاعى ءبىر وزگەرتۋ ەنگىزۋ تۋرالى شەشىم قابىلدادى. ەندى ازاماتتار ينۆاتاكسي قىزمەتىن الاردان ءبىر كۇن بۇرىن سمارتفون ارقىلى جازىلۋى قاجەت. ساپاردى الدىن الا جوسپارلاۋ دەگەنگە كوپشىلىك قىرىن قاراۋى مۇمكىن. بىراق كوپ قالادا ينۆاتاكسي قىزمەتتەرىن ۇسىناتىن كولىك قۇرالدارىنىڭ تاپشىلىعى بار ەكەنىن ەسكەرگەن دۇرىس. وسى تۇرعىدان العاندا ساپاردى الدىن الا جوسپارلاۋ جۇرگىزۋشىگە دە, جولاۋشىعا دا ءتيىمدى.
ينۆاتاكسي شاقىراردا جەدەلدىك پەن ساپاعا كەپىل بولاتىن جوبانى الداعى ۋاقىتتا استانا, الماتى قالالارىمەن قاتار, ەلىمىزدىڭ باسقا وڭىرىنە دە تاراتۋ جوسپارلانىپ وتىر.