ادام كوڭىلىندەگى داق تۇسپەگەن, كىرلەمەگەن كىرشىكسىز سەزىمنىڭ ورنى قاي كەزدە دە بولەك ەكەنىنە ەشكىم تالاسا قويماس. ق ۇلىنداي قۇلدىراڭداپ شاپقىلاپ جۇرگەن ۋاقىتتا اعاعا دەگەن قۇرمەتتى اڭعارا بەرمەيتىنىمىز اقيقات قوي. سامايىن اق قىراۋ شالعان كەزدە عانا الاتاۋداي بيىك اعالاردىڭ قادىر-قاسيەتىن ءبىلىپ, كىسىلىك كەلبەتىن تۇسىنەمىز. بالكىم, جولى بولەك, ءجونى ەرەك سول اعالاردىڭ بويىنداعى بەكزاتتىقتى, ادامي قاسيەتتەردى باعالاۋعا زىمىرانداي زۋلاعان جىلدار جىلىستاپ ءوتۋى قاجەت بولار. كىم ءبىلسىن؟
كوڭىلگە قونىمدى ادەمى اۋەننىڭ بويىنان پوەتيكالىق سارىندى بايقاعانىمىزدا جۇرەگىمىز اتقاقتاپ, بويىمىزدى بەيمالىم ءبىر سەزىمنىڭ بيلەيتىنى بار. ءان ماتىنىندەگى شىمىر شۋماقتار, توسىن تەڭەۋلەر تىڭدارمان بىتكەننىڭ جانىن تەبىرەنتپەي قويماسا كەرەك. ءسوزدىڭ قۇدىرەتى دەگەنىمىز دە سول بولار, بالكىم. جازدىڭ جىلى جاڭبىرىنداي تۇلا بويىڭدى ەرىتەتىن, ەلىتەتىن, تولعاندىراتىن, ويلاندىراتىن مەلوديا قاي كەزدە دە سەنىڭ جۇرەگىڭدەگى سەزىم شىرپىسىن تۇتاتىپ تۇراتىن سەكىلدى.
جۇرەككە جىلى تيەتىن تالاي انىمەن اتىراۋ مەن التاي اراسىنداعى تىڭدارماننىڭ تالعامىن تاپ باسقان عازيزحان شەكەربەكتىڭ «اعا» شىعارماسى دا كوڭىل تولقىنىن ءارلى-بەرلى تەربەيتىنى راس. ماتىندەگى سوزدەر سازبەن ۇيلەسىم تاپقاندىقتان بولار, ءانشىنىڭ مايداقوڭىر ءۇنى ءون بويىڭدى كوكتەم تاڭىنىڭ سالقىن سامالىنداي ايمالاي تۇسەدى. جابىققان كوڭىلىڭدى جادىراتادى. اعالاردىڭ القاۋىندا بولعان عاجاپ ساتتەردى شاعىن ەپيزود سەكىلدى ەسكە تۇسىرەدى.
«ساعان مەنىڭ كوزىممەنەن قاراسا,
سوزىممەنەن المايدى ەشكىم تالاسا.
سەن بيىكسىڭ. اعا, سەنىڭ قاسىڭدا,
الاتاۋ دا, قاراتاۋ دا الاسا», دەپ باستالاتىن عاجاپ شىعارمانىڭ العاشقى شۋماعىنىڭ ءوزى كىسى بالاسىن تەرەڭ ويدىڭ تۇڭعيىعىنا تارتا تۇسەتىنى انىق.
راسىندا بولمىسى مەن كىسىلىگى قاتار ۇيلەسكەن قانشاما بەكزات اعامىزدان بەس كۇن جالعاننىڭ بەل ورتاسىندا ايىرىلىپ قالدىق دەسەڭىزشى. ولاردىڭ جارقىن بەينەسى جادىمىزدا جاڭعىرىپ تۇرعانىمەن, ءتۇرلى ويدىڭ تۇبىنە تۇسەتىنىمىز تاعى بەلگىلى. شىنتۋايتىنا كەلسەك, بارىندا باعالاي الدىق پا, باعالاي المادىق پا؟ وسى ءبىر وي سانامىزدى ءجيى-ءجيى سىلكىپ الادى. سودان دا بولار, كەيدە وزەگىمىزدى وكىنىشتىڭ جالىنى قارىپ وتكەندەي بولادى...
«ماعان سەندەي ەشكىم قۇشاق اشپايدى,
كۇننىڭ ءوزى سەندەي نۇرىن شاشپايدى.
كەرەك دەسەڭ, اعا, سەنىڭ قاسىڭدا,
ءتورت مۇحيت تا توبىعىڭنان اسپايدى», دەپ كەلەتىن ەكىنشى شۋماقتاعى توسىن تەڭەۋلەر دە تولعاندىرماي قويمايدى. تاعى دا وتكەن شاققا قارايلاپ, جوعالعان جىلدار تىزبەگىندەگى ءتاتتى شاقتاردى كەرى قايتارعىڭ كەلەدى. امال نەشىك, ول كوكتەم راسىندا ورالمايدى عوي.
بۇل شىعارما ادام جانىنا تەرەڭدەپ ەنەتىنى بار. بالكىم ء«تورت مۇحيت تا توبىعىڭنان اسپايدى» دەگەن تەڭەۋدەن الدەكىمدەر اسىرا سىلتەۋشىلىك, جالعان پافوستى دەپ پايىمدايتىن بولار. ياعني گيپەربولانىڭ ۇشقىنىن دا اڭعاراتىن شىعار. كىم ءبىلسىن. ايتسە دە, ءاننىڭ باياۋ ىرعاعى مۇنىڭ ءبارىن ەكىنشى پلانعا ىسىرىپ, تۋىندىنىڭ تابيعاتىنا تەرەڭدەتە تۇسەدى.
«وسى كۇنىم تاتيتىنداي عاسىرعا,
ابىرويىڭ اسۋدا.
مەن ءوزىمدى حان ۇلىنداي سەزىنەم,
اعا, سەنىڭ قاسىڭدا.
ءىنى بولعان اعا سەندەي اسىلعا,
باق بار ەكەن باسىمدا.
ەشكىم مەنىڭ جىرتا المايدى جاعامدى,
سەن تۇرعاندا قاسىمدا», دەپ كەلەتىن ءاننىڭ قايىرماسى دا ارداق تۇتقان اعالارىمىزدىڭ بولمىسىن بيىكتەتىپ تۇرعانى داۋسىز.
جالپى العاندا, عازيزحان شەكەربەكتىڭ كەز كەلگەن تۋىندىسى ادام جانىن تەبىرەنتپەي قويمايدى. بۇل انىندە دە ول اسىل اعاعا دەگەن ءبارىمىزدىڭ قۇرمەتىمىزدى ءان تىلىندە سويلەتىپ, كوكەيىمىزدە جۇرگەن تالاي ويدى ورنىمەن جەتكىزە بىلگەن.
«ۇقساسا دەپ ءسوزىم سەنىڭ سوزىڭە,
ۇقساسا دەپ كوزىم وتكىر كوزىڭە.
كىمگە ەلىكتەپ ءوستىڭ, اعا, بىلمەيمىن.
مەن ەلىكتەپ ءوستىم, اعا, وزىڭە», دەپ تۇيىندەلەتىن مىنا ءبىر شۋماق بەيكۇنا پەرىشتە كۇندەردى, بالالىق شاقتى اينا-قاتەسىز ەسكە تۇسىرەدى. جانارىندا وت ويناعان, رۋحى ءور, ءتانى بەكەم اعالارىمىزدىڭ ءاربىر ارەكەتىنە ەلىكتەگەن كەزىمىز جەتەرلىك قوي. ەندى ول كۇن دە سارقىلماس ساعىنىشقا اينالىپ كەتكەنى راس.
قالاي دەسەك تە, عازيزحان شەكەربەكتىڭ «اعا» انىندە الاتاۋداي بيىك اعالارعا دەگەن شەكسىز قۇرمەت كورىنىس تاۋىپ تۇرعانى داۋسىز. ءاننىڭ ماتىنىندە ءمان دە, مەلوديا دا بار. تاماشا تۋىندى سونىسىمەن دە تىڭدارمان جۇرەگىندە, كوڭىلىندە ماڭگى ساقتالاتىنىنا ەشكىمنىڭ كۇمانى جوق دەپ ويلايمىز.