تاعدىردىڭ سالعان ىسىنە قايىسپاي قارسى تۇرۋ – قاجىر-قايراتى كەمەل ادامداردىڭ عانا ماڭدايىنا جازىلعان سىباعا. كاتەپتى قارا نار عانا كوتەرەتىن ءزىلماۋىر جۇكتى ارقالاي ءجۇرىپ كەلەشەكتىڭ كوكجيەگىنە سىعالاعان ۇلبىرەگەن ءۇمىت ساۋلەسى جان جۇرەكتەرىن جىلىتىپ, ون ەكى مۇشەسىنە سارقىلىپ بىتپەس كۇش-قۋات قۇياتىنداي.
ەكاتەرينا رەۆەنىڭ دە تارتقان تاۋقىمەتى از ەمەس. اۋەل باستا ءبارى رەت-رەتىمەن كەلە جاتىر ەدى. جۇرەك قالاۋىمەن تاڭداعان ماماندىعى – دەنساۋلىق ساقتاۋ سالاسى. 2019 جىلى كوكشەتاۋ مەديتسينا كوللەدجىن ءتامامداپ, ۇلكەن ومىرگە جولداما الدى. بىردەن جارقايىڭ اۋداندىق اۋرۋحاناسىنا ورنالاسقان. كوكىرەگىندەگى كورىكتى ارمانعا قولى جەتكەندەي, ماقسات-مۇراتى ورىندالعانداي. ەندىگىسى شاكىرت كەزىنەن اڭساعان ومىردەگى تەمىرقازىق نىساناسى ءتارىزدى حالىققا ادال قىزمەت ەتۋ. بىراق ومىردە بارلىعى ءوزىڭ ويلاعانداي بولمايدى ەكەن. ىلكىدەگى دارقان دالانىڭ دانالىعىن بويىنا جيناعان اقىلمان قاريالار ماڭدايعا جازىلعانى دەۋشى ەدى. تۇپ-تۋرا سولاي بولىپ شىقتى. ويلاماعان جەردەن مەرتىگىپ قالعانى. العاشقى كۇندەرى سالى سۋعا كەتتى. ون ەكىدە ءبىر گ ۇلى اشىلماي جاتىپ توسەك تارتىپ جاتۋ, كىسىگە كۇنى ءتۇسۋ قانداي ايانىشتى. نەشە جەردەن قايراتتى بولساڭ دا جىگەرىڭ جاسيتىندىعى ءسوزسىز. بۇرىنعىلاردىڭ الدىم قاراڭعى دەيتىنى وسى ەكەن دە... ەرتەڭگى كۇننىڭ قانداي سىي دايىنداپ تۇرعاندىعىن بولجاپ بىلگەن كىم بار. ازاپپەن ەكى جىل ءوتتى. كۇندەردىڭ ءبىر كۇنىندە بوركەمىكتەنە بەرۋگە بولمايتىندىعىن تۇيسىنگەن. ءوزى بار كۇش-جىگەرىن جيناپ, تاس-ءتۇيىن بەكىنىپ العا ۇمتىلماسا, تۇڭعيىقتان سۋىرىپ الىپ شىعار قۇدىرەت جوق. شىنىندا دا سولاي بولىپ شىقتى. سەنىم قولتىعىنان دەمەگەن قوس پەرىشتە ءتارىزدى العا جەتەلەدى.
جانىنا سەرىك ەتكەنى, كوڭىلىنە مەدەۋ بولعانى – سپورت. 2011 جىلى مۇمكىندىگى شەكتەۋلى جاندارعا ارنالعان «مەرگەن» سپورت كلۋبى شاقىرعان. اۋەلى جەڭىل اتلەتيكادان باستادى. ءۇمىت وتى لاۋلاي ءتۇستى. ءوزىنىڭ دە قولىنان ءىس كەلەرىنە كامىل سەندى. سول جىلى يادرو يتەرۋدەن رەسپۋبليكالىق جارىسقا قاتىسقان. وبلىستىڭ اتىنان. جەرلەستەرىن ۇياتقا قالدىرمادى. جۇلدەگەر اتاندى. بۇل تابىسى قارشاداي قىزدى تىپتەن قاناتتاندىرا ءتۇستى. سپورتپەن شىنداپ شۇعىلدانساڭ تابىس اتتى بيىكتىك ءوز-وزىنەن جونىن توسا بەرەدى ەكەن. 100, 200 مەتر قاشىقتىقتا اربامەن جارىسۋدا وبلىس چەمپيونى اتاندى. 2022 جىلى يادرو يتەرۋدەن ەل چەمپيونى بولدى. 2023 جىلى رەسپۋبليكالىق VI پاراليمپيادالىق جارىستا توپ جاردى. تۇلا بويىندا شيىرشىق اتقان كۇش-قۋات پايدا بولعالى جارىس اتاۋلىدان جۇلدەسىز قالعان جەرى جوق.
ەڭ باستى جەڭىسى – ماماندىعىنا, 2022 جىلى العاشقى ەڭبەك جولىن باستاعان اۋرۋحاناعا قايتا ورالدى. ارىپتەستەرى ارقا-جارقا. ەكاتەرينانىڭ بويىنداعى كەز كەلگەن ادامنىڭ كوكىرەگىندە پايدا بولا بەرمەيتىن كۇش-قۋاتقا قايران قالىسقان. وزدەرىمەن بىرگە وسىنداي قاراپايىم, ۇلى ومىرگە شەكسىز عاشىق سپورتشى قىزدىڭ جۇمىس ىستەيتىندىگىن ماقتانىش ەتكەن. شىنىندا دا, تۇڭعيىقتان شىعا بىلگەن ەرلىگى كوپكە ونەگە. شاعىن اۋدانداعى حالىق تا وسى ءبىر جۇلدىزى جارقىراپ جۇرگەن, تاعدىرمەن تايتالاسقان ساتتە جىگەرى جاسىماعان ەكاتەرينا پەتروۆنانىڭ باسىنان وتكەن سىناقتى جاقسى بىلەتىن. ءاردايىم جىلى ۇشىراپ, ك ۇلىمدەپ قارسى الاتىن مەدبيكەنىڭ قاتارعا قوسىلعانىنا ولار دا بىرگە قۋانعان.
«باسىندا قولىمنان كەلەر مە ەكەن دەگەن كۇدىگىم دە بولدى, – دەيدى ەكاتەرينا پەتروۆنا. – ايتسە دە, شىن جىلاسا, سوقىر كوزدەن جاس شىعادى دەگەندەي, ادامنىڭ جەڭبەيتىن قيىندىعى بولمايدى ەكەن. ەڭ باستىسى, جالاۋلى جاسىل دۇنيەدە جاقسىلىق جامىراي جاۋاتىن كۇننەن كۇدەر ۇزبەۋ».
ايتقانى – اقيقات. ونى جاي عانا ءسوز ەمەس, ىسىمەن دالەلدەپ وتىر.
اقمولا وبلىسى,
جارقايىڭ اۋدانى