تولىق تاۋەلسىزدىك الىپ, ەگەمەن ەلدىك سيپاتىمەن بارلىق ماسەلەسىن ەشكىمگە جالتاقتاماي دەربەس شەشۋگە قول جەتكىزۋ ءار حالىقتىڭ دا ارمان-اڭسارى بولسا كەرەك. بىراق ازاتتىققا اپارار جولدىڭ ازابى دا مول ەكەنى بارشامىزعا بەلگىلى.
...1986 جىلدىڭ جەلتوقسان ايى. كەڭەس وكىمەتىنىڭ كۇشىنە ءمىنىپ تۇرعان كەزى. ماسكەۋدەن باسقارىلاتىن توتاليتارلىق تۇرعىداعى ءامىرشىل-اكىمشىل جۇيە قازاقستان كومپارتياسى ورتالىق كوميتەتىنىڭ پلەنۋمىندا رەسپۋبليكا باسشىلىعىن اۋىستىرۋدى ويلادى, ءسويتىپ, ءبارى دە بار بولعانى ون-ون بەس مينۋتتا شەشىلىپ, قازاق حالقىنىڭ ماڭدايىنا بىتكەن الىپ تۇلعا دىنمۇحامەد قوناەۆتى ورنىنان الدى. ونىڭ ورنىنا رەسەيدەن اكەلىنگەن ەشكىمگە بەلگىسىز گەننادي كولبيندى ءبىرىنشى حاتشىلىققا سايلاپ, ۇلتىمىزدىڭ نامىسىنا ءتيدى...
بارلىعى وسىدان باستالدى دا, وتانشىل, ۇلتشىل قازاق جاستارى باتىلدىقپەن باس كوتەرىپ, بۇكىل الەمدى «شۋلاتتى». نەگىزىندە بۇل بەرگى جاعىندا جاتقان سەبەپ ەدى. ال ارعى جاعىندا بوداندىقتان بوستاندىققا ۇمتىلعان جالىن جۇرەك جاستارىمىزدىڭ بولاتتاي سۋارىلعان ارمان-مۇددەسى جاتقان بولاتىن. وسىلايشا, ولار دۇنيەجۇزى دەمەي-اق قويايىق, بىراق, كەڭەس وداعى كەڭىستىگىندەگى دەموكراتيالىق ءدۇمپۋدىڭ العاشقى «جارىلىسىن» جاساپ, ارقىراپ تەڭدىك سۇراپ الاڭعا اتويلاپ شىقتى.
ءيا, وسى جەردەن تىزگىن تارتىپ, ەندى مىنا سۋرەتتىڭ جاي-جاپسارىنا كەلەيىك.
«1992 جىلدىڭ ءساۋىر ايى ەدى, – دەيدى بەلگىلى جازۋشى-كوسەمسوزشى, باسپاگەر تالعات ايتباي ۇلى. – ديماش احمەت ۇلىنىڭ ۇيىنە ارنايى باردىق. قاسىمدا – زاڭگەر تويبولدى زەينابىلوۆ, قولىمىزدا – جاڭا عانا باسىلىپ شىققان «الماتى. 1986 جىل. جەلتوقسان» اتتى جيناق (قازاقشا, ورىسشا), ماقساتىمىز – وسى ايعاققا تولى ماڭىزدى كىتاپتى ديماش اعانىڭ قولىنا قۇرمەتپەن تاپسىرۋ. اتاپ ايتارىم, ەكەۋمىز بۇل مىندەتتى سول جولى ساتىمەنەن وڭتايلى ورىندادىق».
بۇل تۇستا ەسكەرتە كەتسەك, تالعات مۇنداي يگى ءىستى جاقسى جالعاستىرىپ, بۇگىنگە دەيىن وسى سەريامەن 12 كىتاپ شىعارىپ, ەرلىك دەۋگە كەلەرلىكتەي ەڭبەك ەتتى.
سۋرەتتە: تومەنگى قاتاردا سول جاقتان تويبولدى زەينابىلوۆ, تالعات ايتباي, كوزىلدىرىكتى كىسى تۇركيادان كەلگەن كاسىپكەر. جوعارعى جاقتا سولدان وڭعا قاراي قازاقستان ءدىني باسقارماسى توراعاسىنىڭ ورىنباسارى اسىلحان (تەگىن بىلمەي وتىرمىز), بەلگىلى ادەبيەتشى عالىم ماردان بايدىلداەۆ, اسىلحاننىڭ جۇرگىزۋشىسى جانە وڭ جاقتا ەڭ شەتكى اكادەميك ەشىمبەت بايباراقوۆ (ارينە, مۇنداي دارەجەگە كەيىن جەتتى عوي). بۇل جەردە بارلىعىنىڭ باسى كەزدەيسوق ءتۇيىسىپ قالعان ەكەن – باسقالار دا حالقىمىزدىڭ قادىرلى پەرزەنتىنە سالەم بەرۋگە بارعان عوي.
ءبىر عاجابى, ءبارىنىڭ دە جۇزدەرىنەن ەرەكشە ءبىر جىلىلىق توگىلىپ تۇر. بۇل جان-جاعىنا جىلى شۋاق شاشقان جاقسى ادامنىڭ قولىن الىپ, اسەرلى اڭگىمەسى مەن ۇلاعاتقا تولى ءسوزىن ۇيىپ تىڭداعاننان كەيىن عانا بولاتىن كەرەمەت ءسات-اۋ.
بەرىكباي قادىقوۆ,
جۋرناليستيكا ارداگەرى
الماتى وبلىسى,
قاراساي اۋدانى