استانانىڭ تۋعان كۇنىمەن ورايلاس كەلدى
6 شىلدەدە ەلىمىزدىڭ اگرارلىق ءبىلىمى مەن عىلىمى, ءوندىرىسىنىڭ دامۋىنا وزىندىك ۇلەس قوسىپ, اۋىل شارۋاشىلىعى ماماندارىن دايارلاۋ ىسىندە كوشباسشى وقۋ ورنى بولىپ سانالاتىن قازاق ۇلتتىق اگرارلىق ۋنيۆەرسيتەتىنىڭ ستاديونىندا بيىلعى ءبىتىرۋشى تۇلەكتەردىڭ سالتاناتتى شەرۋى ءوتتى. ايتۋلى شاراعا ءبىلىم ورداسىنىڭ وقىتۋشىلارى مەن جۇمىس بەرۋشى كاسىپورىن باسشىلارى دا قاتىستى.
قالاي دەسەك تە, بۇل ايتۋلى كۇن بيىلعى ۋنيۆەرسيتەت ءبىتىرىپ, ۇلكەن ومىرگە قانات قاققان تۇلەكتەردىڭ ەسىندە ۇزاق ساقتالارى حاق. ويتكەنى, ول ەكى ايتۋلى داتامەن – ءبىرى بيىل وزدەرى بەس جىل ءبىلىم العان قارا شاڭىراق سەكسەننىڭ سەڭگىرىنە شىقسا, ەكىنشىسى – ەلوردامىز استانا قالاسىنىڭ تۋعان كۇنىمەن ورايلاس كەلىپ وتىر.
– قازاق ۇلتتىق اگرارلىق ۋنيۆەرسيتەتىندە 80 جىل بويى قالىپتاسقان تاماشا اكادەميالىق ءداستۇرلەر بار, – دەدى ءوز سوزىندە ۋنيۆەرسيتەت رەكتورى, ۇعا اكادەميگى تىلەكتەس ەسپولوۆ. – سونىڭ ءبىرى – بۇگىنگى باكالاۆر جانە ماگيستراتۋرا بويىنشا ۋنيۆەرسيتەت بىتىرۋشىلەرگە ديپلوم تاپسىرۋدىڭ سالتاناتتى شاراسى. بۇل شارانىڭ ەلىمىزدىڭ ورداسى, وركەنيەتتىڭ جۇرەگى, تابىس پەن قارقىندى دامۋدىڭ باستى سيمۆولى – استانا قالاسىنىڭ تۋعان كۇنىندە وتكىزىلۋى اگرارلىق سالا ماماندارىنىڭ بولاشاعىنا اقجول تىلەۋدىڭ نىشانى. سەبەبى, استانا تاريحي از ۋاقىتتىڭ ىشىندە حالىقارالىق قاۋىمداستىق تانىعان الەمدەگى ەڭ جاس ەلوردا, سونىمەن قاتار وركەنيەتتى ۇنقاتىسۋدىڭ وزىندىك مودەلى قالىپتاسقان ءور رۋحتى ەلدىڭ قارقىندى دامۋىنىڭ دالەلى بولا ءبىلدى. بۇل – ەلوردانى ارقا توسىنە كوشىرۋدەن باستاپ, ونىڭ ءار عيماراتىنىڭ سالىنۋى مەن ءار كوشەسىنىڭ تارتىلۋىن ءجىتى قاداعالاپ وتىرعان ەلباسى ن.ءا.نازارباەۆتىڭ ۇلان-اسىر جەڭىسى.
ودان ءارى رەكتور اتالمىش وقۋ ورنى ەلىمىزدەگى اگرارلىق سالانىڭ عىلىمي ەليتاسىن قالىپتاستىرىپ وتىرعان بىرەگەي ۋنيۆەرسيتەت ەكەنىن, سەبەبى وندا پروگرەسشىل عىلىمي ينفراقۇرىلىمنىڭ بارلىعىن, سونىمەن قاتار ۇعا-نىڭ اگرارلىق بولىمشەسىنىڭ اتالمىش وقۋ ورنىندا ورنالاسۋى – عالىمدارعا اۋقىمدى عىلىمي-زەرتتەۋ جوبالارىن, زەرتتەۋلەرىن ىسكە اسىرۋعا مۇمكىندىك بەرەتىندىگىن ايتا كەتتى.
ۋنيۆەرسيتەت ءوزىنىڭ 80 جىلدىق تاريحىندا اگرارلىق ءبىلىم مەن عىلىمنىڭ جارقىن ۇلگىسى بولىپ كەلەدى. وعان دالەل 150-گە جۋىق اۆتورلىق وقۋ قۇرالدارى قولدانىستا. بۇگىنگى تاڭدا ۋنيۆەرسيتەت الەمنىڭ 157 مەملەكەتىندەگى وقۋ وردالارىمەن مەموراندۋم نەگىزىندە, 53 حالىقارالىق جوعارى دارەجەلى ۋنيۆەرسيتەتتەرمەن تىكەلەي تاجىريبە الماسۋدى جۇزەگە اسىرىپ كەلەدى. 2001 جىلدان الەمدىك 300 ۇزدىك اگرارلىق ۋنيۆەرسيتەتتى بىرىكتىرەتىن, اگرارلىق جوعارى جانە عىلىمنىڭ جاھاندىق كونسورتسيۋمىنىڭ مۇشەسى. سوڭعى 5 جىل كولەمىندە ۋنيۆەرسيتەتتىڭ 500-گە تارتا ستۋدەنتى مەن جاس عالىمدارى ەليتالى ەۋروپا, اقش ۋنيۆەرسيتەتتەرىندە ءبىلىم الماسۋ باعدارلامالارى اياسىندا شەتەلدىك تاجىريبەدەن ءوتتى.
قازىر وقۋ ورنىندا 7 فاكۋلتەت جۇمىس ىستەيدى. ونىڭ قۇرامىندا 40 كافەدرا بولسا, وندا 600-دەن استام پروفەسسور, عىلىم دوكتورى مەن كانديداتى قىزمەت ەتەدى. جەكەلەگەن كافەدرا وقىتۋشىلارىنىڭ بارلىعى دەرلىك عىلىمي اتاققا يە.
بيىل باكالاۆر بويىنشا 720 ستۋدەنت, ال ماگيستراتۋرا بويىنشا 129 جاس ورەن ءتامامداسا, ولاردىڭ ىشىندە 14 پرەزيدەنتتىك شاكىرتاقى, 70-كە جۋىق ۇزدىك ديپلوم يەگەرى بار. شەرۋدى ۋنيۆەرسيتەتتە تۇڭعىش اشىلعان ۆەتەرينارلىق مەديتسينا جانە بيوتەحنولوگيا فاكۋلتەتىنىڭ تۇلەكتەرى باستاسا, ءبىر اتاپ وتەرلىگى ۆەتەريناريالىق سانيتاريا جانە زووتەحنولوگيا فاكۋلتەتىن ءۇش پرەزيدەنتتىك شاكىرتاقى, 24 ۇزدىك ديپلوم يەگەرى ءبىتىرىپ وتىر.
وقۋ ورنى جۇمىس بەرۋشى مەملەكەتتىك مەكەمە, كورپوراتسيا, ۇلتتىق, ترانسۇلتتىق كومپانيالارمەن ىنتىماقتاستىق مەموراندۋمدارىن قابىلداعان. سالتاناتتى راسىمگە بارلىق ماماندىقتار بويىنشا جۇمىس بەرۋشى كومپانيا وكىلدەرى قاتىستى. ولاردىڭ اتىنان ءسوز العان “قازاقەكسپەرتيزا” اق تەحنيكالىق ەكسپەرتيزا دەپارتامەنتىنىڭ ديرەكتورى شايح ءجۇسىپوۆ ءبىتىرۋشى ءتۇلەكتەردى جۇمىسقا شاقىراتىندىعىن, ال بيىلعى وقۋ بارىسىندا ءتاجىريبە الماسۋ نەگىزىندە 5 ستۋدەنتتى وزدەرىنە جۇمىسقا العاندىعىن اتاپ ءوتتى. سونداي-اق, “وڭتۇستىك” اۋىلشارۋاشىلىق ونىمدەرى كورپوراتسياسى 10 ءبىلىم گرانتىن ءبولىپ, 209 ءبىتىرۋشى ستۋدەنتتى جۇمىسقا شاقىردى. قىزىلشا جانە قانت ءوندىرۋشى اسسوتسياتسياسى عىلىمي جوبالاردى ءجۇزەگە اسىرۋ ماقساتىندا 5 ءبىلىم گرانتىن, 5 اتاۋلى شاكىرتاقى مەن قوسىمشا 13 ملن. تەڭگە قاراجات ءبولىپ, 14 تۇلەكتى جۇمىسقا شاقىردى. ماڭعىستاۋ ايماقتىق باسقارماسىنىڭ اگرووندىرىس كورپوراتسياسىمەن بىرلەسە جۇمىس جاساۋ نەگىزىندە كەلىسىم-شارتقا قول قويىلىپ, اتالعان راسىمدە 50 اتاۋلى ءبىلىم گرانتى ءبولىنىپ, 59 تۇلەكتى ءوزدەرىنە شاقىردى. جالپى, ۋنيۆەرسيتەت بۇگىندە 100 اتاۋلى گرانتى مەن 50 اتاۋلى ءشاكىرتاقى تاعايىنداۋ بويىنشا, 2010 جىلعى 350 تۇلەكتى جۇمىسقا ورنالاستىرۋ كەلىسىم-شارتىن جاساسقان.
سونداي-اق, شاراعا مەدەۋ اۋدانىنىڭ اكىمى م. ءبيدالى ۇلى, “نۇر وتان” حدپ الماتى قالالىق فيليالى توراعاسىنىڭ ورىنباسارى ا.جەلدىباەۆ قاتىسىپ, جاستارعا اق جول تىلەدى.
ديپلوم تاپسىرۋدىڭ سالتاناتتى ءراسىمى استانانىڭ تۋعان كۇنىنە ارنالعان مەرەكەلىك كونتسەرتكە ۇلاستى. ۋنيۆەرسيتەتتىڭ ۇلتتىق كيىم كيگەن 500 ستۋدەنتىنەن قۇرىلعان بيشىلەر توبىنىڭ “قارا جورعاسىمەن” اشىلعان كونتسەرتتىك باعدارلاما كوركەمونەرپاز ستۋدەنتتەر مەن تانىمال ارتىستەردىڭ ونەرلەرىمەن ۇلاسىپ, قوناقتاردىڭ كوڭىلىن قاناتتاندىردى. ال ءبىتىرۋشى ءتۇلەكتەردىڭ ءبىرى ومىرلەرىندەگى قۋانىشتى كۇندە ىزگىلىك تىلەپ, اسپان كوگىنە كوگەرشىن, شار ۇشىرىپ, مەرەكەنى قىزدىرا ءتۇستى.