استاناداعى كۇلاش بايسەيىتوۆا اتىنداعى قازاق ۇلتتىق ونەر ۋنيۆەرسيتەتىنىڭ ۇلكەن زالى ساحناسىندا ءداستۇرلى ءانشى, قازاقستاننىڭ ەڭبەك ەرى, حالىق ءارتىسى, پروفەسسور قايرات بايبوسىنوۆتىڭ 75 جىلدىق مەرەيتويىنا ارنالعان «سىر ساندىق» اتتى سالتاناتتى كەش ءوتتى, دەپ جازادى Egemen.kz.
بۇل كۇن ونەر سۇيەر قاۋىم ءۇشىن ايرىقشا ماڭىزعا يە. ويتكەنى ساحنا تورىندە قايرات اۋكەن ۇلىنىڭ جارقىن شىعارماشىلىق جولىن جالعاعان تالانتتار باس قوسىپ, ۇلتتىق ونەردىڭ جاڭا تىنىسىن, جاڭارعان ءۇنى مەن ماڭگىلىك ءسانىن پاش ەتتى. كەشكە قاتىسۋشىلار ونەر يەسىنىڭ انشىلىك مەكتەبى مەن ۇستازدىق جولىنا دەگەن قۇرمەتىن ونەر ارقىلى ورنەكتەپ, رۋحاني ساباقتاستىقتىڭ ماڭىزىن ايقىن كورسەتتى.
قايرات بايبوسىنوۆ – سيرەك داۋىس يەسى, ۇلتتىق ءان ونەرىندەگى دارا ءستيلدىڭ, شىنايى ساحنالىق مادەنيەتتىڭ, تەرەڭ بولمىستى ورىنداۋشىلىقتىڭ سيمۆولى. ونىڭ ورىنداۋىنداعى «بالقاديشا», «قىزىل اسىق», «اعاش اياق», «تاۋ ىشىندە», «كوك الا تاي» سىندى ءداستۇرلى كلاسسيكالىق تۋىندىلار تالاي بۋىننىڭ جۇرەگىنە جول تاۋىپ, ۇلتتىق مۋزىكاعا دەگەن سۇيىسپەنشىلىگىن وياتتى. ۇستازدىق جولىندا قانشاما شاكىرت تاربيەلەپ, ونەردى كەمەلدەندىرۋگە قوسقان ەڭبەگى دە ۇشان-تەڭىز. بۇگىندە ءانشىنىڭ شاكىرتتەرى ەلدىڭ تۇكپىر-تۇكپىرىندە عانا ەمەس, شەتەل ساحنالارىندا دا قازاق ءان ونەرىن كەڭىنەن ناسيحاتتاپ ءجۇر.
«سىر ساندىق» كەشىنىڭ باعدارلاماسى مازمۇن بايلىعى مەن كوركەمدىك كەلىسىمىنە ساي ەرەكشە دايىندالعان. كۇيشى-كومپوزيتور احات بايبوسىنوۆ ءوز شىعارمالارىمەن كورەرمەنگە قازاق كۇيلەرىنىڭ تەرەڭ فيلوسوفياسىن سەزىندىرسە, ءداستۇرلى مۋزىكالىق ونەر فاكۋلتەتىنىڭ ۇستازدارى مەن ۇلتتىق ونەردىڭ قوڭىر سازىن, نازىك يىرىمدەرىن پاش ەتتى. ستۋدەنتتىك حالىق اسپاپتار وركەسترى (ديريجەرى – داۋرەن عىلىموۆ) وركەسترلىك ورىنداۋدىڭ جاڭا تىنىسىن سەزدىرىپ, دومبىرا مەن قوبىزدىڭ, سىبىزعى مەن شەرتەردىڭ ءۇنىن شەبەر ۇيلەستىردى. ال كۇلاش بايسەيىتوۆا اتىنداعى قازۇوۋ ارالاس حورى (حورمەيستەر – ولگا كرياجەۆسكيح) كەشكە سالتانات بەرىپ, كوپ داۋىستى ورىنداۋدىڭ ۇلتتىق بوياۋىن ءساتتى اشتى. حالىقارالىق بايقاۋلاردىڭ لاۋرەاتى, «ۆوكالدىق ونەر» كافەدراسىنىڭ ماگيسترانتى ايگەرىم تەمىربەكوۆانىڭ ونەرى دە كورەرمەنگە ەرەكشە اسەر سىيلاعانى ءسوزسىز. جاس تالانتتىڭ ورىنداۋىنداعى ۆوكالدىق تۋىندىلار ساحنا كوركىن كەڭەيتىپ, كەشتىڭ ەموتسيالىق تىنىسىن تاماشا تۇيىندەدى.
«سىر ساندىق» – ءداستۇرلى ءانشىنىڭ تەك مەرەيتويلىق كەشى عانا ەمەس, ۇلتتىق ونەردىڭ شەجىرەسىن پاراقتاپ, ءداستۇر ساباقتاستىعىن سەزىندىرگەن, قازاق مۋزىكاسىنىڭ بيىك رۋحىن دارىپتەگەن مادەني وقيعا بولعانى انىق. بۇل كونتسەرت ونەرپازدار مەن كورەرمەن اراسىنداعى رۋحاني بايلانىستى تەرەڭدەتىپ, ونەردىڭ ماڭگىلىك قۇدىرەتىن ايقىنداي ءتۇستى. توقەتەرىن تۇيگەندە, ايتۋلى ءان كەشى قازاقتىڭ ءداستۇرلى ءان ونەرىن جاڭا بيىككە كوتەرگەن, ۇلتتىق ۆوكال مەكتەبىنىڭ قالىپتاسۋىنا ولشەۋسىز ۇلەس قوسقان مايتالمان ونەرپازدىڭ شىعارماشىلىق جولىنا جاسالعان شىنايى تاعزىم بولدى دەسەك, ارتىق ايتقاندىعىمىز ەمەس.