«شەبەر قولدان شىققان تەرمە باۋلار توردە ايقاسىپ, كىرە بەرگەندە كوزىڭە سوعىلادى». ءيا, عابيت مۇسىرەپوۆتىڭ «ۇلپان» شىعارماسىنان الىنعان وسى ءبىر عانا سويلەمدە ون ساۋساعىنان ونەر تامعان حالقىمىزدىڭ ىسمەرلىگى تىلىمىزدەگى سوزدىكتىڭ التىن قورىمەن سيپاتتالادى. وبلىس ورتالىعى كوكشەتاۋ قالاسىندا قولونەر شەبەرلەرىنىڭ بايقاۋى ءوتتى. قازاقستان حالقى اسسامبلەياسىنىڭ 30 جىلدىعىنا وراي ۇيىمداستىرىلعان ءىس-شارادا جيىرماعا تارتا شەبەر باقتارىن سىنادى, دەپ جازادى Egemen.kz.
قاتىسۋشىلار قاراپايىم كارتينادان قازاقتىڭ بەس قارۋىنا دەيىن ءتۇرلى قولونەر بۇيىمدارىن جاساپ اكەلگەن ەكەن. كورمەگە قويىلعان بۇيىمدار قاتارىندا كيىزدەن, تەرىدەن, قىشتان جانە مەتالدار مەن اعاشتان جاسالعان زاتتار ورىن الدى.
«وزىمە ۇنايتىن ءارتۇرلى مەتالدان كوپتەگەن زاتتاردى جاسايمىز. مىسالى, بۇگىنگى قاتىسقان وبلىستىق بايقاۋعا «5 قارۋىمدى» مەتالدان جاساپ اكەلدىم. قارا تەمىردى قىزدىرىپ, سوعىپ, سۋرەتتەرىن بەزەندىرىپ, وسىنداي 5 قارۋ جاسادىم. نايزا, قىلىش, قالقان, ايبالتا, ساراينانى جاسادىم. جالپى, جۇمىسباستى ادام بولعان سوڭ, اسىقپاي كۇندەلىكتى 1-2 ساعات زەيىن قويىپ, كوڭىل ءبولىپ, مۇقيات وسى ءىستى اتقارۋىما شامامەن 6 ايداي ۋاقىتىمدى جۇمسادىم», دەيدى جەڭىمپاز اتانعان شوقان ءۋاليحانوۆ ۋنيۆەرسيتەتىنىڭ ماتەريالداردى كوركەمدەپ وڭدەۋ ءپانىنىڭ وقىتۋشىسى رۇستەم ءشارىپوۆ.
بايقاۋ قورىتىندىسى بويىنشا جەڭىمپازدار باعالى سىيلىقتارمەن ماراپاتتالدى.