مەملەكەت باسشىسى قاسىم-جومارت توقاەۆ ۆاشينگتونعا ساپارمەن باردى. پرەزيدەنتتى اقش مەملەكەتتىك حاتشىسىنىڭ ءبىرىنشى ورىنباسارى كريستوفەر لانداۋ كۇتىپ الدى. سونداي-اق قاسىم-جومارت توقاەۆتى اقش-تا وقيتىن قازاق ستۋدەنتتەرى قارسى الدى. مەملەكەت باسشىسى وتانداستارىمىزبەن از-كەم اڭگىمەلەسىپ, ولارعا تابىس تىلەدى.
دونالد ترامپ اكىمشىلىگىنىڭ وكىلدەرىمەن كەزدەستى
قاسىم-جومارت توقاەۆتىڭ ۆاشينگتونعا ساپارى مەملەكەتتىك حاتشى مارك رۋبيومەن, ساۋدا ءمينيسترى گوۆارد لاتنيكپەن, سونداي-اق اقش پرەزيدەنتىنىڭ وڭتۇستىك جانە ورتالىق ازياداعى ارنايى وكىلى سەردجيو گورمەن كەزدەسۋدەن باستالدى.
باسقوسۋعا قاتىسۋشىلار ەكىجاقتى جانە وڭىرلىك كۇن ءتارتىبىنىڭ باستى اسپەكتىلەرى جونىندە پىكىر الماستى.
مەملەكەت باسشىسى قازاقستان مەن اقش ءۇشىن جاڭا جۇمىس ورىندارىن اشۋعا, ونەركاسىپ پەن بيزنەستى قولداۋعا سەپتىگىن تيگىزەتىن ەكونوميكالىق ىقپالداستىق ارقىلى ستراتەگيالىق سەرىكتەستىكتى ودان ءارى نىعايتۋعا ورايلى مۇمكىندىك تۋعانىن اتاپ ءوتتى.
پرەزيدەنتتىڭ ايتۋىنشا, ەلىمىز اقش-پەن ءتۇرلى دەڭگەيدە بەلسەندى ساياسي بايلانىس ورناتقان ءارى سان قىرلى ىنتىماقتاستىقتى تەرەڭدەتۋ بويىنشا كونسترۋكتيۆتى ديالوگ جۇرگىزۋگە دايىن.
قاسىم-جومارت توقاەۆتىڭ قاتىسۋىمەن قازاقستان رەسپۋبليكاسى مەن امەريكا قۇراما شتاتتارى اراسىندا اسا ماڭىزدى مينەرالدار سالاسى بويىنشا ىنتىماقتاستىق جونىندەگى ءوزارا تۇسىنىستىك تۋرالى مەموراندۋمعا قول قويىلدى. قۇجاتقا قازاقستاننىڭ ونەركاسىپ جانە قۇرىلىس ءمينيسترى ەرسايىن ناعاسپاەۆ پەن اقش ساۋدا ءمينيسترى گوۆارد لاتنيك قول قويدى.
وتاندىق ءىت ستارتاپتار تانىستىرىلدى
قاسىم-جومارت توقاەۆ ۆاشينگتونعا ساپارى اياسىندا حالىقارالىق نارىققا شىققان وتاندىق ءىت ستارتاپتاردىڭ نەگىزىن قالاۋشىلارمەن كەزدەستى.
پرەزيدەنتكە ەلىمىزدىڭ العاشقى ء«سىڭارمۇيىز» ستارتابى – Higgsfield AI جاساندى ينتەللەكتىگە نەگىزدەلگەن كينەماتوگرافيالىق ساپالى بەينەنى گەنەراتسيالاۋعا ارنالعان پلاتفورماسى, Deep Infra – ماشينالىق وقىتۋ مودەلدەرىن ورنالاستىرۋعا ءارى ىسكە قوسۋعا ارنالعان قىزمەت, Valinor – بيوتەحنولوگيا سالاسىنداعى ستارتاپ, ARC Drones – اۆتونومدى درونداردى ازىرلەۋشى, سونداي-اق باسقا دا كەلەشەگى زور جوبالار تانىستىرىلدى.
قاسىم-جومارت توقاەۆقا Silkroad Innovations تەحنولوگيا حابىنىڭ قىزمەتى تۋرالى اقپارات بەرىلدى. ول كرەمني القابىندا ورتالىق ازيا ەلدەرىنىڭ تالانتتى جاستارى مەن ستارتاپتارىنا قولداۋ كورسەتەدى.
كەزدەسۋگە جالپى قۇنى 1,4 ملرد دوللاردى قۇرايتىن 20-دان اسا ستارتاپ وكىلى قاتىستى. بۇل ۇلتتىق ءىت ەكوجۇيەسىنىڭ يننوۆاتسيالىق الەۋەتىن تانىتادى.
مەملەكەت باسشىسى جوعارى تەحنولوگيا سالاسىنداعى وتاندىق كومپانيالاردىڭ جەتىستىكتەرىن جوعارى باعالاپ, الداعى ءۇش جىلدا قازاقستاندى تولىق تسيفرلىق ەلگە اينالدىرۋ جونىندەگى ستراتەگيالىق مىندەتتىڭ ماڭىزىن اتاپ ءوتتى.
– پرەزيدەنت رەتىندە بارشاڭىزدى قولدايمىن. جۇمىستارىڭىز ەلىمىزدىڭ بولاشاعى ءۇشىن وتە قاجەت. تسيفرلاندىرۋ مەن HighTech مەملەكەتىمىزدىڭ باستى باسىمدىقتارىنىڭ ءبىرى سانالادى. مەن بۇل تۋرالى جولداۋىمدا ايتتىم, – دەدى قاسىم-جومارت توقاەۆ.
امەريكالىق كونگرەسسمەندەردى قابىلدادى
مەملەكەت باسشىسى اقش كونگرەسى وكىلدەر پالاتاسىنىڭ مۇشەلەرى دجيممي پانەتتامەن, كەرول ميللەرمەن, بيلل حايزەنگامەن جانە سيدني كاملاگەر-داۆپەن كەزدەستى.
پرەزيدەنت اقش كونگرەسى قازاقستانمەن دوستىق بايلانىستى نىعايتۋدا ماڭىزدى ءرول اتقاراتىنىن اتاپ ءوتىپ, پارلامەنت مۇشەلەرىنە ەكى ەل اراسىنداعى كەڭەيتىلگەن ستراتەگيالىق سەرىكتەستىكتى ىلگەرىلەتۋگە قوسقان ۇلەسى ءۇشىن العىس ايتتى.
قاسىم-جومارت توقاەۆ كونگرەستەگى دجيممي پانەتتا باسقاراتىن «اقش – قازاقستان» دوستىق توبى (كوكۋس) قوس حالىق اراسىنداعى ساياسي ديالوگتى تەرەڭدەتۋگە, ەكونوميكالىق كووپەراتسيا مەن بايلانىستار اياسىن كەڭەيتۋگە ىقپال ەتىپ وتىرعانىنا نازار اۋداردى.
اقش – قازاقستاننىڭ ەڭ ءىرى ەكونوميكالىق سەرىكتەستەرىنىڭ ءبىرى. قۇراما شتاتتار ەلىمىزدىڭ ەكونوميكاسىنا 100 ملرد دوللاردان اسا ينۆەستيتسيا سالدى. بۇل – ورتالىق ازياعا باعىتتالعان جالپى ينۆەستيتسيا كولەمىنىڭ 80 پايىزى.
سونىمەن قاتار پرەزيدەنت كونگرەسسمەندەرگە ەلىمىزدە جۇرگىزىلىپ جاتقان جان-جاقتى ساياسي جانە ەكونوميكالىق جاڭعىرۋلار جونىندە اڭگىمەلەدى.
كونگرەسس مۇشەلەرى قازاقستاننىڭ الەۋەتىنە جوعارى باعا بەرىپ, ەكى ەل اراسىنداعى سان قىرلى بايلانىستاردىڭ دامۋىنا قولداۋ كورسەتەتىندەرىن جەتكىزدى.
قاسىم-جومارت توقاەۆ ورايلى ءساتتى پايدالانىپ, امەريكا پارلامەنتىنىڭ وكىلدەرىن ەكى ەلدىڭ ءوزارا ءتيىمدى ىنتىماقتاستىعىن كەڭەيتۋ ماقساتىندا قازاقستانعا ساپارلاپ كەلۋگە شاقىردى.
«Chevron» ۇلەسىنە جوعارى باعا بەردى
وسى كۇنى پرەزيدەنت قاسىم-جومارت توقاەۆ «Chevron» كورپوراتسياسى ديرەكتورلار كەڭەسىنىڭ توراعاسى مايكل ءۋيرتتى قابىلدادى.
مەملەكەت باسشىسى تەڭىز بەن قاراشىعاناق كەن ورىندارىنداعى مۇناي مەن گازدى يگەرۋ بويىنشا اۋقىمدى جوبالاردى جۇزەگە اسىرۋعا «Chevron» كورپوراتسياسىنىڭ قوسقان ۇلەسىنە جوعارى باعا بەردى. سونداي-اق قازاقستان تاراپىنىڭ شيكىزاتتى ءوندىرۋ, وڭدەۋ جانە تاسىمالداۋ سالالارىنداعى ءوزارا ءتيىمدى ىنتىماقتاستىقتى جالعاستىرۋعا دايىن ەكەنىن راستادى.
اقش سەناتورىن «دوستىق» وردەنىمەن ماراپاتتادى
سونىمەن قاتار قاسىم-جومارت توقاەۆ امەريكالىق سەناتور ستيۆ دەينستى قابىلدادى.
رەسپۋبليكالىق پارتيادان سايلانعان سەناتورمەن كەزدەسۋدە قازاق-امەريكا قاتىناستارىن نىعايتۋعا پارلامەنتتىك ديپلوماتيانىڭ قوسقان ۇلەسى تالقىلاندى.
مەملەكەت باسشىسى اقش سەناتورىنىڭ قازاقستانعا شىنايى تىلەكتەس ەكەنىن اتاپ ءوتىپ, رەسپۋبليكا كۇنىنە وراي كونگرەستىڭ رەسمي مالىمدەمە جاساعانى ءۇشىن ريزاشىلىق ءبىلدىردى. بۇل – ەلدەرىمىز اراسىنداعى بۇرىننان كەلە جاتقان ستراتەگيالىق سەرىكتەستىكتىڭ دالەلى.
قاسىم-جومارت توقاەۆ پەن ستيۆ دەينس ەكىجاقتى كۇن ءتارتىبىنىڭ باسىم باعىتتارى جونىندە پىكىر الماسىپ, قوس حالىقتىڭ يگىلىگى ءۇشىن قازاقستان مەن امەريكا قۇراما شتاتتارىنىڭ ستراتەگيالىق سەرىكتەستىگىن نىعايتۋعا باعىتتالعان بىرلەسكەن جۇمىستى جالعاستىرۋعا دايىن ەكەندەرىن راستادى.
كەزدەسۋ سوڭىندا پرەزيدەنت قازاقستان مەن اقش اراسىنداعى بايلانىستى نىعايتۋعا قوسقان ۇلەسى ءۇشىن سەناتور ستيۆ دەينستى ءى دارەجەلى «دوستىق» وردەنىمەن ماراپاتتاۋ تۋرالى شەشىم قابىلداعانىن جەتكىزدى.
اگروونەركاسىپتى دامىتاتىن ءتيىمدى ىنتىماقتاستىق
قاسىم-جومارت توقاەۆ «John Deere» كومپانياسىنىڭ تمد جانە ورتالىق ازيا ەلدەرى بويىنشا پرەزيدەنتى چابو لەيكومەن كەزدەستى.
قازاقستان پرەزيدەنتى «John Deere» كومپانياسىمەن سەرىكتەستىكتى زاماناۋي جانە ءتيىمدى اۋىل شارۋاشىلىعى كەشەنىن دامىتۋعا ورتاق ۇمتىلىستى كورسەتەتىن وندىرىستىك كووپەراتسيانىڭ تابىستى ۇلگىسى دەپ اتادى.
مەملەكەت باسشىسى «John Deere» كومپانياسىنىڭ قازاقستاننىڭ «اگروماش» زاۋىتىمەن سەرىكتەستىك ورناتا وتىرىپ, اگروونەركاسىپ كەشەنىنە ارنالعان تەحنيكا ءوندىرىسىنىڭ لوكاليزاتسياسى تۋرالى قابىلداعان شەشىمىن قولدادى. بۇل ىنتىماقتاستىق قازىردىڭ وزىندە وڭ ناتيجە بەرىپ وتىر.
ءوندىرىس ىسكە قوسىلعان بيىلعى مامىر ايىنان بەرى 290 بىرلىكتەن اسا تەحنيكا قۇراستىرىلعان. جىل سوڭىنا دەيىن تاعى 100 تەحنيكا شىعارىلادى دەپ جوسپارلانىپ وتىر.
قاسىم-جومارت توقاەۆ ساپار اياسىندا جالپى قۇنى 2,5 ملرد دوللارعا باعالانعان ستراتەگيالىق سەرىكتەستىك تۋرالى كەلىسىمگە قول قويىلعانىن قۇپتادى.
قۇجات بويىنشا «اگروماشحولدينگ KZ» اق 5 جىل ىشىندە كەم دەگەندە 3 مىڭ «John Deere» اۋىل شارۋاشىلىعى تەحنيكاسىن ءوندىرۋدى, كەمىندە 3 سەرۆيس ورتالىعىن اشۋدى, سونداي-اق مامانداردى وقىتۋ جۇيەسىن دامىتۋدى قاراستىرادى.