يۋنەسكو-نىڭ باس كونفەرەنتسياسى ۇيىمنىڭ جاڭا باس ديرەكتورى رەتىندە حالەد ءال-ءانانيدى سايلادى. بۇل تۋرالى يۋنەسكو-نىڭ سايتىندا حابارلاندى, دەپ جازدى Egemen.kz.
ايتىلعانداي, ول 179 داۋىستىڭ ىشىنەن 172 داۋىس جينادى. جاڭا باس ديرەكتور 15 قاراشادا ءوز قىزمەتىنە كىرىسەدى. ول بۇل قىزمەتتە 2017 جىلدان بەرى وسى لاۋازىمدى اتقارىپ كەلگەن ودرە ازۋلەنى الماستىرادى.
حالەد احمەد ءال-اناني ءالي ەزز — ەگيپتولوگ, حەلۋان ۋنيۆەرسيتەتىنىڭ ەگيپتولوگيا پروفەسسورى, وندا 30 جىلدان استام ۋاقىتتان بەرى ساباق بەرەدى. سونداي-اق, ول فرانتسيانىڭ مونپەلە قالاسىنداعى پول ۆالەري ۋنيۆەرسيتەتىندە ەگيپتولوگيا بويىنشا فيلوسوفيا دوكتورى دارەجەسىن العان, بۇل وقۋ ورنىندا بىرنەشە رەت شاقىرىلعان پروفەسسور رەتىندە قىزمەت اتقارعان.
2014–2016 جىلدارى ەگيپەت وركەنيەتىنىڭ ۇلتتىق مۋزەيىن باسقارعان, ال 2015–2016 جىلدارى كايردەگى ەگيپەت مۋزەيىنىڭ ديرەكتورى بولعان. 2016 جىلدان 2022 جىلعا دەيىن ەگيپەت اراب رەسپۋبليكاسىنىڭ ەجەلگى ەسكەرتكىشتەردى قورعاۋ ىستەرى جونىندەگى ءمينيسترى, كەيىن تۋريزم جانە ەجەلگى ەسكەرتكىشتەردى قورعاۋ ءمينيسترى قىزمەتىن اتقاردى.
ول بىرقاتار حالىقارالىق عىلىمي قوعامداردىڭ مۇشەسى. وتكەن جىلدىڭ قاراشاسىندا دۇنيەجۇزىلىك تۋريستىك ۇيىمنىڭ مادەني تۋريزم جونىندەگى ارنايى ەلشىسى بولىپ تاعايىندالعان, كەيىنىرەك افريكانىڭ دۇنيەجۇزىلىك مۇرا قورىنىڭ قامقورشىلار كەڭەسىنە كىردى. حالەد ءال-اناني كوپتەگەن حالىقارالىق ماراپاتتاردىڭ يەگەرى.
حالەد ءال-اناني يۋنەسكو تاريحىنداعى اراب ەلىنەن شىققان العاشقى جانە بۇل قىزمەتتى اتقارىپ وتىرعان افريكا وكىلدەرىنىڭ ىشىندە ەكىنشى تۇلعا بولدى.