ەلىمىزدە بىرقاتار جاڭا سوتتار قۇرىلدى

استانا. 21 ناۋرىز. پرەزيدەنتتىڭ جارلىعىمەن بىرقاتار وڭىرلەردە سوت مەكەمەلەرى قۇرىلدى. بۇل تۋرالى جوعارعى سوتتىڭ ءباسپاسوز قىزمەتى حابارلادى. حابارلامادا كورسەتىلگەندەي, الماتى جانە شىمكەنت قالالارىنىڭ جاڭا اكىمشىلىك-اۋماقتىق بولىمشەلەرىندە تيىسىنشە, ناۋرىزباي جانە قاراتاۋ اۋداندىق سوتتارى قۇرىلدى. بۇدان بولەك, الماتى قالاسىنىڭ اۋماعىندا مەدەۋ اۋدانىنىڭ № 2 قىلمىستىق ءىس جونىندەگى مامانداندىرىلعان اۋداندىق سوت قاتارعا قوسىلدى. تاجىريبەگە سۇيەنسەك, مامانداندىرىلعان سوتتار جۇيەسىن ەنگىزۋ ءادىل شەشىم شىعارۋعا جانە سوت ىستەرىنىڭ ساپالى قاراستىرىلۋىنا سەپتىگىن تيگىزەدى. سونداي-اق, پرەزيدەنت جارلىعىنا سايكەس, اقمولا وبلىسىنداعى جاقسى اۋدانىنىڭ № 2 سوتى جانە قوستاناي وبلىسىنداعى رۋدنىي قالاسىنىڭ № 2 سوتى تاراتىلدى. اتالعان سوتتار قىزمەتى مۇنداعى حالىق تىعىزدىعىنىڭ تومەندىگىنە, جۇمىستىڭ ازدىعىنا بايلانىستى توقتاتىلدى. ەندى ولاردىڭ مىندەتىندەگى بارلىق ماسەلەلەر اقمولا وبلىسىنداعى جاقسى اۋداندىق سوتى مەن قوستاناي وبلىسىنداعى رۋدنىي قالالىق سوتىنىڭ قۇزىرەتىنە بەرىلدى. بۇل شارالار ازاماتتاردىڭ سوتتارعا جۇگىنگە قولايلىلىقتى قامتاماسىز ەتۋگە باعىتتالعان جانە اقمولا مەن قوستاناي وبلىستارىنىڭ اۋماعىندا سوت تورەلىگىن جۇزەگە اسىرۋ بويىنشا قىزمەت كورسەتۋگە شەكتەۋ بولمايدى. مۇنىڭ بارلىعى الدىن-الا جەرگىلىكتى اتقارۋشى ورگاندارمەن كەلىسىلگەن. جولدىباي بازار. دەرەك, سۋرەت: جوعارعى سوتتىڭ ءباسپاسوز قىزمەتى.