2025 جىلدىڭ 9 ايىنىڭ قورىتىندىسى بويىنشا «اقتاۋ تەڭىز پورتى» ارنايى ەكونوميكالىق ايماعى ءوڭىر ەكونوميكاسىنىڭ تۇراقتى دامۋىنا سەرپىن بەرىپ وتىر, دەپ حابارلايدى Egemen.kz وڭىرلىك قوعامدىق كوممۋنيكاتسيا ورتالىعىنا سىلتەمە جاساپ.
بيىل قاڭتار-قىركۇيەك ايلارىندا ايماق اۋماعىنا تارتىلعان تىكەلەي شەتەلدىك ينۆەستيتسيا كولەمى – 6,6 ملرد تەڭگە, ال جالپى ينۆەستيتسيا كولەمى 25,1 ملرد تەڭگەگە جەتتى. وسى كەزەڭدە اەا كاسىپورىندارى 58,3 ملرد تەڭگەنىڭ ءونىمىن ءوندىرىپ, ونىڭ ءبىر بولىگى 108,9 ملن تەڭگە كولەمىندە ەكسپورتتالعان.
ايماقتاعى وندىرىستىك بەلسەندىلىكتىڭ ارتۋى 3 052 جاڭا جۇمىس ورنىن اشۋعا مۇمكىندىك بەردى. بۇل – ءوڭىر تۇرعىندارى ءۇشىن جاڭا مۇمكىندىكتەر مەن تۇراقتى تابىس كوزى. قازىر اەا اۋماعىندا 55 كومپانيا تىركەلگەن. ونىڭ 27-ءسى تولىق ىسكە قوسىلعان, ال 28 جوبا جۇزەگە اسىرىلۋ كەزەڭىندە.
مۇنداي جوبالار وندىرىستىك الەۋەتتى ارتتىرىپ, ءوڭىر ەكونوميكاسىن ارتاراپتاندىرۋعا جانە ەكسپورتتىق باعىتتى كۇشەيتۋگە جول اشىپ وتىر. اەا قۇرىلعان ساتتەن بەرى ايماق ەكونوميكاسىنا سالىنعان ينۆەستيتسيانىڭ جيىنتىق كولەمى 362 ملرد تەڭگەگە جەتتى. ونىڭ ىشىندە 179,2 ملرد تەڭگە – شەتەلدىك ينۆەستيتسيا.
بيۋدجەتتەن بولىنگەن ءاربىر 1 تەڭگەگە شاققاندا 46,4 تەڭگە جەكە ينۆەستيتسيا تارتىلىپ, 9,1 تەڭگە سالىق ءتۇسىمى قامتاماسىز ەتىلدى. بۇل – «اقتاۋ تەڭىز پورتى» اەا-نىڭ ءتيىمدى جۇمىس ىستەپ, ءوڭىر دامۋىنا ناقتى ۇلەس قوسىپ وتىرعانىنىڭ ايقىن دالەلى.