قازاقستان حالقى اسسامبلەياسىنىڭ كەڭەسى ەل ازاماتتارىنا ۇندەۋ ارنادى. وندا بىلاي دەلىنگەن:
قازاقستان ەگەمەندىككە يە بولعان العاشقى كۇننەن باستاپ پرەزيدەنت ن.ءا.نازارباەۆتىڭ مەملەكەت ساياساتىنىڭ باستى باعىتىنا اينالدىرعان بەيبىتشىلىك پەن قوعامدىق كەلىسىم يدەياسى قوعامداعى تۇراقتىلىق پەن حالىقتىڭ الەۋەتىن ارتتىرۋدىڭ باستى ۇستانىمىنا اينالدى. ءسويتىپ, رەسپۋبليكامىز الەمدىك وركەنيەتكە اۋىزبىرشىلىك پەن دوستىقتىڭ, ءوزارا قۇرمەت پەن سەنىمنىڭ وزىق ۇلگىسىن كورسەتىپ, بەيبىت ءتارتىپ پەن ەلدىڭ سىندارلى وركەندەۋىن قامتاماسىز ەتتى.
ءبىز بۇگىن, ەلىمىزدىڭ تۇڭعىش پرەزيدەنتى ن.ءا.نازارباەۆتىڭ تولەرانتتىلىق جانە قوعامدىق كەلىسىم, ۇلتتىق بىرلىك پەن ىنتىماق ساياساتى الەمدىك قاۋىمداستىق تاراپىنان مويىندالعانىن ماقتانىشپەن سەزىنەمىز. بۇعان ناقتى دالەل – قازاقستاننىڭ ەقىۇ-عا توراعالىق ەتۋى.
شەتەلدىك ساياسي قايراتكەرلەر بىزدە ەتنوسارالىق تولەرانتتىلىق پەن قوعامدىق كەلىسىمنىڭ ايرىقشا ۇلگىسى قالىپتاسقانىن, سونداي-اق قازاقستان حالقى اسسامبلەياسىنىڭ قوعامدىق تۇراقتىلىقتى ساقتاۋشى ماڭىزدى قۇرالعا اينالعانىن ءبىراۋىزدان اتاپ ءجۇر.
قازاقستان حالقى اسسامبلەياسى دۇنيەگە كەلگەن العاشقى ساتتەن باستاپ ول ادامي قۇندىلىقتار مەن قاعيداتتاردى نىعايتۋ ارقىلى, بارلىق قازاقستاندىق ەتنوستاردى ءوز قاناتىنىڭ استىنا ۇيىستىرا وتىرىپ, تىنباس ەڭبەك پەن ورتاق مىندەتتەردى ىسكە اسىرۋ ارقىلى كۇردەلى جولدان ءوتتى. ءسويتىپ, قىزمەتىن كونسۋلتاتيۆتىك-كەڭەسشى ورگان رەتىندە باستاعان قحا ءوز مارتەبەسىن كونستيتۋتسيالىق تۇرعىدا بەكىتىپ, ىرگەلى قوعامدىق ينستيتۋتقا اينالدى.
ءبىز, قازاقستان حالقى اسسامبلەياسىنىڭ مۇشەلەرى, تاۋەلسىزدىك يدەالدارىن جۇزەگە اسىرۋعا ارنالعان بەيبىتشىلىك پەن كەلىسىم ساياساتىن, تۇڭعىش پرەزيدەنت – ەلباسى تۋرالى زاڭداردى تولىقتاي قولدايتىنىمىزدى اتاپ كورسەتكىمىز كەلەدى. اتالعان زاڭدار قوعامنىڭ ۇلت كوشباسشىسىنىڭ تالاسسىز تۇلعالىق بەينەسىنە دەگەن ۇلكەن قۇرمەتىن ايقىندادى.
ۇلت كوشباسشىسى مارتەبەسىن زاڭداستىرۋدىڭ تاريحي ءمانى ەرەكشە. بۇل – ءبىز ءۇشىن ماڭىزدى, بۇل كەلەر ۇرپاق ءۇشىن دە كەرەك. بۇل – قازاقستاننىڭ قارىشتاپ دامۋىنىڭ, نەگىزگى قۇندىلىعىمىز – تاۋەلسىزدىكتى نىعايتۋ يدەياسى ارقىلى ۇيىسۋدىڭ كەپىلى.
ءبىز بارلىق قوعامدىق كۇشتەردى بەيبىتشىلىك پەن اۋىزبىرشىلىكتى باعالاۋعا, تاتۋلىقتا تۇرمىس كەشىپ, ايتىلعان ءاربىر ءسوز بەن اتقارىلعان ىسكە جاۋاپتى بولۋعا, قازاقستان حالقىنىڭ باستى قۇندىلىعى – بەيبىتسۇيگىشتىك, ءتوزىمدىلىك پەن ءوزارا قولداۋ قاسيەتتەرىنە ۇقىپتى قاراۋعا شاقىرامىز.
ءبىز قازاقستان حالقىن ۇلت كوشباسشىسى, بەيبىتشىلىك پەن قوعامدىق كەلىسىم كەپىلى, نۇرسۇلتان ءابىش ۇلى نازارباەۆتىڭ جانىنا ۇيىسۋعا شاقىرامىز, دەلىنگەن ۇندەۋدە.