«قاراسورا» جەدەل-پروفيلاكتيكالىق ءىس-شاراسى اياسىندا ءىىم ەسىرتكى قىلمىسىنا قارسى ءىس-قيمىل كوميتەتىنىڭ جانە جامبىل وبلىسىنىڭ پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى ەسىرتكى زاتتارىن زاڭسىز تاسىمالداعان كۇدىكتىلەر توبىن ۇستادى, دەپ حابارلايدى Egemen.kz.
جەدەل اقپارات نەگىزىندە تاراز قالاسىنا كىرگەن «اۋدي-80» ماركالى كولىك توقتاتىلعان. اۆتوكولىكتە ءتورت جەرگىلىكتى تۇرعىن بولعان. ىزدەستىرۋ كەزىندە قۇقىق قورعاۋ قىزمەتكەرلەرى كولىكتىڭ باگاجىنان 4 قاپ كەپتىرىلمەگەن ماريحۋانا تاپقان. الىنعان ەسىرتكى زاتتارىنىڭ جالپى سالماعى 24 كەلى 480 گرامدى قۇراعان.
الدىن الا الىنعان مالىمەتتەرگە قاراعاندا ماريحۋانا ەسىرتكى زاتى تۇرار رىسقۇلوۆ اۋدانىنىڭ قۇمدى ايماعىندا دايىندالعان. اتالعان دەرەك بويىنشا قازاقستان رەسپۋبليكاسى قىلمىستىق كودەكسىنىڭ 296-بابى 4-بولىگى بويىنشا تەرگەۋ امالدارى باستالدى.
قازىرگى ۋاقىتتا كولىكتەگى ەكى جولاۋشى ۋاقىتشا ۇستاۋ يزولياتورىنا قامالدى. قالعان كۇدىكتىلەرگە قاتىستى قاجەتتى تەرگەۋ شارالارى جۇرگىزىلىپ جاتىر.كۇدىكتىلەردى ۇستاۋ جامبىل وبلىسى پروكۋراتۋراسىنىڭ قىزمەتكەرلەرىنىڭ تىكەلەي قاتىسۋىمەن بولعان.
جامبىل وبلىسى