تاريحتا تەننيستىڭ نەبىر ۇمىتىلماس ساتتەرى بولعانىمەن, 2010 جىلعى ۋيمبلدون تۋرنيرىندەگى دجون يزنەر مەن نيكوليا مايۋ اراسىنداعى ماتچ ەرەكشە ەستە قالدى. بۇل كەزدەسۋ الەمدىك سپورت تاريحىنداعى ەڭ ۇزاق ماتچ رەتىندە رەكورد ورناتقان, دەپ جازادى Egemen.kz.
11 ساعاتقا سوزىلعان تارتىس
ماتچ 2010 جىلدىڭ 22-24 ماۋسىمى ارالىعىندا انگليانىڭ لوندون قالاسىنداعى ۋيمبلدون كورتىندا ءوتتى. امەريكالىق دجون يزنەر مەن فرانتسۋز نيكوليا مايۋنىڭ كەزدەسۋى ءۇش كۇنگە سوزىلدى. العاشقى ەكى كۇن اۋا رايىنىڭ قولايسىزدىعىنا بايلانىستى بىرنەشە رەت توقتاتىلعان. بىراق سوڭعى كۇنى ويىنشىلار كۇش-جىگەرىن اياعان جوق. بەسىنشى سەت 70:68 ەسەبىمەن اياقتالعانعا دەيىن 8 ساعاتتان استام ۋاقىتقا سوزىلىپ, جالپى ماتچ ۇزاقتىعى 11 ساعات 5 مينۋت بولدى.
فيزيكالىق جانە رۋحاني توزىمدىلىك سىناعى
ەكى سپورتشى دا ادام توزگىسىز شارشاۋعا قاراماستان, سوڭىنا دەيىن كۇرەستى. يزنەردىڭ بويى – 208 سم, ال مايۋ ودان ءسال الاسا بولعانىمەن, ويىن ءستيلى وتە قىزىقتى ەدى. ماتچ بارىسىندا يزنەر 112 ەيس, ياعني دوپتى تۋرا سوعىپ, قارسىلاس قابىلداي الماي قالعان ساتتەر جاسادى. بۇل دا بولەك رەكورد رەتىندە تىركەلدى.
سول ۋاقىتتا كورتتاعى تورەشىلەر دە, كورەرمەندەر دە تاڭدانىسىن جاسىرا المادى. ماتچتىڭ سوڭىندا ەكى ويىنشى ءبىر-ءبىرىن قۇتتىقتاپ, كورەرمەندەر ولاردى تىك تۇرىپ قول شاپالاقتاپ شىعارىپ سالدى. كەيىن ۋيمبلدون ۇيىمداستىرۋشىلارى ولاردىڭ ويناعان الاڭىنا ەسكەرتكىش تاقتا ورناتتى.
ەرەجەلەردىڭ وزگەرۋىنە اسەر ەتكەن ماتچ
بۇل كەزدەسۋدەن كەيىن ۇلكەن دۋلىعا تۋرنيرلەرىندە (Grand Slam) شەشۋشى سەتتەگى ەرەجەلەر قايتا قارالدى. بۇرىن بەسىنشى سەتتە تاي-برەيك (قىسقارتىلعان ويىن) قولدانىلمايتىن, ال بۇل ماتچتان سوڭ كەي تۋرنيرلەر مۇنداي جاعدايدىڭ الدىن الۋ ءۇشىن تاي-برەيكتى ەنگىزدى.