ءۇش ملن ادام قاتونقاراعايعا ءسۇيسىندى

تاڭداۋ ەركىندىگى مول بولسا دا, ولاردىڭ باعىتى التايدىڭ ەتەگىندەگى, پەش ءتۇتىنى ارالاس تاڭعى اۋاسى بار قازاقستاننىڭ شىعىسىنا بۇرىلدى. ولار تۋريستىك ورىن ىزدەپ كەلگەن جوق. كامەرالارى اۋىل ءومىرىن ءتۇسىردى. داستارقان جايۋعا دايىندالىپ جاتقان ايەل, ەسىك الدىندا قالعىپ جاتقان يت, كۇزگى ورىستەگى ات. كورىنىستەردە ەش جاساندىلىق جوق, بىراق سول ساتتەردىڭ وزىندە ءومىردىڭ سابىرى مەن سالماعى بار.

قاتونقاراعايدىڭ اتى كەيىنگى جىلدارى ءجيى ايتىلا باستادى. 2023 جىلى اۋدان Top 100 Green Destinations تىزىمىنە ەندى. بيىل Euronews ارناسى ارنايى سيۋجەت كورسەتتى. بلوگەرلەر جيىلەپ, جاڭا باعىتتار مەن يدەيالار پايدا بولدى. الەم نازارى التايعا بەت بۇرعانداي.

بىراق بۇل نازاردىڭ ارتىندا ءبىر سۇراق تۇر. تانىمال بولعان تىنىشتىقتىڭ قۇنى قانداي؟ اۋىلدىق ايماقتاردى ورنىقتى دامىتۋ قورىنىڭ جەتەكشىسى فاتيما گەرفانوۆا قاتونقاراعايدىڭ ەرەكشەلىگى تۋرالى ايتتى.

«قازاقستاندا تۋريستىك الەۋەتى بار 74 اۋدان بار, سونىڭ ىشىندە قاتونقاراعايدىڭ ميسسياسى بولەك. بۇل – دامۋ مەن ۇقىپتىلىق قاتار جۇرەتىن باعىتتىڭ ۇلگىسى. اۋداندا ءتۋريزمدى دامىتۋ جوسپارى بار. وندا باستى ماقسات – تابيعاتتى ساقتاۋ جانە تەپە-تەڭدىكتى جوعالتپاۋ. جەرگىلىكتى كاسىپكەرلەردىڭ سوزىمەن ايتقاندا, بىزگە كوپ تۋريست ەمەس, تۇسىنەتىن ادام كەرەك. UNWTO دەرەگى بويىنشا, Y جانە Z بۋىنىنىڭ 86% ساپاردان اسەر ەمەس, تاجىريبە ىزدەيدى. OECD ساراپشىلارى اۋىل ءتۋريزمىن پاندەميادان كەيىن ەكونوميكانى قالپىنا كەلتىرۋدىڭ ءتيىمدى جولى دەپ ەسەپتەيدى», دەيدى ول.

فرانتسيادا Petites Cités de Caractère باعدارلاماسى ارقىلى شاعىن قالالار قايتا جانداندى. يتاليادا Borghi più belli d’Italia ەلدى مەكەندەرى قورعالىپ جاتىر. جاپونيادا One Village, One Product قوزعالىسى اۋىلدى ءوزىن-ءوزى تانىتۋدىڭ مەكتەبىنە اينالدىردى. كورەيادا فەرمەرلىك پەن تسيفرلىق تەحنولوگيا بىرىگىپ, «اقىلدى اۋىلدار» پايدا بولدى. يسلانديا مەن نورۆەگيادا ەسكى قوجالىقتار قوناقۇيگە اينالىپ, ءار بولمە ءوز اۋلەتىنىڭ تىنىسىن ساقتايدى.

بۇل تاجىريبەلەردىڭ ءبارى ءبىر نارسەنى دالەلدەيدى. ورنىقتى تۋريزم – مادەنيەت, تابيعات جانە ەكونوميكانىڭ اراسىنداعى تەڭدىك.

«قازاقستان وسى تۇستا ساق بولۋى كەرەك. 2024 جىلى قابىلدانعان ۇلتتىق دامۋ جوسپارىنىڭ تۋريزم بولىمىنە تەك ساندىق ماقساتتار ەنگىزىلگەن. وندا شەتەلدىك تۋريستەر سانىن ءتورت ميلليونعا, جالپى اعىمدى ون بەس ميلليونعا جەتكىزۋ كوزدەلگەن. بىراق بۇل ءوسىمنىڭ ساپاسى جايلى ەشتەڭە ايتىلماعان. تابيعاتقا تۇسەتىن سالماق, مادەني ورتانى ساقتاۋ, اۋىلعا تۇسەتىن پايدا مەن جەرگىلىكتى حالىقتىڭ ورنىقتىلىعى ەسكەرىلمەگەن. بۇل ە ەسكەرتۋگە لايىق بەلگى. سان ارتقان سايىن ءمان ازايۋى مۇمكىن. سوندا ەڭ قىمبات نارسە – تىنىشتىق پەن تازالىق جوعالادى», دەيدى اۋىلدىق ايماقتاردى دامىتۋ قورى وكىلدەرى.

قاتونقاراعاي ءوز جولىن ىزدەپ كەلەدى. مۇندا باستى نازار اقشادا ەمەس, سەنىمدە. حالىق كەلگەن قوناقتى ءومىر ىرعاعىنا بەيىمدەيدى, تابيعات ۇندەستىككە ۇيرەتەدى. تۋريست باقىلاۋشى ەمەس, تىرشىلىكتىڭ ءبىر بولشەگى بولادى. شەتەلدىك بلوگەرلەردىڭ ساپارىنىڭ ءمانى دە وسىندا. ولار قاتونقاراعايدىڭ شىنايى تىنىسىن كورسەتتى. كادرلارىندا بوياۋ دا, جاساندىلىق تا جوق.