فرانكفۋرت قالاسىندا ورنالاسقان قازاقستان رەسپۋبليكاسىنىڭ باس كونسۋلدىعى عيماراتىندا قازاق رۋحانياتى مەن مەملەكەتتىلىگىنە ارنالعان تاعىلىمدى رۋحاني كەش ءوتتى, دەپ حابارلايدى Egemen.kz.
« ۇلى ءسوزدىڭ ۇلاعاتى» دەپ اتالعان بۇل شارا ۇلى ويشىل, كەمەڭگەر اقىن اباي قۇنانباي ۇلىنىڭ 180 جىلدىعى جانە قازاقستان رەسپۋبليكاسىنىڭ مەملەكەتتىك ەگەمەندىگى تۋرالى دەكلاراتسياسىنىڭ قابىلدانعانىنا 35 جىل تولۋىنا وراي ۇيىمداستىرىلدى.
كەشتىڭ باستى ماقساتى – قازاق ادەبيەتىنىڭ بايلىعىن, ۇلت رۋحانياتىنىڭ تەرەڭدىگىن دارىپتەۋ جانە تاۋەلسىز قازاقستاننىڭ رۋحاني ىرگەتاسىن قالاۋداعى اباي مۇراسىنىڭ ماڭىزىن جاڭا قىرىنان تانىتۋ بولدى.
ءىس-شارانىڭ اشىلۋ سالتاناتىندا قازاقستان رەسپۋبليكاسىنىڭ باس كونسۋلى تاۋبولدى بالحيا ۇلى ۇمبەتباەۆ ءسوز سويلەپ, اباي دانالىعى مەن ەل تاۋەلسىزدىگىنىڭ رۋحاني ساباقتاستىعىن ەرەكشە اتاپ ءوتتى. ونىڭ ايتۋىنشا, ابايدىڭ ءسوزى مەن ويى قازاق حالقىنىڭ رۋحاني الەمىن تەرەڭدەتىپ قانا قويماي, ەلدىڭ ەگەمەن بولمىسىن نىعايتقان ىرگەتاسقا اينالدى.
سونىمەن قاتار قر مادەنيەت جانە اقپارات مينيسترلىگى ارحيۆ, قۇجاتتاما جانە كىتاپ ءىسى كوميتەتىنىڭ باسشىسى الماز امىربەك ۇلى مىرزاحمەتوۆ جانە قر ۇلتتىق مەملەكەتتىك كىتاپ پالاتاسىنىڭ ديرەكتورى ءادىل قويتانوۆ ءوز لەبىزدەرىن ءبىلدىرىپ, قازاق ادەبيەتىنىڭ حالىقارالىق كەڭىستىككە شىعۋىنىڭ ماڭىزدىلىعىنا توقتالدى.
كەش اياسىندا «جازۋ مەن جاريالاۋ: قازاق ادەبيەتىنىڭ جاڭا كەڭىستىكتەرى» اتتى ارنايى تاقىرىپتىق ءبولىم ءوتتى. بۇل بولىمدە بەلگىلى عالىم, اكادەميك, قوعام قايراتكەرى ورازالى سابدەن ءسوز سويلەپ, اباي مۇراسىنىڭ قازىرگى قازاق قوعامىنداعى ورنى مەن ۇلتتىق سانانى قالىپتاستىرۋداعى ىقپالىن تەرەڭ تالدادى. شارا بارىسىندا ەلىمىزدىڭ جەتەكشى باسپالارى – «الماتىكىتاپ», «اتامۇرا», «مەكتەپ», «Arman-PV baspasy», «ەۆەرو» باسپالارى وزدەرىنىڭ جاڭا باسىلىمدارىن تانىستىرىپ, زاماناۋي ادەبي ۇردىستەر مەن كىتاپ ىسىندەگى جاڭاشىل باعىتتار جونىندە وي ءبولىستى.
ابايدىڭ «قارا سوزدەرى» جەتى تىلدە
كەشتىڭ ەڭ اسەرلى ساتتەرىنىڭ ءبىرى – ابايدىڭ «قارا سوزدەرىنىڭ» جەتى تىلدە جارىق كورۋى تۋرالى جوبانىڭ تانىستىرىلىمى بولدى. بۇل ەڭبەكتى كوپشىلىككە قازاق ءتىلى وقىتۋشىسى, اتالعان كىتاپتى قۇراستىرۋشى گۇلميرا ابىلماجىنقىزى اماندىقوۆا تانىستىردى. ونىڭ ايتۋىنشا, بۇل جوبا ابايدىڭ دانالىق مۇراسىن الەمدىك دەڭگەيدە ناسيحاتتاۋعا جانە قازاق رۋحانياتىن حالىقارالىق قاۋىمداستىققا تانىستىرۋعا باعىتتالعان. كەش سوڭىندا فرانكفۋرتتاعى حالىقارالىق كىتاپ كورمەسىنە ارنايى قاستىسقان قازاقستاندىق دەلەگاتسيا مۇشەلەرى مەن باسپا وكىلدەرى وزدەرىنىڭ تاڭداۋلى ەڭبەكتەرىن قازاقستان رەسپۋبليكاسىنىڭ باس كونسۋلدىعى كىتاپحاناسىنا تارتۋ ەتتى. بۇل باستاما قازاق ادەبيەتىنىڭ شەتەلدە تارالۋىنا سەرپىن بەرىپ, ۇلتتىق رۋحانياتتىڭ حالىقارالىق كەڭىستىكتە كەڭىنەن تانىلۋىنا جول اشادى. سونىمەن بىرگە ولار ادەبيەت پەن باسپا ءىسىنىڭ وزەكتى باعىتتارى جونىندە پىكىر الماسىپ, بولاشاقتاعى شىعارماشىلىق ىنتىماقتاستىققا نيەت ءبىلدىردى.
ماين وزەنى جاعاسىندا وتكەن « ۇلى ءسوزدىڭ ۇلاعاتى» رۋحاني كەش – ۇلى ابايدىڭ رۋحاني مۇراسىن جاڭعىرتىپ, تاۋەلسىز قازاقستاننىڭ مادەني بولمىسىن ايشىقتاعان تاعىلىمدى شارا بولدى. بۇل ادەبي باسقوسۋ قازاق ءسوز ونەرىنىڭ بيىك قۇندىلىعىن دارىپتەپ, ۇلتتىق ادەبيەتتىڭ الەمدىك مادەنيەتپەن ۇندەسكەن جاڭا كەزەڭىن ايقىن كورسەتتى.