قازاقستاندا اۋىز سۋ ءتاريفىن رەتتەۋ جۇيەسىنە وزگەرىس ەنگىزىلدى. ەندى ايماقتىق ءماسليحاتتار تۇرعىندار ءۇشىن ءبىر تەكشە مەتر اۋىز سۋدىڭ باعاسىن ءوز بەتىنشە بەكىتە الادى. بۇل تۋرالى قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ توراعاسى باقىتجان جۇنىسبەكوۆ مالىمدەدى, دەپ جازادى Egemen.kz.
ونىڭ ايتۋىنشا, جەرگىلىكتى اتقارۋشى ورگاندار تاريف مولشەرىن انىقتاۋ كەزىندە ءوڭىردىڭ الەۋمەتتىك-ەكونوميكالىق دامۋ دەڭگەيىن جانە قولدانىستاعى سۋمەن جابدىقتاۋ قىزمەتتەرىنىڭ باعاسىن ەسكەرۋگە ءتيىس.
«قازىر اكىمدىكتەر حالىق ءۇشىن ناقتى تولەم كولەمىن ايقىنداۋ جۇمىستارىن جۇرگىزىپ جاتىر. سونىمەن قاتار, سۋبسيديالاۋ قاعيدالارىنا سايكەس, تۇرعىندار اۋىزسۋ قىزمەتى ءۇشىن بەكىتىلگەن تاريف بويىنشا تولەيدى», دەدى ول.
سونىمەن قاتار كوميتەت باسشىسى سۋدى تۇتىنۋ نورماسىن ساقتاۋ ماڭىزدىلىعىن اتاپ ءوتتى. بەلگىلەنگەن نورماتيۆ — ءبىر ادامعا تاۋلىگىنە 140 ليتر. ەگەر تۇتىنۋ وسى مەجەدەن اسسا, ارتىق كولەم ءۇشىن تولەم مولشەرى 30 پايىزعا جوعارى بەلگىلەنەدى.