ەلورداداعى ۇلتتىق مۋزەيدە «پۋشكيننەن شولوحوۆقا دەيىن: ۋاقىت ۇندەستىگى» اتتى كورمە اشىلدى. مادەنيەت جانە اقپارات مينيسترلىگىنىڭ قولداۋىمەن باتىس قازاقستان وبلىسىنىڭ تاريحي-ولكەتانۋ مۋزەيى ۇيىمداستىرعان كورمە مەملەكەت باسشىسى قاسىم-جومارت توقاەۆتىڭ قازاقستان حالقى اسسامبلەياسىنىڭ بيىلعى سەسسياسىندا بەرگەن تاپسىرمالارىن ىسكە اسىرۋ اياسىندا ءوتتى.
ءىس-شارا قازاقستان حالقى اسسامبلەياسى توراعاسىنىڭ ورىنباسارى دميتري وستانكوۆيچ العى سوزىمەن اشىلدى. سونىمەن قاتار مادەنيەت جانە اقپارات مينيسترلىگى مادەنيەت كوميتەتىنىڭ توراعاسى ەرلان داكەنوۆ, بقو مادەنيەت, تىلدەردى دامىتۋ جانە ارحيۆ ءىسى باسقارماسىنىڭ باسشىسى قۋانىشبەك مۇحانعاليەۆ, تاريح عىلىمدارىنىڭ كانديداتى, دوتسەنت دامەتكەن سۇلەيمەنوۆا ءسوز سويلەپ, ەلەۋلى ءىس-شاراعا ساتتىلىك تىلەدى.
– بۇل جاي عانا مادەني ءىس-شارا ەمەس, داۋىرلەردىڭ, ۇرپاقتاردىڭ جانە حالىقتاردىڭ بايلانىسى. مادەنيەتتىڭ ۇلى ميسسياسىن, ياعني بىرىكتىرۋ جانە رۋحاني تۇتاستىقتى ساقتاۋ ءىسىن جالعاستىرىپ كەلە جاتقانىن ايقىن كورسەتەتىن جارقىن مىسال. باتىس قازاقستان – تاريح پەن مادەنيەتكە باي, قاسيەتتى ولكە. ءدال وسى جەر ەۋروپا مەن ازيانىڭ تۇيىسكەن تۇسى, ۇلى جازۋشىلار پۋشكين, تولستوي, شەۆچەنكو, شولوحوۆتىڭ سوزدەرى جاڭعىرىپ, ماڭگىلىك رۋحاني ۇندەستىك ورناعان. الەكساندر سەرگەەۆيچ پۋشكيننىڭ ەسىمى – ورىس ادەبيەتىنىڭ التىن دىڭگەگى, رۋحاني ىزگىلىكتىڭ, گۋمانيزم مەن پوەزيالىق بيىكتىكتىڭ سيمۆولى. ونىڭ ورال دالاسىنداعى ساتتەرى, حالىق تۇرمىسىنان العان شابىت كوزدەرى ۇلى مۇرانىڭ اجىراماس بولىگىنە اينالدى, – دەدى دميتري وستانكوۆيچ.
اتالعان كورمەنى ا.س.پۋشكين مۋزەيىنىڭ مەڭگەرۋشىسى اسىلجان مىرزابولاتوۆا تانىستىرىپ, تاقىرىپتىڭ تەرەڭىنە بويلادى. كورمەدە ورىس حالقىنىڭ ۇلى اقىنى ا.س.پۋشكين مەن جاھانعا بەلگىلى جازۋشى م.ا.شولوحوۆتىڭ قازاق جەرىندەگى شىعارماشىلىعى مەن ادەبي مۇراسى كورەرمەن نازارىنا ۇسىنىلعان. ەكسپوزيتسيادا XIX–XX عاسىرلارداعى مۇراعاتتىق دەرەكتەر, سيرەك فوتوسۋرەتتەر, قولجازبالار مەن باسىلىمدار, سونداي-اق اقىن مەن جازۋشى تۇرمىستا قولدانعان زاتتارعا كۋا بولاسىز. بويىنا سىر بۇككەن جادىگەرلەر ۇلتتار اراسىنداعى ادەبي كوپىردى سەزىنۋگە مۇمكىندىك تۋعىزادى.
پۋشكيننىڭ 1833 جىلى ورال وڭىرىنە جاساعان ساپارى – ورىس ادەبيەتىنىڭ تاريحىنداعى ەڭ شىنايى ءارى تاعدىرلى بەتبۇرىستاردىڭ ءبىرى. اقىن قازاق دالاسىنا تەك زەرتتەۋشى رەتىندە ەمەس, رۋحاني ىزدەنىس ۇستىندە كەلگەن بولاتىن. اقجايىقتىڭ كەڭ دالاسى, حالىقتىڭ قوناقجاي مىنەزى مەن ەرلىككە تولى شەجىرەسى دانىشپانعا وي سالعان. وسى ساپار اسەرىنەن «كاپيتان قىزى» مەن «پۋگاچەۆ تاريحى» سياقتى شىعارمالارى دۇنيەگە كەلدى.
ال جازۋشى ميحايل شولوحوۆ ءۇشىن قازاق دالاسى سوعىس جىلدارىنداعى ءومىرىنىڭ ءبىر بولىگىنە اينالعان قاسيەتتى مەكەن. ۇلى وتان سوعىسى كەزىندە جازۋشىنىڭ وتباسى وسى وڭىردە تۇرعان, ءدال سول كەزدە ول «ادام تاعدىرى» مەن «تىنىق دون» شىعارمالارىنىڭ بولىمدەرىن جازىپ, كەيىپكەرلەرىنىڭ تاعدىرىن حالىقتىڭ شىنايى تۇرمىسىمەن بايلانىستىردى. قازاق جەرىندەگى كەڭدىك پەن ادام جانىنىڭ بەرىكتىگى, دارقاندىعى تۋىندىلارىنا ەرەكشە تىنىس بەرگەنى داۋسىز. سوندىقتان دا قازاق دالاسى شولوحوۆ ءۇشىن شابىتتىڭ باستاۋى عانا ەمەس, ەكىنشى وتانى ىسپەتتى بولدى دەسەك ارتىق ەمەس.
باتىس قازاقستان وڭىرىنەن جەتكىزىلگەن جۇزدەن استام جادىگەر – ەكى حالىقتىڭ ورتاق رۋحاني تاريحىنىڭ ءۇنسىز كۋاگەرى. ءاربىر ەكسپوناتتا – وتكەن ءداۋىردىڭ ءىزى, مادەنيەتتىڭ تىنىسى, ادام مەن جەر اراسىنداعى ماڭگىلىك بايلانىس جاتىر. بولاشاقتا قوس حالىق اراسىنداعى ادەبي ساباقتاستىق جالعاسىن تابا بەرەرى داۋسىز.