بيىلعى ەكونوميكا سالاسىنداعى نوبەل سىيلىعى يننوۆاتسيالىق ەكونوميكالىق ءوسۋ جولىن تۇسىندىرگەن عالىمدارعا بەرىلدى. جۇلدەنىڭ جارتىسى اقش-تاعى سولتۇستىك-باتىس ۋنيۆەرسيتەتىنىڭ قىزمەتكەرى دجوەل موكيرگە بۇيىردى. ال قالعان جارتىسىن فرانس كوللەدجىنىڭ قىزمەتكەرى فيليپپ اگيون مەن لوندون ەكونوميكا مەكتەبىنىڭ قىزمەتكەرى پيتەر حوۋيتت ءبولىستى.
عالىمدار يننوۆاتسيانىڭ ودان ءارى ىلگەرىلەۋگە قالاي سەرپىن بەرەتىنىن ءتۇسىندىردى. شۆەتسيا عىلىم اكادەمياسى ءوز مالىمدەمەسىندە:
«سوڭعى ەكى عاسىردا ادامزات تاريحتا العاش رەت تۇراقتى ەكونوميكالىق ءوسىم كەزەڭىن باستان وتكەردى. بۇل ميلليونداعان ادامنىڭ كەدەيلىكتەن شىعۋىنا جول اشىپ, قازىرگى وركەندەۋدىڭ بەرىك ىرگەتاسىن قالادى», دەپ اتاپ ءوتتى.