استانادا سەنات توراعاسى ماۋلەن اشىمباەۆتىڭ قاتىسۋىمەن ءبىرىنشى «Taldau forum: Analytics driving change» ءوتتى. ءىس-شارا «Taldau community»-ءدىڭ بەس جىلدىعىنا وراي ۇيىمداستىرىلدى. فورۋم بارىسىندا «Why Nations prosper: Lessons for Central Asia» تاقىرىبىنا ارنالعان پانەلدىك سەسسيا ءوتىپ, وعان نوبەل سىيلىعىنىڭ لاۋرەاتى, ماسساچۋسەتس تەحنولوگيالىق ينستيتۋتىنىڭ پروفەسسورى, ەكونوميست دارون ادجەموگلۋ ارنايى مەيمان رەتىندە قاتىستى.
ماۋلەن اشىمباەۆ فورۋمعا قاتىسۋشىلارعا ءىلتيپات ءبىلدىرىپ, ەلىمىزدىڭ كۇن تارتىبىندەگى جانە زاڭ شىعارۋ قىزمەتىندەگى ماڭىزدى ماسەلەلەردى بىرلەسىپ جۇيەلى تالقىلاۋ, سونداي-اق ورتاق ۇسىنىمدار مەن تالدامالىق قۇجاتتار ازىرلەۋ ءۇشىن زياتكەرلىك ورتا قالىپتاستىرۋدىڭ ءمانى زور ەكەنىن ايتتى. پالاتا سپيكەرى بەس جىل ىشىندە «ادىلەتتى قازاقستان» تۇجىرىمداماسىن ىسكە اسىرۋ جولىندا وزدەرىنىڭ تيىمدىلىگىن دالەلدەگەن سەنات جانىنداعى ساراپشىلار كلۋبى مەن تالداۋ مەكتەبىنىڭ جاسامپاز ءارى بىرىكتىرۋشى رولىنە دە نازار اۋداردى.
«Taldau forum» ساراپشىلاردى, بەلسەندى كاسىبي مامانداردى بىرىكتىرەتىن «Taldau سommunity»-ءدىڭ بەس جىلدىعىنا وراي وتكىزىلىپ وتىر. قازىرگى تاڭدا پرەزيدەنت قاسىم-جومارت توقاەۆتىڭ باستاماسىمەن ەلىمىزدە ماڭىزدى جانە كەشەندى رەفورمالار تابىستى ىسكە اسىرىلىپ كەلەدى. ءبىز تەڭگەرىمدى جانە دەموكراتيالىق ساياسي جۇيە قالىپتاستىرىپ جاتىرمىز. نارىقتىق ەكونوميكانى دامىتۋعا, ساياسي جانە قوعامدىق ينستيتۋتتاردى نىعايتۋعا دا باسا ءمان بەرىلىپ جاتىر. بۇگىنگى پىكىرتالاس قازاقستاننىڭ زياتكەرلىك جانە ساراپتامالىق الەۋەتىن ارتتىرۋعا, ەلىمىزدەگى رەفورمالاردىڭ كۇن ءتارتىبىن ءتيىمدى ىسكە اسىرۋعا ءوز ۇلەسىن قوسادى دەپ سەنەمىن», دەدى م.اشىمباەۆ.
وتىرىس بارىسىندا قاتىسۋشىلار قازاقستاننىڭ دامۋىنا قاتىستى ماسەلەلەردى تالقىلادى جانە نوبەل سىيلىعىنىڭ لاۋرەاتى, «Why Nations Fail», «Narrow Corridor», «Power and Progress» كىتاپتارىنىڭ اۆتورى دارون ادجەموگلۋمەن پەرسپەكتيۆالىق ترەندتەر جونىندە پىكىر الماستى.
پروفەسسور ادجەموگلۋ ءوز سوزىندە قازاقستاندا جۇرگىزىلىپ جاتقان رەفورمالارعا جوعارى باعا بەرىپ, ساياسي جانە ەكونوميكالىق ينستيتۋتتاردى دامىتۋدىڭ, ادام كاپيتالىن تۇراقتى ينۆەستيتسيالاۋدىڭ ماڭىزىنا ەرەكشە توقتالدى. سونداي-اق ول ەكونوميكانى جاڭعىرتۋعا قاتىستى بىرقاتار يدەياسىن ورتاعا سالدى.
«پرەزيدەنت قاسىم-جومارت توقاەۆتىڭ باسشىلىعىمەن قازاقستان دامۋدىڭ ماڭىزدى كەزەڭىنەن ءوتىپ جاتىر. ەلىمىز الدىندا اۋقىمدى ماقساتتار مەن مىندەتتەر تۇرعان قازىرگى تاڭدا تالداۋدىڭ جانە ساراپتامالىق قولداۋدىڭ ساپاسى ايرىقشا مانگە يە. ساپالى اناليتيكا – ەلدىڭ ورنىقتى دامۋىنا ارنالعان ءتيىمدى شەشىمدەر قابىلداۋدىڭ نەگىزى. وسىعان بايلانىستى بەس جىل بۇرىن سەنات ساراپشىلار قاۋىمداستىعىمەن جۇيەلى بايلانىس ورناتتى. باستى ماقسات – ساراپشىلاردىڭ جاڭا بۋىنىن قالىپتاستىرۋ جانە ولاردى زاڭ شىعارۋ جۇمىستارىنا تارتۋ. سونىڭ ناتيجەسىندە بۇگىندە ساراپشىلار كلۋبى, «تالداۋ» مەكتەبى, «Taldau talks» الاڭى, «Taldau run» سپورت قاۋىمداستىعى جانە سەرىكتەستەرىمىزدىڭ قاتىسۋىمەن وتەتىن وقىتۋ سەمينارلارى مەن ترەنينگتەردەن تۇراتىن «Taldau» ينتەللەكتۋالدى ەكوجۇيەسى قالىپتاستى دەپ ايتۋعا تولىق نەگىز بار», دەدى م.اشىمباەۆ.
سونىمەن قاتار سەنات سپيكەرى «تالداۋ» مەكتەبىنىڭ بەسىنشى لەگىنە ىرىكتەۋ باستالعانىن جاريالادى. سونداي-اق قاۋىمداستىقتىڭ ادالدىق, اشىقتىق, ۇنەمى ءوز بەتىمەن جۇمىس ىستەۋ, جاۋاپكەرشىلىك جانە قوعامدىق يگىلىككە قىزمەت ەتۋ سياقتى قۇندىلىقتارعا نەگىزدەلگەن قاعيدالارىن قابىلداۋدىڭ ماڭىزدى ەكەنىن تىلگە تيەك ەتتى. سەنات توراعاسى وڭىرلەردە «Taldau lectures» جوباسىن ىسكە اسىرۋ جانە زەرتتەۋلەر جۇرگىزىپ, جاڭا يدەيالار قالىپتاستىراتىن الاڭ رەتىندە «Taldau lab» تالدامالىق زەرتحاناسىن قۇرۋ جونىندە دە ۇسىنىستارىن ايتتى.
فورۋم اياسىندا ەلدىڭ وركەندەۋىنە ۇلەس قوسۋ ماقساتىمەن قوعامداستىقتى دامىتۋعا بەلسەندى اتسالىسقان ساراپشىلارعا «Taldau اwards» ارنايى سىيلىعى سالتاناتتى تۇردە تاپسىرىلدى.
ايتا كەتەيىك, «Taldau forum» الاڭىندا ساراپشىلاردىڭ قاتىسۋىمەن دوڭگەلەك ۇستەل ءوتتى. وندا مەملەكەت باسشىسىنىڭ قازاقستان حالقىنا جولداۋىندا بەلگىلەنگەن ادام كاپيتالىن دامىتۋ جانە ەلىمىزدەگى تسيفرلىق وزگەرىستەرگە قاتىستى ماسەلەلەر ءسوز بولدى.
پانەلدىك سەسسياعا پارلامەنت دەپۋتاتتارىمەن قاتار, وتاندىق جانە شەتەلدىك ساراپشىلار, عالىمدار, مەملەكەتتىك ورگانداردىڭ, بيزنەس-قۇرىلىمداردىڭ جانە ازاماتتىق قوعام ينستيتۋتتارىنىڭ وكىلدەرى قاتىستى.
سونىمەن قاتار بۇگىن فورۋم اياسىندا «حابار» اگەنتتىگى تەلەۆيزيالىق ماماندىقتار اكادەمياسىنىڭ ماماندارى شەشەندىك شەبەرلىك جانە كوپشىلىك الدىندا سويلەۋ داعدىسىنان ءدارىس وقىدى. ودان بولەك, «Meta» كومپانياسىنىڭ وكىلدەرى مەن بەلگىلى وتاندىق مەديا-ترەنەرلەر تارتىمدى كونتەنت جاساۋ, اۋديتوريامەن بايلانىس جانە الەۋمەتتىك جەلىلەردە جۇمىس ىستەۋدىڭ ءتيىمدى مەديا تەتىكتەرى تۋرالى كەڭەس بەرىپ, تاجىريبەلەرىمەن ءبولىستى.