تۇركى ەلدەرى ورتاق مۇددە جولىندا كۇش جۇمىلدىرۋعا ءتيىس

قازاقستان «تۇركى مەملەكەتتەرى ۇيىمى+» يدەياسىن قولدايدى

سامميتتە مەملەكەت باسشىسى قاسىم-جومارت توقاەۆ ءسوز سويلەپ, ەڭ الدىمەن ەرەكشە قوناقجايلىق كورسەتكەنى ءۇشىن ازەربايجان پرەزيدەنتى يلحام اليەۆكە ريزاشىلىعىن ءبىلدىرىپ, وسى جيىننىڭ ءمان-ماڭىزى ايرىقشا, كۇن ءتارتىبى وزەكتى ەكەنىن ايتتى.

– ءتۇبى ءبىر تۇركى جۇرتىنىڭ تاريحى – تامىرلاس, حالىقتارىمىزعا ورتاق سان عاسىرلىق شەجىرەمىز بار دەپ ۇنەمى ايتىپ جاتىرمىز. مۇنىڭ ءبارى – بەرەكەلى بىرلىگىمىز بەن ماڭگىلىك ىنتىماعىمىزدىڭ التىن ارقاۋى. جاقىندا ەلدەرىمىز «تۇركى حالىقتارىنىڭ ىنتىماقتاستىق كۇنىن» اتاپ ءوتتى. بۇل – بىرلىگىمىزدى بەكەمدەي تۇسەتىن ماڭىزدى مەرەكە. بۇگىندە تۇركى مەملەكەتتەرى ۇيىمى دوستاس حالىقتاردىڭ باسىن قوسقان مارتەبەلى ءارى بەدەلدى قۇرىلىمعا اينالدى. بىلتىردان بەرى ۇيىمعا قۇرمەتتى پرەزيدەنت سادىر جاپاروۆ باستاعان قىرعىز ەلى ءتيىمدى توراعالىق ەتتى. قىرعىز تاراپىنا ريزاشىلىعىمىزدى بىلدىرەمىز. ەندى توراعالىق قۇرمەتتى يلحام گەيدار وگلۋدىڭ باسشىلىعىمەن ازەربايجان تاراپىنا بەرىلەدى. الداعى ۋاقىتتا دا ۇيىمىمىزدىڭ ابىروي-بەدەلى ارتا تۇسەدى دەپ سەنەمىز, – دەدى پرەزيدەنت.

مەملەكەت باسشىسى جاھاندىق قاۋىپسىزدىك جۇيەسى كۇردەلى كەزەڭدى باستان وتكەرىپ جاتقانىن اتاپ ءوتىپ, قاقتىعىستار مەن شيەلەنىستەر, گەوساياسي تەكەتىرەستەر الەمنىڭ كەز كەلگەن مەملەكەتىنە اسەر ەتەتىن قاۋىپتى ۇردىسكە اينالعانىنا توقتالدى.

– وسىنداي الماعايىپ زاماندا 30 جىلدان اسا ۋاقىت شەشىمىن تاپپا­عان شيەلەنىسكە قاتىستى ازەرباي­جان مەن ارمەنيانىڭ بەيبىتشىلىك دەكلاراتسياسىنا قول قويعانىن ەرەكشە اتاپ وتكىم كەلەدى. بۇل تۇراقتىلىق پەن ەكونوميكالىق ورلەۋگە جول اشاتىن تاريحي مامىلە بولدى. قازىر الەمدەگى گەوساياسي احۋال اسا كۇردەلى, سوندىقتان تۇركى ەلدەرى ورتاق مۇددە جولىندا كۇش جۇمىلدىرۋعا ءتيىس. بۇگىندە جاھان جۇرتى ءبىزدى زور سىن-قاتەرلەرگە توتەپ بەرە الاتىن, بەدەلى مىقتى, ىنتىماعى جاراسقان مەملەكەتتەر رەتىندە تانيدى. بىرقاتار ەل ءبىزدىڭ ۇيىمعا ەرەكشە قىزىعۋشىلىق تانىتۋدا. بۇل رەتتە قازاقستان ىنتىماقتاس­تىق اياسىن كەڭەيتۋگە باعىتتالعان «تۇركى مەملەكەتتەرى ۇيىمى+» فورماتىن قۇرۋ يدەياسىن قولدايدى. وسى باستاما ءبىزدىڭ ۇيىمنىڭ حالىقارالىق بەدەلىن ارتتىرۋعا جول اشاتىنى ءسوزسىز, – دەدى قاسىم-جومارت توقاەۆ.

پرەزيدەنتتىڭ ايتۋىنشا, تۇركى مەملەكەتتەرى اۋماعىندا تۇراقتىلىقتى, قاۋىپسىزدىك پەن بەيبىتشىلىكتى نىعايتۋ ىسىندە ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ ءرولى مەن الەۋەتى ەرەكشە.

– كەڭەستى تولىققاندى حالىقارالىق ۇيىمعا اينالدىرۋ ۇدەرىسىنە قولداۋ كورسەتكەن ازەربايجان تاراپىنا, سونداي-اق بارشا تۇركى مەملەكەتتەرىنە شىنايى ريزاشىلىعىمدى بىلدىرەمىن. تۇركى ەلدەرىنىڭ قاۋىپسىزدىكتى نىعايتۋ جانە سىن-قاتەرلەرگە, سونىڭ ىشىندە تەرروريزمگە قارسى تۇرۋ جولىنداعى ماقسات-مۇددەسى – ورتاق, سوندىقتان وسى باعىتتاعى ىقپالداستىعىمىز تابىستى جۇزەگە اسۋدا. ءبارىمىز جاھاندىق قاۋىپسىزدىكتى ساقتاۋ جولىنداعى باستامالاردى قولداپ كەلەمىز. بىراق ءبىز مۇنىمەن شەكتەلىپ قالماۋىمىز كەرەك, – دەدى مەملەكەت باسشىسى.

قاسىم-جومارت توقاەۆ كوپتەگەن ەلدىڭ شەكاراعا باعىنبايتىن جاڭا قاتەرمەن بەتپە-بەت كەلىپ وتىرعانىن العا تارتىپ, ۇيىم اياسىندا كيبەرقاۋىپسىزدىك كەڭەسىن قۇرۋدى ۇسىندى.

– بۇل كەڭەس مەملەكەتتەرىمىزدىڭ ءىس-قي­مى­لىن ۇيلەستىرىپ, كۇش جۇمىل­دىرۋعا جاعداي جاسايدى. سونىمەن قاتار تسيفر­­لىق قاۋىپسىزدىك پەن تەحنولو­گيا­لىق باي­لانىستى بەكەمدەي تۇسەدى. بيىل قىر­­كۇيەكتە وسى تاقىرىپ بويىنشا الما­تى­دا وتكەن كونفەرەنتسيا ناتيجەلەرى كيبەرقاۋىپسىزدىك سالاسىنداعى ىقپال­داستىقتى كۇشەيتۋ اسا ماڭىزدى ەكەنىن تاعى دا راستادى, – دەدى پرەزيدەنت.

مەملەكەت باسشىسى ەكونوميكالىق ىنتىماقتاستىقتى تۇراقتىلىق پەن ءوسىپ-وركەندەۋدىڭ ءتۇپ نەگىزى رەتىندە اتادى.

– ءبىز 2040 جىلعا دەيىنگى تۇركى الەمى­نىڭ دامۋ باعدارىن تولىق ىسكە اسىرۋعا باسا ءمان بەرۋىمىز قاجەت. بۇگىنگى سامميت وسى جوسپاردى ناقتى شارالارمەن تولىق­تىرۋ­عا ءتيىس. ۇيىمعا قاتىسۋشى ءار مەم­لەكەت­تىڭ وزىنە ءتان ارتىقشىلىعى جانە جە­تىس­تىگى بار. سوعان قاراماستان ۇيىم اياسىن­­دا ساۋدا-ەكونوميكا سالاسىنداعى ءىرى جو­بالاردى جۇزەگە اسىرۋ ءۇشىن ناقتى تەتىكتەر ۇسىنىلعان. سونىڭ ءبىرى – تۇركى ينۆەس­تي­­تسيالىق قورى. وسى قارجى ۇيىمى­­نىڭ مۇمكىندىكتەرىن بارىنشا پايدا­لا­نۋى­مىز كەرەك. بيىل تۇركىستاندا ەلدەرى­مىزدىڭ ەكونوميكا جانە ساۋدا مينيستر­لەرى باس قوسادى. سول كەزدە قور قار­جى­لان­دى­راتىن جوبالار ءتىزى­مىن جاسا­عان ءجون بولار ەدى. ونەركاسىپ سالا­­سىنداعى ىقپال­داس­تىق ەلدەرىمىزدىڭ ەكونو­مي­كا­سىن ءارتا­راپ­تاندىرۋ ىسىندە ماڭىزدى ءرول اتقارادى. وسى ورايدا, تۇركى ساۋدا-ونەر­كاسىپ پالا­تا­سىنىڭ الەۋەتى زور دەپ ەسەپ­تەيمىز. كەلەسى جىلى وسى پالاتاعا قازاق­ستان تور­اعا بولادى. بۇل باعىتتا ءبىز ناق­تى جوبا­لارعا باسىمدىق بەرەتىن ونەر­كاسىپ­تىك كوو­پە­راتسيا باعدارلاماسىن قابىل­داۋدى ۇسى­نامىز, – دەدى قاسىم-جومارت توقاەۆ.

كولىك-لوگيستيكا سالاسىنداعى ارىپتەستىك ارتادى

پرەزيدەنت كولىك-لوگيستيكا سالا­سىنداعى ارىپتەستىكتى جاڭا دەڭگەيگە كوتەرۋدى باستى مىندەتتىڭ ءبىرى سانايدى.

– ەلدەرىمىز شىعىس پەن باتىستى, وڭتۇس­تىك پەن سولتۇستىكتى جالعايتىن توعىز جول­دىڭ تورابى – ەۋرازيا تورىندە ورنالاس­قان. قازىر قازاقستان اۋماعى ارقىلى 5 حالىقارالىق تەمىرجول ءدالىزى وتەدى. ازيا مەن ەۋروپا اراسىندا تاسىمالداناتىن جۇكتىڭ 85 پايىزعا جۋىعى قازاقستان ارقىلى جونەلتىلەدى. جاقىندا ءبىز «دوستىق – مويىنتى» تەمىرجولىنىڭ ەكىنشى جەلىسىن ىسكە قوستىق. بۇل قادام ترانسقازاقستان تەمىرجول ءدالىزىن قارقىندى دامىتۋعا ىقپال ەتەدى. جاڭا جول جۇك تاسىمالىنىڭ كولەمىن 5 ەسە ارتتىرۋعا مۇمكىندىك بەرەدى. بۇدان باسقا تاعى دا ەكى ماڭىزدى تەمىرجول سالىنىپ جاتىر. وسى جوبالار ايماقتىق لوگيستيكانى ءارتاراپتاندىرۋ ىسىنە تىڭ سەرپىن بەرەتىنى انىق. ترانسكاسپي حالىقارالىق كولىك باعدارى ەۋرازياداعى جول تورابىنىڭ ستراتەگيالىق بولىگىنە اينالدى. كەيىنگى 5 جىلدا ورتا ءدالىز ارقىلى تاسىمالداناتىن جۇك كولەمى 6 ەسە ءوستى. جاقىندا ۇيىمعا مۇشە مەملە­كەتتەردىڭ كولىك مينيسترلەرى الماتىدا باس قوستى. تاراپتار كەزدەسۋدە وسى جول باعدارىنا قاتىستى بىرقاتار كەلىسىمگە قول جەتكىزدى. بۇل رەتتە ءبىز تۇركى مەملە­كەت­تەرىن ورتا ءدالىز بويىنداعى اۋە حابتارى, تەمىرجول بەكەتتەرى جانە تەڭىز پورت­تارى ينفراقۇرىلىمىن جاڭعىرتۋعا بەل­سەنە اتسالىسۋعا شاقىرامىز. قازىر كولىك-ترانزيت سالاسىن تسيفرلاندىرۋعا قاتىس­ت­ى جۇمىس قارقىندى ءجۇرىپ جاتىر. وسى وراي­دا جاساندى ينتەللەكت تەحنولوگياسىن پاي­­دالانۋ ءتيىمدى بولاتىنى ءسوزسىز. سون­­دىق­­تان بەدەلدى ساراپشىلاردى تارتا وتى­­رىپ, ۇيىم اياسىندا ارنايى تسيفرلىق موني­­تو­رينگ ورتالىعىن قۇرۋ ماسەلەسىن تالقى­­لاۋ­دى ۇسىنامىز, – دەدى مەملەكەت باسشىسى.

پرەزيدەنت قازاقستان تسيفرلاندىرۋ ىسىنە, سونىڭ ىشىندە جاساندى ينتەللەكت سالاسىن دامىتۋعا ەرەكشە ءمان بەرەتىنىن مالىمدەپ, تولىق تسيفرلىق ەل بولۋدى ستراتەگيالىق ماقسات رەتىندە ايقىنداعانىن جەتكىزدى.

– جاساندى ينتەللەكتىنى جاپپاي دامىتۋ ءۇشىن بىلىكتى ماماندار دايارلاۋدى قولعا الدىق. باعدارلاما اياسىندا جىل باسىنان بەرى 400 مىڭنان اسا ستۋدەنت ارنايى ءبىلىم الدى. سونداي-اق جاساندى ينتەللەكت ماماندارىن وقىتاتىن تۇڭعىش زەرتتەۋ ۋنيۆەرسيتەتىن اشۋدى جوسپارلاپ وتىرمىز. قازاقستان وسى وقۋ ورداسىندا ءبىلىم الۋعا نيەت بىلدىرگەن تۇركى ەلدەرىنىڭ جاستارىنا ارنايى گرانتتار بولۋگە دايىن, – دەدى مەملەكەت باسشىسى.

بۇدان بولەك, قاسىم-جومارت توقاەۆ اتالعان سالالار بويىنشا ۇيىم اياسىندا جۇزەگە اسىرۋعا بولاتىن بىرقاتار باستاماعا توقتالىپ ءوتتى.

– جۋىردا استانادا Alem.AI جاساندى ينتەللەكت ورتالىعى اشىلدى. سونىڭ نەگىزىندە تۇركى مەملەكەتتەرى ۇيىمىنىڭ تسيفرلىق يننوۆاتسيالار ورتالىعىن قۇرۋدى ۇسىنامىز. بۇل ورتالىق ستارتاپتاردى قولداپ, بىرلەسكەن جوبالاردى دامىتۋعا جول اشادى. جاساندى ينتەللەكت سالاسىندا تاجىريبە الماسۋعا جانە ۆەنچۋرلىك كاپيتال تارتۋعا مۇمكىن­دىك بەرەدى. ءبىز تسيفرلاندىرۋ جانە جا­ساندى ينتەللەكتىنىڭ الەۋەتىن حالىقتارى­مىز­دىڭ يگىلىگى ءۇشىن ۇتىمدى پايدالانۋى­مىز قاجەت. سونىمەن قاتار جاڭا تەحنو­لوگيالاردان تۋىندايتىن تاۋەكەل­دەر مەن سىن-قاتەرلەردىڭ الدىن الۋى­مىز كەرەك. سوندىقتان كەلەسى جىلى قازاق­ستاندا وتەتىن ۇيىمنىڭ بەيرەسمي ءسام­ميتىن «جاساندى ينتەللەكت جانە تسيفر­لىق دامۋ» تاقىرىبىنا ارناۋدى ۇسى­نامىن. وسى جيىننىڭ قارساڭىندا بىلىكتى ساراپشىلاردىڭ باسىن قوسىپ, حالىقارالىق كونفەرەنتسيا ۇيىم­داس­تىرۋعا دايىنبىز, – دەدى پرەزيدەنت.

قاسىم-جومارت توقاەۆ قازىرگى جاعدايدا ەنەرگەتيكا ماسەلەسىنە دە باسا ءمان بەرۋ كەرەك ەكەنىن ايتتى.

– بۇل – ەكونوميكامىزدىڭ تىرەگى, ستراتەگيالىق ارىپتەستىگىمىزدىڭ نەگىزى. بۇگىندە ءبىز ورتاق ينفراقۇرىلىمدىق جوبالاردى جۇزەگە اسىرۋدامىز. ەنەرگيا تاسىمالداۋدىڭ قاۋىپسىز ءارى ىڭعايلى جولدارىن قاراستىرىپ جاتىرمىز. قازاقستان, ازەربايجان, وزبەكستان اراسىنداعى جاسىل ەنەرگيا ءدالىزى – وسى سالاداعى جەمىستى ىنتىماقتاستىق ۇلگىسى. سونىمەن قاتار جاڭارتىلاتىن ەنەرگيا كوزدەرىنە, ەڭ الدىمەن, كۇن ەنەرگياسىنا ايرىقشا نازار اۋدارۋ قاجەت دەگەن ويدامىز. وسىعان وراي, تۇركى مەملەكەتتەرى ۇيىمى ايا­سىندا ەنەرگيا تيىمدىلىگى جونىندەگى وزىق تاجىريبە كەڭەسىن قۇرۋدى ۇسىنامىز. دەگەنمەن مۇناي مەن گازدى, ۋراندى, كومىردى, سيرەك كەزدەسەتىن مينەرالداردى يگەرۋ جانە ولاردى ءتيىمدى پايدالانۋ قازاقستاننىڭ ەنەرگەتيكالىق ستراتەگياسىنىڭ نەگىزى بولىپ قالا بەرەدى, – دەدى پرەزيدەنت.

كاسپي تەڭىزىنىڭ احۋالى – ورتاق ماسەلە

مەملەكەت باسشىسىنىڭ پىكىرىنشە, قازىر الەمدە اسا كۇردەلى ماسەلەگە اينال­عان سۋ تاپشىلىعى تاياۋ ارادا ورتا ازيا­داعى ەڭ وزەكتى سىن-قاتەر بولۋى مۇمكىن.

– وزەن-سۋلاردىڭ ورتاق يگىلىك ەكەنىن ەسكەرە وتىرىپ, ونى ءتيىمدى پايدالانۋ ءۇشىن جاڭا تاسىلدەر كەرەك دەپ سانايمىز. سۋارۋ جۇيەسىنە تسيفرلىق باقىلاۋ ورناتۋ, تامشىلاتىپ سۋارۋ ادىستەرىن كەڭى­نەن قولدانۋ, سۋقويمالارىنىڭ تيىمدىلىگىن ارتتىرۋ جونىندە بىرلەسكەن باعدارلاما قابىلداۋعا بولادى. قازىر كاسپي تەڭىزى تارتىلىپ بارا جاتقانىن بىلەسىزدەر. بۇعان ءبارىمىز الاڭداپ وتىرمىز. قارت كاسپيدىڭ تۇركى جۇرتى ءۇشىن ورنى قاشاندا بولەك. ونى حالىقتارىمىزدىڭ اراسىنداعى دانەكەر دەۋگە بولادى. كەيىنگى جىلدارى تەڭىز دەڭگەيىنىڭ تومەندەۋى ايماقتىڭ ەكولوگياسى مەن ەكونوميكاسىنا كەرى اسەرىن تيگىزىپ وتىر. بۇل – جاھاندىق اۋقىمداعى ماسەلە. مەن مۇنى شانحاي ىنتىماقتاستىق ۇيىمىنىڭ سامميتىندە جانە بىرىككەن ۇلتتار ۇيىمى باس اسسامبلەياسىنىڭ مەرەكەلىك سەسسيا­سىندا ايتتىم. ءبىز تامىرلاس جانە شەكارالاس ەلدەر رەتىندە كاسپي تەڭىزىنىڭ احۋالىن جاقسارتۋعا باسا ءمان بەرۋىمىز كەرەك. مەن تۇركى مەملەكەتتەرىن وسى باعىتتا كۇش بىرىكتىرىپ, بىرلەسكەن جوبالار ازىرلەۋگە, حالىقارالىق باستامالاردى قولداۋعا شاقىرامىن. قازاقستان بىرىككەن ۇلتتار ۇيىمىنىڭ قولداۋىمەن كەلەسى جىلى ساۋىردە وڭىرلىك سامميت وتكىزۋدى جوسپارلاپ وتىر. تاقىرىپ – «تۇراقتى بولاشاق جولىنداعى ورتاق كوزقاراس». ءبىز تۇركى ەلدەرى وسى ءسامميتتىڭ جۇمىسىنا جوعارى دەڭگەيدە بەلسەنە قاتىسادى دەپ ۇمىتتەنەمىز, – دەدى قاسىم-جومارت توقاەۆ.

مەملەكەت باسشىسى ۇيىمعا مۇشە ەلدەر اراسىندا ساۋدا-ەكونوميكالىق جانە ساياسي ىقپالداستىقپەن قاتار, مادەني-گۋمانيتارلىق بايلانىس تا نىعايىپ كەلە جاتقانىن تىلگە تيەك ەتتى.

– بيىل اقتاۋ قالاسى تۇركى الەمىنىڭ مادەني استاناسى بولىپ جاريالاندى. سونىڭ اياسىندا بىرقاتار ءىس-شارا ۇيىمداستىرىلدى. كاسپي جاعالاۋىندا تۇركى مادەنيەتىنىڭ فەستيۆالى ءوتتى. وسى ماڭىزدى ءىس-شاراعا 100 مىڭنان اسا كورەرمەن قاتىستى. بۇعان قوسا بيىل الماتى قالاسى تۇركى الەمى جاستارىنىڭ استاناسى اتاندى. ءبىز وسكەلەڭ ۇرپاقتى باۋىرلاستىق رۋحىندا تاربيەلەپ, جاستارىمىزدىڭ مادەني ىقپالداستىعىن نىعايتۋدى قولعا الۋىمىز قاجەت. وسىعان وراي, كەلەسى جىلى الماتىدا كرەاتيۆتى ەكونوميكا فورۋمىن وتكىزۋدى ۇسىنامىز. مۇنداي قادام جاس­تارىمىزدى جاقىنداستىرۋعا, ولاردىڭ ءبىلىمىن جانە بىلىگىن ارتتىرۋعا مۇمكىندىك بەرەدى. قازاقتا «ونەرلى ورگە جۇزەدى» دەگەن ءسوز بار. شىن مانىندە, ونەر, ءبىلىم, عىلىم قۇندىلىقتارى وركەنيەتىمىزدىڭ ءورىسىن كەڭەيتۋگە ىقپال ەتەدى. قازاقستاندا ەلدەرىمىزدىڭ زيالى قاۋىم وكىلدەرى­نىڭ باسىن قوسىپ, ارنايى ءىس-شارا وتكىز­گەن ورىندى بولار ەدى. بۇل ءىس-شارانى ۇيىمىمىزدىڭ اقساقالدار كەڭەسىنىڭ اياسىندا وتكىزۋگە بولادى. ونىڭ ۇستىنە, تۇركى الەمىن زەرتتەۋشىلەر كلۋبىن قۇرۋدى ۇسىنامىز. ونى تۇركى اكادەمياسىنىڭ نەگىزىندە قالىپتاستىرۋعا بولادى, – دەدى قاسىم-جومارت توقاەۆ.

پرەزيدەنت ءسوز سوڭىندا تۇركى حالىق­تارىنىڭ تۇتاستىعى مەن ىنتىماعىن نىعايتا تۇسۋگە شاقىردى.

– ازەربايجاننىڭ ايگىلى اقىنى ءارى وسى تاريحي جەردىڭ تۋماسى باحتيار ۆاحابزا­دەنىڭ «تۇرىكتىڭ تۇرىككە دۇشپان­دىق جاساۋعا حاقىسى جوق!» دەگەن وسيەتى بار. ءبىز اعا بۋىننىڭ ۇلاعاتتى سوزدەرىن جادى­مىزدا ساقتاپ, تۇركىلەردىڭ ءتۇبى ءبىر تۋىس, بىرلىگى بەكەم باۋىر ەكەنىن بۇكىل الەم­گە پاش ەتىپ كەلەمىز, – دەدى ول.

مەملەكەت باسشىسى ۇيىمعا توراعالىق ەتەتىن ازەربايجان پرەزيدەنتى يلحام اليەۆكە مول تابىس جانە ساتتىلىك تىلەدى.

سامميتتە ازەربايجان پرەزيدەنتى يلحام اليەۆ, قىرعىزستان پرەزيدەنتى سادىر جاپاروۆ, تۇركيا پرەزيدەنتى رەجەپ تايپ ەردوعان, وزبەكستان پرەزيدەنتى شاۆكات ميرزيوەۆ, ماجارستان پرەمەر-ءمينيسترى ۆيكتور وربان, تۇرىكمەنستان حالك ماسلاحاتىنىڭ توراعاسى گۋربانگۋلى بەردىمۇحامەدوۆ, تۇركى مەملەكەتتەرى ۇيىمىنىڭ باس حاتشىسى كۋبانىچبەك ومىراليەۆ جانە بايقاۋشى تاراپتاردىڭ باسشىلارى ءسوز سويلەدى.

تۇركى مەملەكەتتەرى ۇيىمى ءحىى ءسام­ميتىنىڭ قورىتىندىسى بويىنشا گابالا دەكلاراتسياسىنا قول قويىلدى.