ەكى جىل بۇرىن مەملەكەت باسشىسى جولداۋىندا بالالارعا قاتىستى زورلىق-زومبىلىقتىڭ بارلىق تۇرلەرى ءۇشىن جازانى قاتاڭداتۋدى تاپسىرعانى ءمالىم. سول ورايدا بالا قۇقىقتارى جونىندەگى ۋاكىل دينارا زاكيەۆا الەۋمەتتىك جەلىدە جازبا جاريالادى, دەپ جازادى Egemen.kz.
بالا قۇقىقتارى جونىندەگى ۋاكىل ءوز جازباسىندا وسى كەزەڭ ىشىندە بالالاردىڭ قاۋىپسىزدىگىن قامتاماسىز ەتۋگە باعىتتالعان ماڭىزدى زاڭدار, باعدارلامالار, قاۋلىلار قابىلدانىپ, ولاردىڭ جۇزەگە اسىرىلۋى باستالعانىن, بۇل شارالار, ەڭ الدىمەن, زورلىق-زومبىلىقتىڭ الدىن الۋ جانە بالالاردى قورعاۋ سالاسىندا كەشەندى جۇيە قالىپتاستىرۋعا باعىتتالعانىن اتاپ وتكەن.
«بۇگىندە وڭىرلەردە اكىمدىكتەر جانىنان بالالاردىڭ قۇقىقتارىن قورعاۋ باسقارمالارى قۇرىلىپ جاتىر, وتباسىن قولداۋ ورتالىقتارى مەن ءموبيلدى توپتار اشىلىپ جاتىر, قامقورشىلىق ورگاندارىنىڭ قىزمەتكەرلەرى سانى ارتىپ كەلەدى. مەملەكەتتىك بايلانىس ورتالىعى ىسكە قوسىلىپ, مەكتەپتەردە QR 111 جۇيەسى ەنگىزىلدى. بۇل بالالارعا كومەككە تىكەلەي جانە جەدەل جۇگىنۋگە مۇمكىندىك بەرەدى.
قازىرگى ۋاقىتتا باستى مىندەت – قابىلدانعان بارلىق شارالاردى ءتيىمدى جانە ساپالى ىسكە اسىرۋ. وسى باعىتتا مەملەكەتتىك ورگاندار مەن اكىمدىكتەر مەملەكەتتىك كەڭەسشى ەرلان تىنىمباي ۇلى قاريننىڭ جەتەكشىلىگىمەن بىرلەسىپ جۇمىس جۇرگىزىپ جاتىر», دەپ جازدى د.زاكيەۆا.
دينارا زاكيەۆانىڭ ايتۋىنشا ايماقتاردا شارالاردى جۇزەگە اسىرۋ بارىسىندا شەشىمدى قاجەت ەتەتىن جۇيەلى ماسەلەلەرمەن قاتار, قىسقا ۋاقىت ىشىندە بايقالعان وڭ وزگەرىستەر دە بار. بۇل ناتيجەلەر – ەلدەگى بالالاردىڭ قۇقىقتارىن قورعاۋ ءىسىنىڭ جاڭا ساپالىق دەڭگەيگە كوتەرىلگەنىنىڭ ايقىن دالەلى.
اعىمداعى جىلدىڭ 9 ايىنىڭ قورىتىندىسىمەن قىلمىستىق كودەكستىڭ بەس بابى بويىنشا بالالاردىڭ جىنىستىق تيىسپەۋشىلىگىنە قارسى قىلمىستار سانى 18%-عا ازايعان, ال تەك ءومىر بويىنا باس بوستاندىعىنان ايىرۋ جازاسى قالدىرىلعان پەدوفيليا فاكتىلەرى 24%-عا تومەندەگەن.
«ادام ءولتىرۋ» جانە «اۋىر زيان كەلتىرىپ, ولىمگە اكەلگەن» باپتار بويىنشا قىلمىستار سانى سايكەسىنشە 22% جانە 50%-عا ازايدى.
بالالارعا قاتىستى اۋىر جانە اسا اۋىر قىلمىستاردىڭ ازايۋى — قابىلدانعان شارالاردىڭ تيىمدىلىگىنىڭ ايعاعى ەكەنىن جازعان دينارا زاكيەۆانىڭ ايتۋىنشا ءار ستاتيستيكالىق كورسەتكىشتىڭ ارتىندا – ءبىر بالانىڭ تاعدىرى تۇر.
ء«بىزدىڭ ماقساتىمىز – ءار بالانىڭ ءومىرى ءۇشىن كۇرەسۋ, مۇنداي قىلمىستاردىڭ مۇلدە بولماۋى ءۇشىن بارلىق كۇش-جىگەرىمىزدى سالۋ.
بالالار اراسىنداعى ءسۋيتسيدتىڭ الدىن الۋ ماسەلەسىنە ەرەكشە نازار اۋدارىلۋدا. بارلىق وڭىردە پسيحولوگيالىق قولداۋ ورتالىقتارىنىڭ اشىلۋى جانە بىرىڭعاي پروفيلاكتيكالىق باعدارلامانىڭ ەنگىزىلۋى جاعدايدى تۇراقتاندىرا باستادى.
كەيىنگى 10 جىلدا العاش رەت الماتى وبلىسىندا كامەلەتكە تولماعاندار اراسىنداعى سۋيتسيد جاعدايلارىنىڭ ايتارلىقتاي ازايۋى تىركەلدى.
دەگەنمەن, الدا ءالى كوپ ءارى مۇقيات اتقارىلۋى ءتيىس جۇمىس تۇر», دەپ جازدى ول.
ونىڭ ايتۋىنشا نەگىزگى سەبەپتەردى تەرەڭ زەرتتەپ, تاۋەكەلدەردى ۋاقىتىلى انىقتاپ, بالالارعا ساپالى سۇيەمەلدەۋ مەن پسيحولوگيالىق كومەك كورسەتۋدى قامتاماسىز ەتۋ قاجەت.
سونىمەن قاتار, بالالار سۋيتسيدتەرىنىڭ 60%-ى وتباسىنداعى قيىن قارىم-قاتىناستارمەن بايلانىستى.
«سوندىقتان بىزگە كەلىپ تۇسەتىن نەمەسە بالالار ءوز ومىرلەرىن قيۋ الدىندا قالدىرىپ كەتەتىن مىڭداعان حاتتار مەن حابارلامالارعا سۇيەنە وتىرىپ, – وتباسىنان تۇسىنىستىك پەن جىلۋ تاپپاعان, كىنا مەن قورقىنىشتان جالعىز قالعان بالالاردىڭ ءۇنىن جەتكىزە وتىرىپ, مەن اتا-انالار مەن بارلىق ەرەسەكتەرگە ۇندەۋ جاساعىم كەلەدى.
بالاعا ەڭ كەرەگى – سىزدەردىڭ ماحابباتتارىڭىز بەن قامقورلىقتارىڭىز.
بالا ارقاشان سىزدەردىڭ ونىڭ قاسىندا ەكەنىن, ونىڭ جالعىز ەمەستىگىن, قانداي جاعداي بولماسىن وتباسىنىڭ قولداۋى مەن قورعاۋىن سەزىنۋى كەرەك», دەپ ءسوزىن تۇيىندەگەن بالا قۇقىقتارى جونىندەگى ۋاكىل دينارا زاكيەۆا.