قاراعاندى وبلىسىندا جولاۋشىلار پويىزى مەن جەڭىل اۆتوكولىك سوقتىعىسىپ, ءۇش ادام مەرت بولدى. قازا تاپقانداردىڭ ەكەۋى — ءبىر وتباسىنىڭ مۇشەلەرى, دەپ جازادى Egemen.kz.
قايعىلى وقيعا 17 قىركۇيەك كۇنى ساعات 00:54 شاماسىندا اقادىر – قاراعاندى ۋچاسكەسىندەگى جارىق-داريا تەمىرجول وتكەلىندە بولعان. Mazda كولىگى وتكەلدەن وتپەك بولعان كەزدە پويىزدىڭ استىنا تۇسكەن.
پويىز ساعاتىنا 92 كم جىلدامدىقپەن كەلە جاتقان. ماشينيست جەڭىل كولىكتى بايقاپ, شۇعىل تەجەگىشتى باسقانىمەن, سوقتىعىسۋدىڭ الدىن الۋ مۇمكىن بولماپتى.
- قايعىلى وقيعا 17 قىركۇيەك ساعات 00:54-تە اقادىر – قاراعاندى ۋچاسكەسى جارىق-داريا ارالىعىنداعى تەمىرجول وتكەلىندە ورىن الدى.اپات سالدارىنان اۆتوكولىك جۇرگىزۋشىسى مەن ەكى جولاۋشى اۋىر جاراقاتتان قازا تاپتى-دەپ حابارلادى «قازاقستان تەمىر جولى» كومپانياسى.
قازىر اتالعان فاكتى بويىنشا قىلمىستىق ءىس قوزعالىپ, وقيعانىڭ ءمان-جايى انىقتالىپ جاتىر.
جىل باسىنان بەرى ەلىمىزدە پويىزداردىڭ 972 رەت شۇعىل تەجەۋىنە تۋرا كەلگەن.ونىڭ ىشىندە 211 جاعداي ادامدارمەن, ال 725 وقيعا ءۇي جانۋارلارىمەن بايلانىستى. بەلگىلەنبەگەن جەردەن وتكەنى ءۇشىن 29 350 ازامات اكىمشىلىك جاۋاپكەرشىلىككە تارتىلدى.
تەمىرجول قۇرامىمەن بايلانىستى جول-كولىك اپاتتارىنان 41 ادام زارداپ شەككەن, ولاردىڭ جارتىسىنا جۋىعى قازا تاپقان. قۇرباندار اراسىندا كامەلەتكە تولماعان بالالار دا بار.
مامانداردىڭ ايتۋىنشا, اپاتتاردىڭ نەگىزگى سەبەبى — قاۋىپسىزدىك ەرەجەلەرىن ەلەمەۋ. كوپ جاعدايدا ادامدار رۇقسات ەتىلمەگەن جەردەن ءوتىپ, ءتىپتى ماس كۇيىندە تەمىرجولعا شىعىپ, ءوز ءومىرىن قاتەرگە تىگەدى.
جالپى ەل اۋماعىندا جول-كولىك اپاتتارىنىڭ دا كۇرت ءوسۋى بايقالادى. بيىل ولاردىڭ سانى 42%-كە ارتقان. جىل باسىنان بەرى 22,5 مىڭنان استام اپات تىركەلىپ, 32 مىڭنان اسا ادام جاراقات الدى. جۇگەنسىز جۇرگىزۋشىلەردىڭ ارەكەتىنەن 1446 ادام قازا تاپقان, ونىڭ ىشىندە 209 بالا بار.