جاقسى اسەر الىپ جاتىرمىن. باۋىرلاس مۇسىلمان رەتىندە قازاقستانعا دەگەن ماقتانىش سەزىمىمدى, قۇرمەتىمدى جەتكىزگىم كەلەدى. ويتكەنى قازىر الەمگە كوز جۇگىرتسەك, قايشىلىقتار, قاقتىعىستار, ارانداتۋ, قوعامدى جىك-جىككە بولەتىن تەرىس پيعىلدى ۇراندار كوبەيىپ بارادى.
وسىنداي قيىن-قىستاۋ احۋال قىسقان ساتتە قازاقستان بارشا ادامزاتتىڭ ءتۇرلى ءدىني ۇستانىمداعى رۋحاني كوشباسشىلارىن شىعىس پەن باتىستان, سولتۇستىك پەن وڭتۇستىكتەن, ءتۇرلى مادەني جانە ءدىني ورتادان جيناپ, بىرنەشە جىلدان بەرى ورتاق ديالوگ ورناتۋعا باستاماشى بولىپ كەلەدى.
وسى سەزگە قاتىسا وتىرىپ, بەيبىتشىلىكتىڭ مۇمكىن ەكەنىنە, بىرلىكتىڭ ورناي الاتىنىنا كوز جەتكىزەسىڭ. ارتۇرلىلىكتى جەكە تۇلعانىڭ نەمەسە حالىقتىڭ بولمىسىنا تونەتىن قاۋىپ ەمەس, كەرىسىنشە بايلىق ەكەنىن سەزىنەسىڭ. سوندىقتان ءدال قازىرگىدەي الەمدىك قاقتىعىستار ءورشىپ تۇرعان كەزەڭدە مۇنداي الاڭداردىڭ ماڭىزى اسا زور. مەن مۇسىلمان رەتىندە قازاقستاننىڭ وسىنداي يگى باستامانى قولعا الىپ, بىتىمگەرلىك باعىتتا ۇلكەن ءرول ويناپ وتىرعانىنا ەرەكشە ريزامىن. قازاقستان بۇل سەزدى 20 جىلدان اسا ۋاقىت بويى ۇزبەي وتكىزىپ كەلەدى. بۇل – ەلدىڭ بەدەلى مەن جاۋاپكەرشىلىگىنىڭ ايقىن ايعاعى.
استانانىڭ وسىنداي سەنىمدى ديالوگ الاڭىنا اينالۋىنىڭ باستى سەبەبى شاقىرىلعان دەلەگاتتاردىڭ قازاقستانعا دەگەن سەنىمى دەپ ويلايمىن. مۇندا كەلگەن ادامدار ءوزىن جايلى سەزىنەدى. ارينە, ءبىزدىڭ يدەولوگيالىق, ساياسي, ءدىني ايىرماشىلىقتارىمىز بار. بىراق سوعان قاراماستان قازاقستان قوعامى مەن مەملەكەتى ءاربىر وكىلگە قۇرمەتپەن قارايتىنىن بىلەدى. وسىلايشا, پىكىر الشاقتىعىنا قاراماي, ورتاق مىندەتتەمەلەر قابىلداپ, بىرلەسكەن قادامدار جاساۋعا مۇمكىندىك بەرەدى. بۇل – ادىلەتتىرەك ءارى گۋمانيستىك دۇنيەگە باستايتىن ورتاق جول.
سوندىقتان مەن سىزدەردىڭ ەلدى جانە قوعامدى, ەل بيلىگىن وسىنداي باستاماسى ءۇشىن شىن جۇرەكتەن قۇتتىقتايمىن. بۇل – الەمگە قوزعاۋ سالار وتە ماڭىزدى ۇلگى. ايتپاقشى, بيىل العاش رەت ارگەنتينادان وكىل قاتىسىپ وتىر. وسى تۇرعىدان دا مەن بۇل شاقىرتۋدى ءوزىم ءۇشىن ۇلكەن مارتەبە سانايمىن.
مارۋان سارۋار گيل,
ارگەنتيناداعى احماديا مۇسىلمان قاۋىمداستىعىنىڭ يمامى ءارى پرەزيدەنتى