قازىرگى قوعامدا جاساندى ينتەللەكتىنىڭ جەدەل دامۋى كوپتەگەن مۇمكىندىكپەن قاتار, كۇردەلى ەتيكالىق, رۋحاني جانە دۇنيەتانىمدىق سۇراقتاردى دا العا تارتىپ وتىر. قازاقستان پرەزيدەنتى قاسىم-جومارت توقاەۆتىڭ جاساندى ينتەللەكتىنىڭ ەتيكالىق دامۋىن قاداعالايتىن ارنايى كوميسسيا قۇرۋ تۋرالى ۇسىنىسى – اسا ماڭىزدى ءارى دەر كەزىندە كوتەرىلگەن باستاما.
ويتكەنى جاساندى ينتەللەكت تەحنيكالىق قۇرال عانا ەمەس, بىرتىندەپ ادامزاتتىڭ ويلاۋ جۇيەسىنە, دۇنيەتانىمىنا اسەر ەتەتىن كۇشكە اينالىپ كەلەدى. بۇگىندە بۇل ماسەلە جاستارمەن قاتار ەرەسەك بۋىندى دا الاڭداتىپ وتىر. ءوزىم دە ينتەرنەتتى بەلسەندى پايدالانامىن جانە جاساندى ينتەللەكتىمەن جۇمىس ىستەۋگە بىرنەشە رەت تالپىنىپ كوردىم. ەگەر كەز كەلگەن تەحنولوگيانى دۇرىس پايدالانسا, جاقسى كومەكشى قۇرال بولا الادى.
الايدا كوبىنە اياتتارعا قاتىستى سۇراۋ سالساق, بۇرمالايتىن نەمەسە قوسىپ جىبەرەتىن تۇستارى بولادى. قۇراندى جاتقا بىلەتىن ادام رەتىندە مۇنداي بۇرمالاۋشىلىقتى بىردەن بايقايسىڭ. بۇل, ارينە, ويلاندىرادى ءارى الاڭداۋشىلىق تۋدىرادى. وسى رەتتە جاساندى ينتەللەكت جۇمىسىن ناقتى رەتتەپ, رەگلامەنتتەگەن ءجون.
يسلام شاريعاتى مەن باسقا دا ءداستۇرلى دىندەردە مورالدىق-ەتيكالىق نورمالار عاسىرلار بويى قالىپتاسقان. بۇل نورمالار – وزگەرمەيتىن جانە رۋحاني نەگىزگە سۇيەنەتىن قاعيدالار. الەمدىك جانە ءداستۇرلى دىندەر كوشباسشىلارىنىڭ سەزى سەكىلدى باس قوساتىن الاڭداردا وسى ماسەلەلەردى كوتەرىپ, ورتاق ادامي قۇندىلىقتاردى ساقتاۋعا ۇمتىلۋىمىز قاجەت. ءدىن وكىلدەرى مەن رۋحاني كوشباسشىلاردىڭ بۇل ماسەلەگە ارالاسۋى, ءوز ۇستانىمىن ءبىلدىرۋى – ۋاقىت تالابى. سەبەبى بارلىق ءدىننىڭ ءتۇپ-تامىرىندا جاقسىلىق, ادىلەت, مەيىرىم, ادالدىق سەكىلدى ورتاق مورالدىق ەرەجەلەر جاتىر.
ال جاساندى ينتەللەكتىنى دامىتۋ بارىسىندا وسى رۋحاني-ەتيكالىق قاعيدالاردى ەسكەرۋسىز قالدىرۋ ادامزات ءۇشىن قاۋىپتى سالدارعا الىپ كەلۋى مۇمكىن. مەنىڭشە, قۇرىلاتىن كوميسسيا جي تەحنولوگياسىنىڭ دامۋىن ادامگەرشىلىك پەن جاۋاپكەرشىلىك اياسىندا قالىپتاستىرۋعا ءوز ۇلەسىن قوسادى.
كاميل ساميگۋللين,
تاتارستان مۇسىلماندارى ءدىني باسقارماسىنىڭ توراعاسى, تاتارستان رەسپۋبليكاسىنىڭ ءمۇفتيى