پارلامەنت سەناتىنىڭ توراعاسى, الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ باسشىسى ماۋلەن اشىمباەۆ «دىندەر ديالوگى: بولاشاق جولىنداعى سينەرگيا» تاقىرىبىنا ارنالعان VIII سەزد اياسىندا قاتىسۋشىلارمەن ەكىجاقتى كەزدەسۋلەر وتكىزدى.
سەنات سپيكەرى مارتەبەلى مەيماندارعا ءىلتيپات ءبىلدىرىپ, الەمدىك جانە ءداستۇرلى دىندەر كوشباسشىلارى سەزىنىڭ ميسسياسى جاھاندىق سىن-قاتەرلەر جاعدايىندا حالىقتار, مادەنيەتتەر جانە دىندەر اراسىنداعى قارىم-قاتىناستى جولعا قويۋعا تابان تىرەيتىنىن ايتتى. سونداي-اق ول فورۋم يدەيالارىن جان-جاقتى قولداعانى جانە كوزدەلگەن ماقساتتارعا قول جەتكىزۋگە ەلەۋلى ۇلەس قوسقانى ءۇشىن قاتىسۋشىلارعا ريزاشىلىق ءبىلدىردى.
– پرەزيدەنت قاسىم-جومارت توقاەۆ حالىقارالىق قاۋىپسىزدىكتىڭ بەرىك جۇيەسىن قالىپتاستىرۋ ماسەلەسىنە ءاردايىم باسا ءمان بەرەدى. قازىرگى تاڭدا الەم گەوساياسي شيەلەنىستەرمەن, الەۋمەتتىك-ەكونوميكالىق, ەكولوگيالىق جانە كليماتتىق قيىندىقتارمەن, سونداي-اق باسقا دا سىن-قاتەرلەرمەن بەتپە-بەت كەلىپ وتىر. وسى كۇردەلى كەزەڭدە رۋحاني ديپلوماتيا بۇگىنگى پروبلەمالاردى شەشۋدىڭ ءتيىمدى جولدارىن تاباتىن ماڭىزدى تەتىگى بولا الادى. سوندىقتان جاھاندىق سىن-قاتەرلەردى ەڭسەرۋ ءۇشىن ءدىن كوشباسشىلارىنىڭ جاسامپاز ءرولى ايرىقشا مانگە يە جانە وسى جولدا كۇش بىرىكتىرۋدىڭ ماڭىزى زور, – دەدى م.اشىمباەۆ.
قاسيەتتى يەرۋساليمنىڭ جانە بۇكىل پالەستينانىڭ, ارابيانىڭ, سيريانىڭ اسا قاسيەتتى پاتريارحى III فەوفيلمەن كەزدەسۋدە سەزد حاتشىلىعى مەن يەرۋساليم پاتريارحاتى اراسىنداعى ءىس-قيمىلدى ارتتىرۋ ماسەلەسى ءسوز بولدى. سونداي-اق بىرلەسكەن جوبالاردى, ونىڭ ىشىندە الەمدىك جانە ءداستۇرلى دىندەر كوشباسشىلارى سەزى اياسىندا وتكەن ءدىني نىسانداردى قورعاۋ جونىندەگى ارنايى سەسسيادا ايتىلعان ۇسىنىستاردى ىسكە اسىرۋ بارىسى تالقىلاندى.
ال باس اشكەنازي ءراۆۆينى كالمان بەرمەن جانە باس سەفارد ءراۆۆينى دەۆيد يوسەفپەن سۇحبات كەزىندە ماۋلەن اشىمباەۆ قازاقستان ولاردىڭ الەمدە كونفەسسياارالىق جانە دىنارالىق ديالوگتى دامىتۋعا ارنالعان سەزگە بەلسەندى قاتىسۋىن جوعارى باعالايتىنىن ايتتى. كەزدەسۋدە قازاقستان مەن يزرايل اراسىنداعى ەكىجاقتى ىنتىماقتاستىق ماسەلەلەرى دە قوزعالدى.
سونىمەن قاتار ماۋلەن اشىمباەۆ ۆاتيكاننىڭ قاسيەتتى تاعىنىڭ دىنارالىق ديالوگ بويىنشا ديكاستەريا پرەفەكتىسى كاردينال دجوردج دجەيكوب كۋۆاكادپەن كەزدەسىپ, ريم پاپاسى فرانتسيسكتىڭ 2022 جىلعى تاريحي ساپارىنا جانە ونىڭ يسلام مەن حريستيان الەمىن جاقىنداستىرۋعا قوسقان ۇلەسىنە ەرەكشە توقتالدى. سەنات توراعاسى قازاقستان پونتيفيك رەسمي ساپارمەن كەلگەن جانە بەيبىتشىلىك پەن كوپۇلتتى ۇيلەسىمدىلىككە نازار اۋدارىپ, «ادامدار ءبىر-ءبىرىن تىڭدايتىن, ءبىر-ءبىرىن قۇرمەتتەيتىن كەزدەسۋلەر مەن ديالوگ مەكەنى» دەپ اتاعان ساناۋلى ەلدەردىڭ ءبىرى ەكەنىنە توقتالدى.
مارتەبەلى مەيماندار ءوز كەزەگىندە الەمدىك جانە ءداستۇرلى دىندەر كوشباسشىلارى سەزى جاھاندىق اۋقىمدا بۇكىل الەم ءۇشىن اسا وزەكتى دىنارالىق ديالوگ يدەيالارىن دارىپتەۋ ىسىندە ماڭىزدى ءرول اتقاراتىنىن ايتتى. سونداي-اق ولار ايتارلىقتاي بەدەلگە يە رۋحاني كوشباسشىلار تولەرانتتىلىققا, جاقسىلىق پەن ادىلەتكە شاقىرىپ, گەوساياسي جانە باسقا دا قاقتىعىستاردى بەيبىت جولمەن شەشۋگە ىقپال ەتۋى كەرەك دەگەن پىكىردى قولدايتىندارىن جەتكىزدى.