مەملەكەتتىك كەڭەسشى ەرلان قارين رەسەي فەدەراتسياسى التاي رەسپۋبليكاسىنىڭ گورنو-التايسك قالاسىندا ءوتىپ جاتقان «التاي – تۇركىلەردىڭ اتا قونىسى. تۇركى وركەنيەتىنىڭ قالىپتاسۋ تاريحى» اتتى ءىى حالىقارالىق عىلىمي-پراكتيكالىق كونفەرەنتسيا جۇمىسىنا قاتىستى. ءىس-شاراعا ازەربايجان, بەلارۋس, قازاقستان, قىرعىزستان, ماجارستان, موڭعوليا, رەسەي, تۇرىكمەنستان, وزبەكستان مەملەكەتتەرىنىڭ لينگۆيستەرى, ارحەولوگتەرى, التايتانۋشىلارى, تۇركولوگتەرى, تاريحشىلارى جينالدى.
كونفەرەنتسيانىڭ اشىلۋىندا مەملەكەتتىك كەڭەسشى قازاقستان پرەزيدەنتى قاسىم-جومارت توقاەۆتىڭ قاتىسۋشىلارعا ارناعان قۇتتىقتاۋ حاتىن وقىپ بەردى. سونداي-اق رەسەي فەدەراتسياسى پرەزيدەنتىنىڭ كومەكشىسى ۆلاديمير مەدينسكي جانە قىرعىز رەسپۋبليكاسىنىڭ مەملەكەتتىك حاتشىسى مارات يمانقۇلوۆ قۇتتىقتاۋ ءسوز سويلەدى.
ەرلان قارين تۇركى وركەنيەتىن زەرتتەۋگە ارنالعان مۇنداي ءىس-شارالاردىڭ وتكىزىلۋى عىلىم سالاسىنداعى بايلانىستاردى كەڭەيتەتىن ماڭىزدى باعىت ەكەنىن اتاپ ءوتتى. وسى تۇرعىدان العاندا پرەزيدەنت قاسىم-جومارت توقاەۆتىڭ «ترانسالتاي ديالوگىن» باستاۋ جونىندەگى ۇسىنىسىنىڭ ءمانى زور. بۇل وڭىردەگى عىلىمي-گۋمانيتارلىق جانە ەكونوميكالىق ىنتىماقتاستىقتى دامىتۋعا ىقپال ەتۋدى كوزدەيدى. سونىمەن قاتار مەملەكەتتىك كەڭەسشى بيىل قازاقستاندا الەمنىڭ 11 ەلىنەن كەلگەن قوناقتاردىڭ قاتىسۋىمەن «التاي – تۇركى الەمىنىڭ التىن بەسىگى» اتتى حالىقارالىق فەستيۆال ۇيىمداستىرىلعانىن ەسكە سالدى.
ءسوز سوڭىندا ەرلان قارين سىندارلى ءارى اشىق عىلىمي پىكىرتالاس الاڭىن ۇسىنعان ۇيىمداستىرۋشىلارعا العىس ايتىپ, قاتىسۋشىلارعا ناتيجەلى جۇمىس پەن تولايىم تابىس تىلەدى.