مەملەكەت باسشىسىنىڭ قازاقستان حالقىنا جولداۋى – «جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى تسيفرلىق وزگەرىستەر ارقىلى شەشۋ» اياسىندا ءتۋريزمدى دامىتۋ جۇمىسىنىڭ وزەكتەندىرىلۋى قارالدى.
پرەمەر-ءمينيستردىڭ ورىنباسارى ەرمەك كوشەرباەۆ ورتالىق مەملەكەتتىك ورگاندار مەن وڭىرلەردىڭ وكىلدەرىمەن كەڭەس وتكىزدى. كەزدەسۋ بارىسىندا تۋريزم ماسەلەلەرى مەن تۋريستىك ايماقتاردىڭ جاعدايى بويىنشا پرەزيدەنتتىڭ تاپسىرماسىن جۇزەگە اسىرۋ تۋرالى ەسەپتەر تىڭدالدى. سونىمەن قاتار ەلدىڭ نەگىزگى تۋريستىك دەستيناتسيالارىنا جاسالعان ءىسساپارلاردىڭ ناتيجەسى ۇسىنىلدى.
ەرمەك كوشەرباەۆ قابىلدانىپ جاتقان شارالاردىڭ جەتكىلىكسىز ەكەنىن اتاپ ءوتىپ, ينفراقۇرىلىمدى دامىتۋ مەن تۋريستىك نىساندارداعى كورسەتىلەتىن قىزمەتتەردىڭ ساپاسىن ارتتىرۋ جۇمىسىن جەدەلدەتۋدىڭ ماڭىزدىلىعىن ەرەكشە كورسەتتى. مەملەكەت باسشىسىنىڭ جاڭا تاپسىرمالارىن ەسكەرە وتىرىپ, الداعى جازعى ماۋسىمعا كۋرورتتىق ايماقتاردى دايارلاۋعا باسا نازار اۋدارىلدى.
ء«تۋريزمدى دامىتۋ – بۇل تەك قانا ەكونوميكالىق ۇلەس ەمەس, سونىمەن قاتار ەلدىڭ حالىقارالىق ءيميدجىن نىعايتۋدىڭ, ينۆەستيتسيالىق تارتىمدىلىعىن ارتتىرۋدىڭ جانە وڭىرلەردى دامىتۋدىڭ ماڭىزدى فاكتورى. وسى ماقساتتارعا قول جەتكىزۋ ءۇشىن زاماناۋي ينفراقۇرىلىم سالۋمەن قاتار, الەمدىك وزىق تاجىريبەلەرگە سايكەس كەلەتىن جوعارى سەرۆيس ستاندارتتارىن قالىپتاستىرۋ قاجەت», دەدى پرەمەر-ءمينيستردىڭ ورىنباسارى.
ۇكىمەت ءتۋريزمدى ۇلتتىق ەكونوميكانىڭ نەگىزگى درايۆەرلەرىنىڭ ءبىرى رەتىندە قاراستىرادى. ماڭىزدى شارت رەتىندە شاعىن جانە ورتا بيزنەستىڭ بەلسەندى قاتىسۋى, سونداي-اق وتاندىق جانە شەتەلدىك تۋريستەرگە قىزمەت كورسەتۋ ىسىنە حالىقتىڭ كەڭ اۋقىمىن تارتۋ قاجەتتىلىگى اتالدى.
جيىن قورىتىندىسى بويىنشا مەملەكەتتىك ورگاندارعا كۋرورتتىق ايماقتاردىڭ اباتتاندىرۋ ستاندارتتارى مەن تۋريستەردىڭ قاۋىپسىزدىگىن قامتاماسىز ەتۋ, شەتەلدىك قوناقتارعا پاسپورتتىق باقىلاۋ راسىمدەرىن جەڭىلدەتۋ, سۇرانىسقا يە اۋە باعىتتارىنا حالىقارالىق لوۋكوستەرلەردى تارتۋ, سونداي-اق تۋريستىك قىزمەتتەردىڭ ساپاسىن ارتتىرۋعا باعىتتالعان بىرقاتار باسقا دا شارالاردى جۇزەگە اسىرۋ تاپسىرىلدى.