قايتارىلعان قارجىعا – مەديتسينالىق پۋنكت

ءوڭىردىڭ شەت اۋدانى ەڭبەكشىل اۋىلىندا جاڭا مەديتسينالىق پۋنكت جۇمىسىن باستادى. الەۋ­مەتتىك نىسان مەملەكەت باسشىسى­نىڭ اۋىلدىق جەرلەردەگى ينفراقۇ­رى­لىمدى دامىتۋ جونىندەگى تاپ­سىر­ماسىن جۇزەگە اسىرۋ شەڭبە­رىندە ەلگە قايتارىلعان زاڭسىز يەل­ەنگەن اكتيۆتەر ەسەبىنەن سالىندى.

مەديتسينالىق پۋنكت 200-دەن استام تۇرعىنعا قىزمەت كورسەتۋگە ارنالعان ءارى زاماناۋي قۇرال-جاب­دىقتارمەن جاراقتاندىرىلعان. عيماراتتا دارىگەرگە دەيىنگى قاراۋ, تەكسەرۋ مەن ەم-شارالار كابينەت­تەرى بار. شۇعىل جاعدايلارعا جەدەل دەن قويۋ ءۇشىن مەكەمەگە اۋدان­دىق اۋرۋحانانىڭ رەانيموبيل كولىگى بەكىتىلگەن.

شەت اۋدانىندا اشىلعان مەدي­تسينالىق پۋنكت وڭىردە قايتارىلعان اكتيۆتەر ەسەبىنەن جۇزەگە اسىرىلىپ جاتقان جالعىز مەديتسينالىق جوبا ەمەس. جىلاندى اۋىلىندا دا جاڭا مەدي­تسينالىق پۋنكتتىڭ قۇرىلىسى ءجۇرىپ جاتىر.

قاراعاندى وبلىسىندا ارناۋلى مەملەكەتتىك قوردان بولىنگەن قارا­جاتقا جوسپارلانعان 51 مەديتسي­نالىق مەكەمەنىڭ 24-ءى سالىندى. ونىڭ 11-ءى پايدالانۋعا بەرىلدى. قالعان 27 نىساننىڭ قۇرىلىسى جالعاسىپ جاتىر. ولاردى تاپسىرۋ بيىل قىركۇيەك ايىنىڭ سوڭىنا جوسپارلانىپ وتىر.

جاڭا مەديتسينالىق نىسانداردى اشۋ بو­يىنشا جۇمىستار پرەزيدەنت قاسىم-جومارت توقاەۆتىڭ باستاماسىمەن قابىل­دان­عان «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى ايا­سىندا جۇرگىزىلۋدە. بۇگىنگى تاڭدا 655 جوبانىڭ 540-ى جۇزەگە اسىرىلدى.