پرەزيدەنت قاسىم-جومارت توقاەۆتىڭ «جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى تسيفرلىق وزگەرىستەر ارقىلى شەشۋ» اتتى جولداۋى قارۋلى كۇشتەرىمىزدىڭ اسكەري قىزمەتشىلەرى اراسىندا زور قىزىعۋشىلىق پەن تولىق قولداۋعا يە بولدى. جەكە قۇرام مەملەكەت باسشىسىنىڭ جاھاندىق تەحنولوگيالىق ترانسفورماتسيالار جاعدايىندا ەل دامۋىنىڭ باسىم باعىتتارى جانە ۇلتتىق قاۋىپسىزدىكتى قامتاماسىز ەتۋدەگى تسيفرلىق تەحنولوگيالاردىڭ ءرولىن كۇشەيتۋ جونىندەگى ستراتەگيالىق ۇندەۋىن ەرەكشە ىقىلاسپەن قابىلدادى.
مەملەكەت باسشىسىنىڭ جىل سايىنعى باعدارلامالىق قۇجاتتارى ەلىمىزدەگى احۋالعا ءادىل باعا بەرىپ قانا قويماي, الداعى ماقسات-مىندەتتەردى دە ناقتى بەلگىلەپ وتىرادى. بيىلعى جولداۋدىڭ ەرەكشەلىگى جاساندى ينتەللەكت تەحنولوگيالارىن ءتيىمدى پايدالانۋ, بارلىق سالاعا تسيفرلىق ترانسفورماتسيانى ەنگىزۋ, سونداي-اق ەنەرگەتيكا سالاسىن دامىتۋ, ونىڭ ىشىندە ەلىمىزدىڭ ەنەرگەتيكالىق قاۋىپسىزدىگى مەن تەحنولوگيالىق ورلەۋىنىڭ نەگىزگى تەتىگى رەتىندە اتوم ەلەكتر ستانسالارىن سالۋ ماسەلەسىنە باسا نازار اۋدارىلۋىندا بولىپ وتىر.
پرەزيدەنت اتاپ وتكەندەي, جاساندى ينتەللەكت پەن تسيفرلاندىرۋ ەل ەكونوميكاسىن ىلگەرىلەتەتىن قوزعاۋشى كۇشكە, باسقارۋ ساپاسىن ارتتىراتىن قۇرالعا ءارى ۇلتتىق قاۋىپسىزدىكتى قامتاماسىز ەتۋدىڭ سەنىمدى تەتىگىنە اينالۋعا ءتيىس. مەملەكەت باسشىسى يننوۆاتسيالىق تەحنولوگيالاردى ونەركاسىپ, ءبىلىم بەرۋ, دەنساۋلىق ساقتاۋ جانە قورعانىس سالالارىنا ەنگىزۋدىڭ ماڭىزدىلىعىن اتاي وتىرىپ, ەلىمىزدىڭ جاھاندىق تەحنولوگيالىق ۇدەرىستەردىڭ بەلسەندى قاتىسۋشىسىنا اينالۋى قاجەتتىگىن قاداپ ايتتى.
وسى ورايدا قارۋلى كۇشتەر ءۇشىن تىڭ مۇمكىندىكتەر مەن جاڭا كوكجيەكتەر اشىلىپ جاتىر. ارميا قازىرگى زامانعى تسيفرلىق شەشىمدەردى ەنگىزۋ ارقىلى باسقارۋ جۇيەلەرىن اۆتوماتتاندىرۋ مەن تسيفرلاندىرۋ باعىتىن دايەكتى جۇزەگە اسىرىپ كەلەدى. قورعانىس مينيسترلىگى قۇرىلىمىندا جاساندى ينتەللەكت تەحنولوگيالارىن دامىتۋعا ارنالعان ارنايى باسقارما قۇرىلىپ, «سارباز+» قاناتقاقتى جوباسى ىسكە قوسىلدى, سونداي-اق تسيفرلىق اسكەري كوميسساريات جۇيەسى ەنگىزىلدى.
بۇگىندە مونيتورينگ, بايلانىس جانە ناۆيگاتسيا جۇيەلەرى بەلسەندى دامىپ, ۇشقىشسىز ۇشۋ اپپاراتتارىن قولدانۋ اۋقىمى كەڭەيىپ كەلەدى. جاساندى ينتەللەكت الگوريتمدەرىن جاۋىنگەرلىك ءىس-قيمىلداردى جوسپارلاۋ مەن باسقارۋ ۇدەرىستەرىنە ەندىرۋ بويىنشا جۇيەلى جۇمىس جۇرگىزىلىپ جاتىر. وسى باعىتتاعى ماڭىزدى قادامنىڭ ءبىرى قاراعاندى وبلىسىنداعى «سارىشاعان» پوليگونىندا وتكەن «جاۋىنگەرلىك دوستاستىق-2025» وقۋ-جاتتىعۋلارى بارىسىندا اۋە قورعانىسى كۇشتەرىن باسقارۋدىڭ اۆتوماتتاندىرىلعان جۇيەسىنىڭ العاش رەت سىناقتان ءوتۋى بولدى. بۇل – قورعانىس ارحيتەكتۋراسىن جاڭعىرتۋ جولىنداعى ايرىقشا بەتبۇرىس.
مەملەكەت باسشىسىنىڭ 1 تامىزدا قورعانىس ءمينيسترىن قابىلداۋ بارىسىندا بەرگەن ناقتى تاپسىرمالارى مەن نۇسقاۋلارى جولداۋدا كوتەرىلگەن ماسەلەلەرمەن تىكەلەي ۇندەسىپ جاتقانىن ايتا كەتۋ كەرەك. وسى تاپسىرمالار شەڭبەرىندە قورعانىس مينيسترلىگى اسكەردىڭ ۇتقىرلىعىن جانە ولاردىڭ قاۋىپ-قاتەرگە جەدەل دەن قويۋ قابىلەتىن ارتتىرۋ, اۋە شابۋىلىنا قارسى قورعانىس اسكەرلەرىن, اۋماقتىق بولىمشەلەر مەن ۇۇا قۇرامالارىن دامىتۋ, تسيفرلىق ترانسفورماتسيا تالاپتارىن ەسكەرە وتىرىپ, اسكەري ينفراقۇرىلىمدى جاڭعىرتۋ, مەملەكەتتىك قورعانىس تاپسىرىسىنىڭ تەتىگىن جەتىلدىرۋ, اسكەري قىزمەتتىڭ قاۋىپسىزدىگىن ارتتىرۋ جانە جاراقاتتانۋدىڭ الدىن الۋ, سونداي-اق قازىرگى زامانعى تەحنولوگيالار نەگىزىندە قارۋلى كۇشتەردىڭ جاۋىنگەرلىك الەۋەتىن نىعايتۋ جونىندەگى شارالاردى ىسكە اسىرۋ بويىنشا كەشەندى جۇمىس جۇرگىزىپ جاتىر.
اتالعان باسىمدىقتاردى ورىنداۋ – ەلىمىزدىڭ قورعانىس قابىلەتى مەن ۇلتتىق قاۋىپسىزدىگىن قامتاماسىز ەتۋدەگى ستراتەگيالىق ماڭىزدى مىندەت. يننوۆاتسيالىق شەشىمدەردى ەنگىزۋ, عىلىمي-تەحنيكالىق الەۋەتتى دامىتۋ جانە بىلىكتى ماماندار دايارلاۋ قارۋلى كۇشتەردىڭ XXI عاسىردىڭ سىن-قاتەرلەرىنە لايىق جاۋاپ بەرۋىنە جانە مەملەكەت تىرەگى رەتىندەگى ءرولىن نىعايتۋىنا كەپىل بولماق.
پرەزيدەنت جولداۋى – بارشا قوعام ءۇشىن ماڭىزدى باعدار. ال ارميا ءۇشىن بۇل قۇجاتتى ودان ءارى جاڭعىرۋعا, قورعانىس قۋاتىن ارتتىرۋعا جانە تسيفرلىق تەحنولوگيالار ارقىلى تيىمدىلىكتى جاڭا دەڭگەيگە كوتەرۋگە باعىتتالعان ناقتى ارەكەت جوسپارى دەپ بىلەمىز. ءبىز, اسكەري قىزمەتشىلەر, مەملەكەت باسشىسى ۇسىنعان باعىتتىڭ تولىعىمەن جۇزەگە اساتىنىنا سەنىمدىمىز. قارۋلى كۇشتەر الداعى ۋاقىتتا دا يننوۆاتسيالار مەن جوعارى جاۋىنگەرلىك دايىندىق ستاندارتتارىنا سۇيەنە وتىرىپ, العا باسا بەرمەك.
داۋرەن قوسانوۆ,
قورعانىس ءمينيسترى, اۆياتسيا گەنەرال-لەيتەنانتى