مەملەكەت باسشىسى قاسىم-جومارت توقاەۆتىڭ بيىلعى جولداۋىندا ەلىمىزدىڭ ساياسي-ەكونوميكالىق دامۋ باعىتى ايقىندالدى. ونىڭ باستى ەكى ارقاۋى بار: ءبىرى – ينۆەستيتسيانى ءوندىرىس سالاسىنا تارتۋ, ەكىنشىسى – ترانزيتتىك-لوگيستيكالىق الەۋەتتى ءتيىمدى پايدالانۋ. سوڭعىسى – قازىرگى كەزەڭدە ايرىقشا وزەكتى.
جولداۋدا كولىك-لوگيستيكا جۇيەسىن دامىتۋدىڭ ماڭىزى اتالىپ ءوتتى. پرەزيدەنتتىڭ ايتۋىنشا, وتكەن جىلى ەلىمىزدىڭ اۋماعى ارقىلى جۇك تاسىمالىنىڭ كولەمى 1 ملرد توننادان استى. بۇل – قازاقستاننىڭ ترانزيتتىك الەۋەتىن ايقىن كورسەتەتىن كورسەتكىش.
مەملەكەت باسشىسى ترانسكاسپي حالىقارالىق كولىك باعىتىن دامىتۋدىڭ قاجەتتىگىن اتاپ ءوتتى. سونىمەن قاتار جاڭا ينۆەستيتسيالار تارتىلىپ, ينفراقۇرىلىم جاقسارىپ, ساپالى جۇمىس ورىندارى اشىلۋى قاجەت. پرەزيدەنت وڭىرلەردىڭ كولىك بايلانىسىن نىعايتۋعا, ەلىمىزدىڭ ءىرى ترانزيتتىك ايماق رەتىندەگى مۇمكىندىكتەرىن تولىق پايدالانۋعا ەرەكشە ءمان بەردى.
الەمدىك نارىققا شىعۋ ماسەلەسىندە دە ناقتى مىسالدار كەلتىرىلدى. ماسەلەن, جۋىردا قىتايدىڭ ليانيۋنگان پورتى ارقىلى قازاقستاندىق بيداي ۆەتنامعا جونەلتىلدى. سونداي-اق اۋعانستان اۋماعىنداعى «تۋرگۋندي – گەرات» تەمىرجولىن سالۋ ارقىلى پاكىستان نارىعىنا شىعۋ كوزدەلىپ وتىر. ال «شىعىس – باتىس» باعىتى بويىنشا ۇزىندىعى 836 شاقىرىم بولاتىن «دوستىق – مويىنتى» تەمىرجولىنىڭ ەكىنشى جەلىسى ىسكە قوسىلماق. بۇل – قارقىندى ىلگەرىلەۋدىڭ ايقىن دالەلى.
ۇكىمەت تاراپىنان «باقتى – اياگوز», «قىزىلجار – مويىنتى» جوبالارىن جەدەلدەتىپ قولعا الۋ جوسپارى جاريالاندى. بۇل شارالار ەلىمىزدەگى تەمىرجول جۇيەسىنىڭ تولىققاندى قاڭقاسىن قالىپتاستىرۋعا مۇمكىندىك بەرەدى. الايدا كولىك سالاسىندا وزىق ەلدەر قاتارىنا قوسىلۋ ءۇشىن تسيفرلاندىرۋ مەن جاساندى ينتەللەكتىنى كەڭىنەن قولدانۋ قاجەتتىگى دە باسا ايتىلدى.
جولداۋدا الەۋمەتتىك-ەكونوميكالىق ماسەلەلەرمەن قاتار, ساياسي رەفورمالاردىڭ جالعاسىن تاباتىنىنا نازار اۋدارىلدى. اتاپ ايتقاندا, 2027 جىلدان باستاپ قازاقستان ءبىر پالاتالى پارلامەنتكە كوشپەك. بۇل – كونستيتۋتسيالىق اۋقىمداعى وزگەرىس. ەندىگى جەردە ايماقتىق مۇددەلەر مەن ەتنوسارالىق قارىم-قاتىناستاردى رەتتەۋ, ازاماتتىق قوعامنىڭ پىكىرىن ءبىلدىرۋ جانە زاڭ شىعارۋ ۇدەرىسى ماجىلىستە شوعىرلانادى.
پرەزيدەنتتىڭ ايتۋىنشا, ازاماتتاردىڭ قۇقىقتارى مەن مۇددەلەرى ەڭ جوعارى قۇندىلىق رەتىندە قارالادى. بارلىق شەشىم, پىكىرتالاس پەن ساياسي تالقى ءماجىلىستىڭ الاڭىندا وربىمەك. بۇل – ەلدىڭ دەموكراتيالىق دامۋى جولىنداعى ۇلكەن جاۋاپكەرشىلىكتىڭ بەلگىسى. جولداۋدا كوتەرىلگەن باستامالار قوعام ءۇشىن ماڭىزدى ءارى ۋاقىت تالابىنا ساي.
ماقسات جاقاۋ,
ساياساتتانۋشى