مەملەكەت باسشىسى جولداۋدا ەلىمىزدىڭ كولىك جۇيەسى ءۇشىن ستراتەگيالىق ماڭىزى زور «سەكسەۋىل – بەينەۋ» جوباسىن جۇزەگە اسىرۋدى تاپسىردى. اتالعان ماگيسترالدىڭ قۇرىلىسى قىتايدان ەۋروپاعا ءبىزدىڭ ەلدىڭ اۋماعى ارقىلى جۇك تاسىمالداۋ ۋاقىتىن شامامەن ۇشتەن بىرگە دەيىن قىسقارتۋعا مۇمكىندىك بەرەدى.
سونىمەن قاتار كاسپي تەڭىزىنە تىكەلەي قولجەتىمدىلىكتى قامتاماسىز ەتەدى. مۇنداي قادام ەلىمىزدىڭ ترانزيتتىك الەۋەتىن ەداۋىر نىعايتىپ, تەڭىز پورتتارى ارقىلى جۇك اينالىمىن ۇلعايتادى, حالىقارالىق لوگيستيكالىق تىزبەكتەردەگى ستراتەگيالىق بۋىن رەتىندەگى ءرولىمىزدى كۇشەيتەدى. بۇدان بولەك, جوبا ەلىمىزدىڭ باتىس ايماقتارىنىڭ الەۋمەتتىك-ەكونوميكالىق دامۋىنا ايتارلىقتاي سەرپىن بەرمەك. اتاپ ايتقاندا, جاڭا جۇمىس ورىندارىنىڭ قۇرىلۋى, شاعىن جانە ورتا بيزنەستىڭ وركەندەۋى, تۋريزم سالاسىنىڭ الەۋەتىن كەڭەيتۋگە جاعداي جاسايدى.
جالپى, رەسپۋبليكا بويىنشا 13 مىڭ شاقىرىمنان استام تاسجول قۇرىلىسى مەن جوندەۋ جۇمىستارى جالعاسىپ جاتىر. سونىمەن قاتار شەكارا ينفراقۇرىلىمىن دا جاڭعىرتۋ قولعا الىندى. بيىل 8 وتكىزۋ بەكەتى تولىق ىسكە قوسىلادى, ال كەلەسى ءۇش جىل ىشىندە تاعى 34 بەكەت قايتا جاڭارتىلادى. ناتيجەسىندە, وتكىزۋ قابىلەتى ارتىپ, ازاماتتار مەن كاسىپكەرلەرگە كورسەتىلەتىن قىزمەت ساپاسى ايتارلىقتاي جاقسارادى.
تولەگەن ابدۋللين,
كولىك مينيسترلىگى
اۆتوموبيل جولدارى كوميتەتىنىڭ توراعاسى