مەملەكەت باسشىسى قاسىم-جومارت توقاەۆ جاقىندا جاريالاعان جولداۋىندا گەولوگيالىق بارلاۋ جۇمىستارىن كۇشەيتۋ ماڭىزدى مىندەت ەكەنىن جەتكىزدى. «تسيفرلىق قۇرالداردى پايدالانا وتىرىپ, جەر قويناۋىنىڭ زاماناۋي كارتاسىن جاسايتىن ۋاقىت كەلدى. مۇنداي قادام كەن ورىندارىنىڭ الەۋەتىن جاڭا ساپالىق تۇرعىدان باعالاۋعا مۇمكىندىك بەرەدى. بۇل جۇمىسقا دا حالىقارالىق ساراپشىلاردى تارتۋعا بولادى. ارينە, عىلىمي نەگىزى بولماسا, بارلاۋ جۇمىسىن ويداعىداي جۇرگىزۋ مۇمكىن ەمەس. كەلەسى جىلدىڭ ورتاسىنا دەيىن وزىق حالىقارالىق ستاندارتقا ساي سەرتيفيكاتى بار زەرتحانا اشۋ كەرەك. ونى ۇلتتىق گەولوگيالىق قىزمەتتىڭ بازاسىندا قۇرعان ءجون», دەپ ايتتى.
ساتباەۆ ۋنيۆەرسيتەتىنىڭ قۇرامىنداعى ق.ي. ساتباەۆ اتىنداعى گەولوگيالىق عىلىمدار ينستيتۋتى ەل پرەزيدەنتىنىڭ گەولوگيالىق بارلاۋ سالاسىن جاڭعىرتۋعا باعىتتالعان ستراتەگيالىق باستامالارىن ۇنەمى بەلسەندى قولدايدى. وسى باعىت اياسىندا اتالعان ينستيتۋت ەلىمىزدەگى ەڭ ءىرى گەولوگيالىق ۇلگىلەردى تالداۋعا ارنالعان زەرتحانانى قۇرۋ جوباسىن ىسكە اسىرىپ وتىر.
گەولوگيا – ەلىمىزدىڭ ەكونوميكالىق دامۋى مەن ۇلتتىق قاۋىپسىزدىگىن قامتاماسىز ەتۋدەگى ەڭ ماڭىزدى سالانىڭ ءبىرى. مەملەكەت باسشىسىنىڭ جاڭا تەحنولوگيالاردى ەنگىزۋ جانە پايدالى قازبالار قورىن ءتيىمدى باسقارۋ جونىندەگى تاپسىرمالارى شەڭبەرىندە ينستيتۋت بيىلعى ماۋسىمنان باستاپ حالىقارالىق ستاندارتقا ساي تولىق تسيكلدى زەرتحانالىق كەشەن سالۋ جۇمىسىن باستادى.
جوبانىڭ ستراتەگيالىق ماڭىزى جوعارى. سوندىقتان ينستيتۋت سەنىمدى ينۆەستورلارمەن «GeoLab Eurasia» اتتى بىرلەسكەن كاسىپورىن قۇرىپ, زەرتحانالىق كەشەننىڭ قۇرىلىسىن رەسمي تۇردە باستادى. بۇعان يندۋستريا جانە قۇرىلىس مينيسترلىگىنە قاراستى گەولوگيا كوميتەتى, سونداي-اق سىرتقى ىستەر مينيسترلىگى جانىنداعى ينۆەستيتسيالار كوميتەتى تىكەلەي قولداۋ كورسەتىپ وتىر.
قازىر الماتى قالاسىنداعى ينستيتۋت اۋماعىندا زاماناۋي تالداۋ قوندىرعىلارىمەن جابدىقتالاتىن زەرتحانانىڭ العاشقى بلوگى بوي كوتەرىپ جاتىر. ونىڭ اشىلۋى الداعى قاراشا ايىنا جوسپارلانعان.
جوبا اياسىندا بارلىق زەرتحانالىق ۇدەرىس تسيفرلاندىرىلىپ, زەرتحانالىق اقپاراتتى باسقارۋ جۇيەسى (LIMS) ەنگىزىلەدى. سونىمەن بىرگە ISO/IEC 17025-2019 حالىقارالىق ستاندارتى بويىنشا اككرەديتاتسيادان ءوتۋ, قىزمەتكەرلەردى وقىتۋ جانە مەترولوگيالىق كاليبرلەۋ جۇمىستارى قامتىلعان.
جاڭا زەرتحانا گەولوگيالىق ۇلگىلەردى كەشەندى تۇردە زەرتتەۋدى قامتاماسىز ەتەدى. مۇندا ۇلگىلەردى دايىنداۋ, سپەكترومەتريالىق ادىستەر (XRF, XRD, ICP-OES, ICP-MS جانە ت.ب.), حيميالىق, فيزيكا-مەحانيكالىق, تەرميالىق جانە گيدروحيميالىق زەرتتەۋلەر جۇرگىزىلەدى. ءبىرىنشى كەزەڭدە, ەكى مامانداندىرىلعان اسپاپتىق زەرتحانا, وقۋ اۋديتوريالارى جانە دەمونستراتسيالىق زال اشىلادى.
ەكىنشى كەزەڭدە كەلەسى جىلدىڭ ءبىرىنشى توقسانىنىڭ سوڭىنا دەيىن قوناەۆ قالاسىنداعى ساتباەۆ ۋنيۆەرسيتەتى پوليگونىندا جالپى اۋدانى 3 گەكتاردى قۇرايتىن زەرتحانالىق-وندىرىستىك كەشەننىڭ قۇرىلىسى اياقتالادى. بۇل كەشەنگە جوعارى تەحنولوگيالىق زەرتحانالار, وندىرىستىك تسەحتار, وقۋ-ادىستەمەلىك بلوكتار, تالدامالىق ورتالىقتار مەن قويما ينفراقۇرىلىمى كىرەدى.
زەرتحانا قىزمەتكەرلەرىنىڭ 80%-ىن ينستيتۋتتىڭ بىرەگەي ءبىلىم مەن تاجىريبەسىنە يە وتاندىق عالىمدار مەن گەولوگتەر قۇرايدى. بۇل جوبا ەلىمىزدىڭ عىلىمي تاۋەلسىزدىگىن ارتتىرىپ, ورتالىق ازياداعى الەمدىك دەڭگەيدەگى گەولوگيالىق زەرتتەۋ ورتالىعىن قالىپتاستىرۋعا جول اشادى. قازىرگى تاڭدا جاستاردىڭ وسى ماڭىزدى سالاعا دۇرىس باعىتتالىپ, بىلىكتىلىگىن جەتىلدىرە وتىرىپ, ەلىمىزدىڭ دامۋىنا ۇلەس قوسۋى ەرەكشە ماڭىزدى.
قورىتا كەلگەندە, ق.ي. ساتباەۆ اتىنداعى گەولوگيالىق عىلىمدار ينستيتۋتى ەلىمىزدىڭ ستراتەگيالىق باستامالارىن قولداپ, ەلىمىزدىڭ گەولوگيا سالاسىن جاڭعىرتۋعا ناقتى ۇلەس قوسادى.
ازامات ەسەن