پرەزيدەنت بيىلعى جولداۋىندا اۋىل شارۋاشىلىعىنا جاۋاپتى شەنەۋنىكتەرگە سىن ايتتى. قازىرگى احۋالدى ايتۋعا ۇيات دەپ باعالادى. راسىندا, قۇداي بەرگەن ۇلان-بايتاق جەرىمىز بار. مال شارۋاشىلىعىن, ەگىن شارۋاشىلىعىن دامىت تا, ءوز-ءوزىڭدى اسىرا. قازىر قازاقستان شەتەلدەن ميللياردتاعان دوللارعا ازىق-ت ۇلىك يمپورتتايدى. ءتىپتى, سوناۋ ارگەنتينا سەكىلدى شالعايداعى مەملەكەتتەردەن ەت اكەلەدى ەكەنبىز.
مەملەكەت باسشىسى جاۋاپتى مينيسترلىككە اگروبيزنەستى قولداۋ جوسپارىن ازىرلەپ, ناقتى قارجىلاندىرۋ شارالارىن باستاۋدى تاپسىردى. سونداي-اق ىشكى نارىقتى ەتپەن تولىق قامتاماسىز ەتۋ قاجەت ەكەنىن ناقتىلادى. ەكسپورتتى دا ۇمىتپاۋ قاجەت. ەگەر مال شارۋاشىلىعىن دۇرىس دامىتساق, ءوزىمىزدى عانا ەمەس, كورشى ەلدەردى دە ەتپەن قامتاماسىز ەتۋگە الەۋەتىمىز جەتەدى.
مەنىڭشە, ەت باعاسىن باقىلاۋدان بوساتۋ قاجەت. قازىر مەملەكەت ەتتىڭ اسا قىمباتتاپ كەتپەۋىن قاداعالاپ وتىر. الايدا بۇل مال وسىرەتىندەرگە ءتيىمسىز. مال باعۋ – وڭاي شارۋا ەمەس. جەم-ءشوبى, باسقا دا شىعىندارى بار. ەگەر ەتتىڭ باعاسىن باقىلاۋدان بوساتسا, ارينە, قىمباتتايدى. بىراق اۋىل شارۋاشىلىعىمەن اينالىساتىندارعا ءتيىمدى بولادى. بۇل شەشىم كوپشىلىككە ۇناماۋى مۇمكىن. الايدا باسقا امال جوق. ويتكەنى كورشى ەلدەردە ەتتىڭ باعاسى – قىمبات. ال كۇننىڭ سۋىعىنا توڭىپ, ىستىعىنا كۇيىپ, تاڭنان قارا كەشكە دەيىن مال سوڭىندا جۇرگەن ادامعا ەڭبەگىڭدى ارزانعا سات دەپ قالاي ايتاسىڭ؟
مەملەكەت باسشىسى ۇكىمەتكە ەۋرازيا اۋماعىنداعى ساۋدا-ساتتىقتىڭ ءادىل جاعدايدا جاسالۋىن دا ناقتى دالەلمەن تالاپ ەتۋدى مىندەتتەدى. بايقاساق, قازىر «ماگنۋم» سەكىلدى ساۋدا جەلىلەرىندە رەسەيلىك ونىمدەر كوبەيىپ كەتتى. اسىرەسە ءسۇت ونىمدەرى وتە كوپتەپ يمپورتتالىپ جاتىر. وتكەندە ءوزىمىزدىڭ «3 جەلانيا» مايونەزىن تاپپاي قويىپ ەدىك. ورنىنا رەسەيلىك ءونىم قاپتاپتى. مۇنداي ءتاسىل ىشكى بيزنەستى قۇردىمعا جىبەرەدى. سوندىقتان پرەزيدەنت وتە دۇرىس ماسەلە كوتەرىپ وتىر.
پرەزيدەنت بۇل ماسەلەنى بيلىككە ديپلوماتيالىق جولمەن جەتكىزدى. سوندىقتان اۋىل شارۋاشىلىعى سالاسىنا جاۋاپتى شەنەۋنىكتەر بۇل سىننان قورىتىندى شىعارادى دەپ ۇمىتتەنەمىز.
قازبەك مايگەلدينوۆ,
ساياساتتانۋشى