جامبىل اتىنداعى قازاق مەملەكەتتىك اكادەميالىق فيلارمونيا سوليستەرىنىڭ 90-شى مەرەيتويلىق ماۋسىمى اشىلدى, دەپ جازادى Egemen.kz.
فيلارمونيانىڭ ۇلكەن زالىندا وتكەن مەرەيلى ماۋسىمدا ونەر ۇجىمىنىڭ جەتەكشى سوليستەرى ونەر كورسەتىپ, تىڭدارمانعا ۇمىتىلماس مۋزىكالىق اسەر سىيلادى. ارنايى باعدارلامادا كوپشىلىك نازارىنا ۆيرتۋوزدى مۋزىكانتتاردىڭ ورىنداۋىنداعى الەمدىك كلاسسيكا مەن ءداستۇرلى مۋزىكانىڭ جاۋھارلارى ۇسىنىلدى.ءوز تىڭدارماندارىن جانرلىق الۋاندىعىمەن تاڭداي قاقتىرعان كونتسەرتتە ۇجىمدا كوپ جىلدان بەرى تاباندى ەڭبەك ەتىپ كەلە جاقان گۇلجان وزەنباەۆا, ايدا ايۋپوۆا, گۇلنارا قۇرامباەۆا, ەرمەك قۇرماناەۆ سىندى قازاقستاننىڭ ەڭبەك سىڭىرگەن قايراتكەرلەرى, مادەنيەت قايراتكەرى ەرجان الىمبەتوۆ, ءادىل نەسىپباەۆ, ماقپال قازىبەكقىزى, مۇسا كەرىمباەۆ سىندى مادەنيەت سالاسىنىڭ ۇزدىكتەرى ونەر كورسەتتى. ۇلتتىق جانە الەمدىك كلاسسيكانىڭ ۇيلەسىمىمەن ەرەكشەلەنگەن كەشتە قازاقتىڭ حالىق ءانى «اقباقاي», ۇكىلى ىبىرايدىڭ «گاككۋىنەن» باستاپ ايگىلى باحتىڭ ورگانعا ارنالعان «توككاتا جانە فۋگا رە مينور» سىندى تۋىندىلارى ورىندالدى.
ايتا كەتۋ كەرەك, تاريح تولقىنىندا تالاي مادەني وقيعالارعا كۋا بولعان فيلارمونيا ءۇشىن ءداستۇرلى ونەر مەن وتاندىق كومپوزيتورلاردىڭ ەڭبەكتەرىن كەڭىنەن ناسيحاتتاۋ – باستى قاعيدا سانالادى. بۇل رەتتە ۇجىم توقسان جىل بويى وسى باعىتتان تايماي, ونەر بيىگىن باعىندىرىپ كەلەدى. فيلارمونيا سوليستەرىنىڭ بۇگىنگى ماۋسىماشار كونتسەرتى وسى ۇردىسكە ايقىن دالەل بولدى.