قۇداي قوسقان كورشى, باۋىرلاس ەل وزبەكستان ەلىمىزدىڭ باعىت-باعدارىنا ەرەكشە نازار اۋداراتىنى ءسوزسىز. ويتكەنى قازاقستان ايماق دامۋىنىڭ باعىتىن بەلگىلەيتىن ەل ەكەنىن الەم جۇرتشىلىعى الدەقاشان مويىنداعان. وسى ماعىنادا العاندا, وزبەكستاندىقتار قاسىم-جومارت توقاەۆتىڭ بۇل جولعى جولداۋىن دا قىزىعۋشىلىقپەن قابىلدادى.
قازاقستان پرەزيدەنتى الماعايىپ زاماندا كوشتەن قالماس ءۇشىن جەتكەن جەتىستىكتەرگە توقمەيىلسىمەي, ۇنەمى العا ۇمتىلۋ, ۇمتىلعاندا دا وزىق وي, ونەگەلى وزگەرىس, ساليقالى ساياسات قاجەت ەكەنىن جاقسى تۇسىنەدى. ءسوز بەن ءىستىڭ بىرلىگى عانا ەلدى وركەنيەتكە باستايدى.
قاسىم-جومارت توقاەۆ بۇل جولى دا ايماق باسشىلارىنىڭ الدىن وراپ كەتتى. ۋنيتارلى مەملەكەتكە قوس پالاتالى پارلامەنتتىڭ قاجەت ەمەس ەكەنى تۋرالى پىكىرلەر وزبەكستاندا دا ۇنەمى ايتىلىپ ءجۇر. الايدا وت باسى, وشاق قاسىنان ءارى اسقان جوق. قازاقستان پرەزيدەنتى ءبىر پالاتالى پارلامەنت قۇرۋ يدەياسىمەن ايماقتى, ونىڭ ىشىندە وزبەكستاندى ساياسي ديسكۋرسىن قايتا قاراۋعا ۇندەيتىنى حاق.
وزبەكستاننىڭ بۇقارالىق اقپارات قۇرالدارىندا قاسىم-جومارت توقاەۆتىڭ جولداۋى تۋرالى اقپاراتتار تولاسسىز جاريالانىپ جاتىر. اسىرەسە ءبىر پالاتالى پارلامەنت قۇرۋ يدەياسى وزبەكستاندىقتاردا ەرەكشە قىزىعۋشىلىق تۋعىزدى.
وزبەكستانداعى بەدەلدى «Daryo.uz» پورتالى «قازاقستان پارلامەنتى ءبىر پالاتالى بولۋى مۇمكىن» دەگەن تاقىرىپپەن ماقالا جاريالادى. «پرەزيدەنت بۇل وتە كۇردەلى ماسەلە ەكەنىن, ونى شەشۋدە اسىعىستىققا جول بەرمەۋ كەرەكتىگىن باسا ايتتى. سوندىقتان ونى ازاماتتىق قوعامدا, ساراپشىلار اراسىندا, قازىرگى پارلامەنتتە تالقىلاۋ قاجەت دەدى», دەپ جازىلعان ماقالادا.
«Qalampir.uz» پورتالى بولسا, «ق.توقاەۆ كونستيتۋتسيانى وزگەرتۋدى ۇسىندى» دەگەن ماتەريالىندا قازاقستان پرەزيدەنتىنىڭ ءبىر پالاتالى پارلامەنت قۇرۋ يدەياسىنا باسا نازار اۋداردى. «قازاقستان پرەزيدەنتى قاسىم-جومارت توقاەۆ رەسپۋبليكانى قوس پالاتالى پارلامەنتتەن ءبىر پالاتالى پارلامەنتكە كوشىرۋ ءۇشىن پارلامەنتتىك رەفورمانى ۇسىندى. بۇل ماسەلەنى 2027 جىلى وتەتىن كونستيتۋتسياعا وزگەرىستەر ەنگىزۋ جونىندەگى رەفەرەندۋمعا شىعارۋ كەرەك. بۇل تۋرالى پرەزيدەنت بۇگىن, 8 قىركۇيەكتە پارلامەنتتە حالىققا جولداۋىندا مالىمدەدى», دەپ جازدى پورتال.
سونداي-اق اتالعان پورتال رەفەرەندۋمعا, ق.توقاەۆتىڭ قىزمەتىنە شولۋ جاسادى.
«رەفەرەندۋم 2027 جىلى وتەتىن بولسا, بۇل توقاەۆتىڭ پرەزيدەنتتىگى تۇسىنداعى ءۇشىنشى رەفەرەندۋم بولماق. ءبىرىنشىسى 2022 جىلى بولدى, ول كەزدە كونستيتۋتسياعا وزگەرىستەر ەنگىزۋ ارقىلى ءبىر ادامنىڭ ءبىر مەرزىمنەن ارتىق ەل پرەزيدەنتى بولۋىنا تىيىم سالىنىپ, پرەزيدەنتتىك مەرزىمى جەتى جىلعا دەيىن ۇزارتىلدى. توقاەۆ تۇسىنداعى ەكىنشى رەفەرەندۋم 2024 جىلى ءوتتى, وندا قازاقستاندا اەس سالۋ ماسەلەسى تالقىلاندى», دەپ جازادى ماقالا اۆتورى.
بۇل – ءسوزىمىزدىڭ باسىندا ايتقان ق.توقاەۆتىڭ جولداۋلارى, باستامالارى ۇنەمى وزبەكستاندىقتاردىڭ باستى نازارىندا ەكەنىنىڭ ايعاعى. تاعى ءبىر ايتا كەتەتىن جايت, اتى ايتىپ تۇرعانداي بۇل پورتال نەگىزىنەن سىني ماتەريالدار جاريالايدى. الايدا ق.توقاەۆتىڭ جولداۋى تۋرالى ماتەريالدىڭ قازاقستان پرەزيدەنتىنە ەرەكشە قۇرمەتپەن جازىلعانى كورىنىپ تۇر.
ش. ميرزيوەۆ بيلىككە كەلگەن سوڭ اشىلعان, جاڭا وزبەكستان (يانگي Ўزبەكيستون) تىنىس-تىرشىلىگىن جاريالايتىن «Yuz.uz» پورتالى قاسىم-جومارت توقاەۆتىڭ جاساندى ينتەللەكت جانە تسيفرلىق دامۋ مينيسترلىگىن قۇرۋ, قازاقستان رەسپۋبليكاسى باس پروكۋراتۋراسىنىڭ اكتيۆتەردى قايتارۋ جونىندەگى كوميتەتى ەندى ينۆەستورلار قۇقىعىن قورعاۋ كوميتەتى دەپ اتالاتىنى جونىندەگى باستامالاردى تاراتىپ جازدى.
قازاقستان حالقىنىڭ بولاشاعىنا باعىت-باعدار بەرەتىن ەل پرەزيدەنتىنىڭ وسى جىلعى جولداۋى حالىقتىڭ ىنتىماعىن نىعايتىپ, ولاردىڭ مۇڭ-مۇقتاجىن تىڭداپ قانا قويماي, سول قاجەتتىلىكتەردى شەشۋگە ايقىن ءىس-ارەكەتتەر كورسەتىلگەن جولداۋ دەپ ايتۋعا بولادى.
باۋىرلاس ەل رەتىندە وزبەكستاندىقتار دا قاسىم-جومارت توقاەۆتىڭ ساياسي شەشىمدەرىن قولداپ, بارلىق باستاماسىنىڭ ىسكە اسۋىنا تىلەكتەستىك بىلدىرەدى.
بەگابات ۇزاقوۆ,
جۋرناليست