استانا. 18 اقپان. رەسەي جازانى ورىنداۋ فەدەرالدى قىزمەتىنىڭ اكادەمياسى 2014 جىلى رەسەيدىڭ تۇزەتۋ مەكەمەلەرىندە 28 مىڭ 496 شەت ەلدىك ازاماتتىڭ وتىرعانىن مالىمدەدى. بۇل تۋرالى «ازيا-پليۋس» اگەنتتىگى حابارلادى.
تاجىكستان اقپارات اگەنتتىگى وسى شەتەلدىكتەردىڭ تورتتەن ءبىر بولىگىن تاجىكتەر قۇرايتىنىن جەتكىزەدى. سوتتالعان شەتەلدىك ازاماتتاردىڭ ەڭ كوپ مولشەرى بولىپ تابىلاتىن بۇل كورسەتكىش 7 786 ادامدى كورسەتەدى. ەكىنشى ورىندا 6 846 ازاماتى رەسەي تۇرمەسىنىڭ اۋاسىن جۇتقان وزبەكستان تۇرسا, ءۇشىنشى ورىنعا 2 964 ازاماتىمەن ۋكراينا شىعادى. ال «ليدەرلەر تورتتىگىن» 2 846 ادامىن ق ۇلىپ استىنا بەرگەن ازەربايجان تياناقتايدى.
«يزۆەستيا» گازەتىنىڭ اقپارىنشا, فەدەرالدى قىزمەت رەسەي كولونيالارى مەن تۇرمەلەرىندە جازالارىن وتەپ جاتقان ميگرانتتاردىڭ پسيحولوگياسىن زەرتتەيتىن ارنايى تاسىلدەمە جاساپ جاتىر. بۇعان سوڭعى كەزدەرى سوتتالۋشى شەت ەلدىكتەردىڭ كوبەيىپ بارا جاتقانى اسەر ەتكەن.
«ەگەر 2013 جىلى جازانى ورىنداۋ فەدەرالدى قىزمەتىنىڭ مەكەمەلەرىندە 26,6 شەت ەلدىك ازاماتتار جازالارىن وتەسە, 2014 جىلى ولاردىڭ قاتارى 28,5 مىڭعا دەيىن جەتكەن. جانە بۇلاردىڭ 95 پايىزى جازانى ورىنداۋ مەكەمەلەرى باسشىلىعىمەن بايلانىسقا شىقپايدى, ال ءاربىر ءۇشىنشىسى ءتارتىپتى ۇدايى بۇزۋشى بولىپ كەلەدى», - دەپ مالىمدەيدى باسىلىم.
«الايدا, ميگرانتتار جالپى سوتتالۋشىلاردىڭ بار-جوعى 5 پايىزدان ءسال جوعارى بولىگىن قۇرايدى, - دەيدى جازانى ورىنداۋ فەدەرالدى قىزمەتىندەگىلەر. – بىراق ولار قىلمىستى نەگىزىنەن ماسكەۋ مەن وعان جاقىن وبلىستاردا جاسايتىن بولعاندىقتان, جازالارىن ورتالىق رەسەيدە ورنالاسقان كولونيالاردا وتەيدى».
باسىلىم ميگرانتتاردىڭ 95,5 پايىزىنىڭ مەكەمەلەر باسشىلىعىمەن بايلانىس ورناتپايتىنىن جانە تۇتقىنداعى باسقا ادامدارعا قاراعاندا, ءتارتىپتى كوبىرەك بۇزىپ, جازانى ارتىعىراق الىپ تۇراتىنىن اتاپ وتەدى. تمد ەلدەرىنەن سوتتالعان ازاماتتاردىڭ 32,7 پايىزى ءتارتىپتى ۇدايى بۇزۋشىلار بولىپ تابىلادى. زەرتتەۋ سونداي-اق ولاردىڭ 20 پايىزىنىڭ عانا ىنتالاندىرۋ الا الاتىنىن بىلدىرەدى.
سونىمەن قاتار, جازالارىن وتەپ جاتقان ميگرانتتاردىڭ 90 پايىزى ەڭبەككە جارامدى جاستاعىلار بولىپ تابىلادى. ولاردىڭ 11,8 پايىزى سوتتالعانعا دەيىن 2 جىلدىق ەڭبەك ءوتىلىن عانا الىپ ۇلگەرگەن. بۇدان ءارى 26,8 پايىزىندا – 10 جىل, 43,2 پايىزىندا 15 جانە ودان دا كوپ ەڭبەك وتىلدەرى بار.
مۇرات ايتقوجا.